Urdu News - Online Urdu News Paper

٭۔ ۔ ۔ عدلیہ آزاد ہوگی تو عوام خوشحال ہوں گے، امیروں سے ٹیکس لے کر غریبوں پر خرچ کریں گے

لاہور۔ پاکستان تحریک انصاف کے چیئرمین عمران خان نے کہا ہے کہ آئی ایم ایف کا قرضہ غریب عوام کو کچل دے گا۔ حکمرانوں نے ایک طرف اپنا پیسہ بیرون ملک رکھا ہوا ہے اور دوسری طرف بھیک مانگ رہے ہیں۔ دو دو سو افراد کو عمرہ پر لے جایا جارہا ہے۔ جبکہ میں نے جتنا پیسہ کمایا اپنے ملک واپس لے کر آیا میرے بیرون ملک کوئی اثاثے نہیں ہیں۔ 55وزیر بھرتی کرلئے گئے ہیں۔ ایک وزیر پر ڈیڑھ کروڑ روپے خرچ آتا ہے۔ ان خیالات کا اظہار انہوں نے مینار پاکستان پر پارٹی ممبر شپ مہم کے آغاز کے موقع پر پارٹی عہدے داروں اور کارکنوں سے خطاب کرتے ہوئے کیا۔ عمران خان نے کہا کہ حکمران قربانی دینے کی بجائے الٹا عوام سے قربانی مانگتے رہے ہیں۔ اب وقت آگیا ہے کہ پاکستانی نوجوانوں کو اپنے مستقبل کی جنگ لڑنا ہے۔ انہوں نے کہاکہ بھیک مانگنے والے ملک نہیں بچا سکتے۔ پاکستان کا لیڈر خوددار ہونا چاہئے۔ عمران خان نے کہا کہ ان کی پارٹی معاشی اور عدالتی اصلاحات کرکے غریب عوام کو انصاف مہیا کرے گی اور یہ معزول چیف جسٹس افتخار محمد چودھری کی بحالی سے ہی ممکن ہوگا۔ عدلیہ آزاد ہوگی تو عوام آزاد ہوں گے۔ عدلیہ غلام ہوگی تو عوام بھی غلام ہوں گے۔ انہوں نے کہاکہ وہ تعلیمی ایمرجنسی نافذ کرکے تعلیم کا طبقاتی نظام ختم کریں گے اور سب کیلئے ایک جیسا تعلیمی نظام رائج ہوگا۔ امیروں سے ٹیکس لیں گے غریبوں پر خرچ کریں گے۔ عمران خان نے کہا انصاف کے بغیر پاکستان نہیں بچے گا۔ جس ملک کے بڑے عہدوں پر مجرم بیٹھے ہوں وہ ملک کیسے بچ سکتا ہے۔ تحریک انصاف پنجاب کے صدر احسن رشید نے کہا کہ پنجاب میں ممبر سازی کی مہم 30نومبر تک جاری رہے گی اور آئندہ چھ ماہ میں لاہور میں ایک لاکھ ممبر شپ اور پنجاب میں 50لاکھ ممبر شپ کی جائے گی۔ انہوں نے کہا کہ آئندہ الیکشن میں تحریک انصاف سب سے بڑی پارٹی بن کر ابھرے گی