Urdu News - Online Urdu News Paper

کرم ایجنسی ۔ کرم ایجنسی میں میں متحارب گروپوں کے درمیان تازہ لڑائی میں16 عسکریت پسندوں سمیت22 افراد ہلاک اور38 زخمی ہوگئے ۔قبائلیوں کا کہنا ہے کہ حکومت کی جانب سے جنگ بندی کی کوشش میں عدم دلچسپی کے باعث لڑائی مزید علاقوں میں تیزی کے ساتھ پھیل رہی ہے ۔ذرائع کے مطابق کرم ایجنسی میں19 روز سے قبائل کے درمیان جھڑپیں ہورہی ہیں۔تازہ جھڑپوں کے نتیجے میں16 عسکریت پسندوں سمیت22 افراد ہلاک اور30 زخمی ہوگئے ۔جھڑپوں میں طوری اور بنگش قبائل کے علاوہ وزیرستان ،خیبر ایجنسی ،اورکزئی ایجنسی اور دیگر علاقوں سے بھی عسکریت پسند حصہ لے رہے ہیں ۔قبائل کا کہنا ہے کہ عسکریت پسندوں کی مداخلت اور حکومت کی خاموشی کے باعث جھڑپیں تیزی سے دیگر علاقوں میں پھیل رہی ہیں ۔19 روز سے جاری جھڑپوں میں ساڑے چار سو سے زائد افراد ہلاک اور سات سو کے قریب زخمی ہوچکے ہیں ۔علاقے میں جھڑپوں ،کشیدہ صورتحال اور شاہراہوں پر عسکریت پسندوں کے قبضے کے باعث گزشتہ ایک سال سے آمد ورفت کے راستے بند ہیں،جس کے باعث پانچ لاکھ سے زائد آبادی پاراچنار اور ملحقہ علاقوں میں محصور ہو کر رہ گئی ہے اورعلاقے میں تیل ،اشیائے خوردونوش اور ادویات کا ذخیرہ ختم ہوگیا ہے ۔