Urdu News - Online Urdu News Paper

بڑی کابینہ مسائل کا حل نہیں عوامی پیسہ عوام پر لگنے سے غریبوں کو ریلیف ملے گا

ملک میں تبدیلی لانے کے لیے تعلیم اور عدالتوں کانظام بہتر بنانا ہو گا

پاکستان تحریک انصاف کے سربراہ کا طلبہ سے خطاب

اسلام آباد ۔ پاکستان تحریک انصاف کے سربراہ عمران خان نے کہاہے کہ وفاقی کابینہ میں چالیس نئے وزراء رکھ کر قومی خزانے کو ضائع کیاجارہا ہے اتنی بڑی کابینہ سے مسائل حل نہیں ہوں گے ۔عوام کا پیسہ عوام پر لگنے سے غریبوں کو ریلیف ملے گا حکمران صرف دلاسے دے رہے ہیں اپنے اثاثے بیرون ملک رکھ کر دنیا سے بھیک مانگی جارہی ہے صدر ایک طرف سعودی عرب ملک کیلئے بھیک مانگنے گئے ہیں دوسری جانب 200لوگوں کا وفد ساتھ جاکر ٹیکس کا پیسہ بے دریغ طریقے سے اڑایا جا رہا ہے ان خیالات کا اظہار عمران خان نے محمد علی جناح یونیورسٹی میں بدھ کے روز طلباء و طالبات سے خطاب کرتے ہوئے کیا انہوں نے کہاکہ ہمارا روپیہ روز بروز ڈالر کے مقابلے میں گرتا جارہاہے ۔ایک روپیہ گرنے سے ملک مزید پینتالیس ارب روپے کا مقروض ہو جاتاہے انہوں نے کہاکہ تمام صاحب اقتدار لوگوں کا پیسہ ملک سے باہر پڑا ہے اور پوری دنیا سے بھیک مانگی جارہی ہے بیرون ملک مقیم پاکستانیوں کو سہولیات دے کر ان کا پیسہ ملک میں لایا جائے کسی سے بھیک مانگنے کی ضرورت نہیں پڑے گی تحریک انصاف کے سربراہ عمران خان نے کہاکہ ملک میں تبدیلی لانے کے لئے تعلیم اور عدالتوں کا نظام بہتر کرنے کی ضرورت ہے انہوں نے کہاکہ جب انسان کو علم ملتا ہے تو اس میں ہتھیاروں سے زیادہ طاقت آ جاتی ہے اور وہ کسی سے مرعوب نہیں ہوتا انہوں نے کہاکہ آزاد عدلیہ کے بغیر انصاف کاحصول نا ممکن ہے ایک جج کو پورے ملک میں سب سے زیادہ تنخواہ اور مراعات دینی چاہیں تاکہ کوئی بھی اسے لالچ نہ دے سکے اور سب کیلئے انصاف برابر ہو یہ نہ ہو صدر کیلئے قانون اور ، اور غریب عوام کیلئے اور قانون ہو ۔ انہوں نے کہاکہ چیف جسٹس افتخار چوہدری کی آواز بلند ہونے سے آزاد عدلیہ کی بات کھل کر سامنے آگئی ہے کرپٹ وکیل اور ایماندار وکیل دونوں کھل کر سامنے آ گئے ہیں انہوں نے کہاکہ کرپٹ سیاستدان اور ملٹری ڈکٹیٹر کبھی بھی عدلیہ کو آزاد نہیں ہونے دیں گے عدلیہ آزاد ہو گئی تو الیکشن آزاد ہوں گے اور صحیح جمہوریت آئے گی امریکہ کے پٹھو کبھی عوام کی خدمت نہیں کریں گے۔ عمران خان نے کہاکہ کمانڈو کانام تو سناتھا لیکن مشرف جیسا بزدل کمانڈو کہیں نہیں دیکھا جو اقتدار سے الگ ہوتے ہی چھپ کر بیٹھ گیا ہے انہوں نے کہاکہ پہلے وہ ہمیں اسمبلی میں مکے دکھاتا تھا پھر امریکہ جا کر ان کی غلامی کرتا تھا آخر میں چوروں کو ہم پر مسلط کر کے بھاگ کھڑا ہوا ہے۔