محکمہ ریونیو نے بغیر کسی مزاحمت کے قبضہ ختم کرا کے سیڈ فارم محکمہ زراعت کے حوالے کردیا
ہمارا اس اراضی سے کوئی تعلق نہیں ، الاٹ منٹ کے وقت قانونی تقاضے پورے کئے گئے تھے
لوگوں نے اس پر فصلیں کاشت کی ہیں وہ اب عدالت سے رجوع کریں گے ، مولانا لطف الرحمان
ڈیرہ اسماعیل خان ۔ صوبہ سرحد میں اے این پی کی حکومت کی ہدایت پر محکمہ ریونیو نے ڈیرہ اسماعیل خان کے علاقے راکھ زندانی میں جے یو آئی ( ف ) کے سربراہ اور قومی کشمیر کمیٹی کے چےئرمین مولانا فضل الرحمان سے منسوب محکمہ زراعت کے سیڈ فارم کا قبضہ بغیر کسی مزاحمت کے واگزار کرا کے اسے محکمہ زراعت کے حوالے کردیا۔ اس سے قبل ڈیرہ اسماعیل خان میں ڈسٹرکٹ ریوینو آفیسر نے راکھ زندانی محکمہ زراعت کے سیڈ فارم سے قبضہ ختم کرانے کے لئے قابضین کے وارنٹ جاری کیے تھے۔جس پر محکمہ ریوینو کے اہلکار نے وہاں پہنچ کر قبضہ ختم کرایا اور کاغذی کارروائی کی تکمیل کے بعد اسے محکمہ زراعت کے حوالے کردیا۔ اس موقع پر کوئی مزاحمت دیکھنے میں نہیں آئی۔ دوسری جانب مولانا فضل الرحمان کے بھائی مولانا لطف الر حمان کاکہنا ہے ان کایا ان کے خاندان کے کسی فرد کا اس اراضی سے کوئی تعلق نہیں ہے ۔انہوں نے کہا کہ اس زمین کی الاٹمنٹ کے وقت تمام قانونی تقاضے پورے کئے گئے تھے ۔ اب ان لوگوں کی یہاں پر کاشت کی گئی فصلیں موجود ہیں اور اب وہ اس کیخلاف عدالت سے رجوع کرینگے۔ واضح رہے کہ راکھ زندانی میں 342ایکڑ اراضی 2006ء میں مختلف لوگوں کو الاٹ کی گئی تھی،جسے منسوخ کردیا گیاتھا۔یہ زمین لورالائی اور بعض دیگر علاقوں کے افراد کو الاٹ کی گئی تھی۔بعض حوالوں اور محکمہ زراعت کے مطابق بعض حوالوں سے یہ لوگ مولانا فضل الرحمان کے قریبی جانے جاتے ہیں۔ محکمہ زراعت کا کہنا ہے کہ راکھ زندانی یہ زمین سیڈ بنک کے طور پر استعمال کی جاتی تھی جس سے لاکھوں روپے کا ریوینو اکٹھا کیا جاتا تھا۔
0 responses so far ↓
تبصرہ کریں
Leave a Comment