موجودہ حالات میں پسند کے ججز کو بحال کیا جارہا ہے جس سے معاہدہ مری کو بگاڑا جارہا ہے یہ صورتحال قطعی ناقابل قبول ہے
ججز کی بحالی کا یہ طریقہ کار سول سوسائٹی اور وکلا کو بھی قبول نہیں ہوگا
مسلم لیگ (ن) کے سربراہ کی نجی ٹی وی سے گفتگو
اسلام آباد ۔ مسلم لیگ نواز کے قائد محمد نواز شریف نے کہا ہے کہ پاکستان پیپلزپارٹی کے ساتھ دوبارہ اتحاد کی کوئی بات نہیں ہورہی، موجودہ حالات میں پسند کے ججز کو بحال کیا جارہا ہے جس سے معاہدہ مری کو بگاڑا جارہا ہے، اور یہ صورتحال قطعی ناقابل قبول ہے۔ ایک نجی ٹی وی سے گفتگو کرتے ہوئے میاں نواز شریف نے کہا کہ ججز کی بحالی کا یہ طریقہ کار سول سوسائٹی اور وکلا کو بھی قبول نہیں ہوگا۔ انھوں نے کہا کہ مسلم لیگ نواز فی الحال اے پی ڈی ایم میں شامل ہونے پر غور نہیں کررہی۔ میاں نواز شریف نے بتایا کہ ان کی جماعت نے سینیٹ میں بھی اپوزیشن بینچز کیلئے درخواست دیدی ہے۔ میاں نواز شریف نے کہا کہ مسلم لیگ نواز پیپلز پارٹی کی حکومت ختم کرانے کی کوئی کوشش نہیں کرنا چاہتی۔ انھوں نے کہا کہ ججزکی بحالی کا وعدہ پورانہیں کیا گیا، سترہویں ترمیم ختم نہیں ہوئی، عدلیہ کا تقدس بحال نہیں ہوا، یہی وجوہات تھیں کہ اتحاد سے نکلنا پڑا۔ نواز شریف نے کہا کہ وہ آصف علی زرداری کی بہت عزت اور احترام کرتے ہیں لیکن قومی ایشوز پر مصلحت پسندی سے کام نہیں لے سکتے۔
0 responses so far ↓
تبصرہ کریں
Leave a Comment