Urdu News - Online Urdu News Paper

تحریک انصاف ہر معاذ پر عدلیہ کی آزادی اور چیف جسٹس افتخار محمد چودھری کی بحالی کی جنگ لڑ رہی ہے اور لڑتی رہے گی

آصف علی زرداری امریکہ، چین، سعودی عرب اور آئی ایم ایف کے سامنے کشکول پھیلانے کی بجائے اپنے بیرون ممالک میں پڑے تمام اثاثے ملک میں لاکر جراتمندی کا مظاہر ہ کریں

تحریکِ انصاف کے چیئرمین کا تقریب سے خطاب

حضرو ۔ پاکستان تحریک انصاف کے چیئرمین عمران خان نے کہا ہے کہ جب تک پاکستان میں قانون کی حکمرانی قائم نہیں ہو جاتی ملکی سلامتی اور بقا کا مسئلہ برقرار رہے گا، تحریک انصاف ہر معاذ پر عدلیہ کی آزادی اور چیف جسٹس افتخار محمد چودھری کی بحالی کی جنگ لڑ رہی ہے اور لڑتی رہے گی،صدر آصف علی زرداری ایک طرف اپنے خرچ پر 200افراد کو عمرہ کی ادائیگی کیلئے لے جاتے ہیں تو دوسری طرف کشکول سعودی فرمانرواؤں کے سامنے رکھ دیتے ہیںوہ امریکہ، چین، سعودی عرب اور آئی ایم ایف کے سامنے کشکول پھیلانے کی بجائے اپنے بیرون ممالک میں پڑے تمام اثاثے ملک میں لاکر جراتمندی کا مظاہر ہ کریں تاکہ دیگر ہم وطن بھی اس کی تقلید کرسکیں اور ان کا اعتماد بھی بحال ہو، ان خیالات کا اظہار انہوں نے آج پیرس میں منعقدہ ایک تقریب سے خطاب کرتے ہوئے کیا، ایک رپورٹ کے مطابق عمران خان نے مزید کہا کہ حکومت مکمل طور پرناکام ہو چکی ہے اور ملک کی اس وقت حالت یہ ہے کہ بجلی ہے نہ آٹا اور نہ ہی کوئی زرمبادلہ، غریب عوام غربت کی چکی میں پس رہے ہیں اور ان سے صرف ایک لیٹر پیٹرول سے40روپے ٹیکس وصول کیا جارہا ہے،انہوں نے کہا کہ کھانے پینے کی اشیاء کی قیمتوں میں 30فیصد اضافہ کیا جارہا ہے جس وجہ سے غریب اپنے بچوں سمیت خودکشیوں پر مجبور ہیں، تحریک انصاف کے چیئرمین نے عدلیہ کے حوالہ سے کہا کہ پاکستان تحریک انصاف اس وقت تک چین سے نہیں بیٹھے گی جب تک ملک میں قانون کی حکمرانی بحال نہیں ہو جاتی اور اقتدار میں آکر ہم سب سے پہلے عدلیہ کو ہی مضبوط کریں گے، انہوں نے کہا کہ قبائلی علاقوں میں آپریشن کی بجائے مذاکرات کئے جائیں، انہوں نے کہا کہ بیرون ممالک مقیم پاکستانیوں کو ووٹ کے استعمال کا حق ملنا چاہئے کہ اوورسیز پاکستانیز ملک کا قیمتی اثاثہ ہیں، عمران خان نے کہا کہ صدر زرداری قوم کو ایمانداری سے بتائیں کہ ان کے پاس کتنی دولت ہے اور وہ کتنا ٹیکس ادا کرتے ہیں۔