Urdu News - Online Urdu News Paper

٭۔ ۔ ۔ امریکی حملوں پر عوامی زبان میں احتجاج نہیں کر سکتے وزیر اعظم کے اس بیان سے پاکستانیوں کے سر شرم سے جھک گئے

لاہور ۔ جماعت اسلامی پاکستان کے سیکرٹری جنرل سید منور حسن نے وزیر اعظم یوسف رضا گیلانی کے اس بیان پر کہ ’’ امریکی حملوں پر احتجاج نہیں کر سکتے ‘‘ پر تبصرہ کرتے ہوئے کہا ہے کہ پاکستان کے جمہوری حکمرانوں میں صدر حامد کرزئی جتنی ہمت بھی نہیں کہ وہ امریکہ سے پاکستانی سر زمین پر حملوں پر احتجاج کر سکیں، انہیں فوری بند کرنے کا مطالبہ کر سکیں اور مسائل کو مذاکرات سے حل کرنے کی راہ اپنا سکیں جبکہ کرزئی امریکی کٹھ پتلی صدر ہونے کے باوجود امریکہ اور مغرب سے کہہ رہا ہے کہ ’’ انہیں ملا عمر سے مذاکرات پسند نہیں تو افغانستان سے نکل جائیں ‘‘ ۔ اپنے بیان میں سید منور حسن نے کہا کہ واشنگٹن پوسٹ میں شائع ہونے والے پاکستان اور امریکہ کے درمیان خاموش معاہدے کی تفصیلات انتہائی شرمناک اور ذلت آمیز ہیں ۔ گو حکومت پاکستان کے ترجمان نے اس کی تردید کی ہے تاہم دال میں کچھ کالا ضرور ہے اور اس کی تصدیق وزیراعظم کے اس بیان سے بھی ہوتی ہے جس میں انہوں نے کہا کہ ’’ امریکی حملوں پر عوامی زبان میں احتجاج نہیں کر سکتے، اوباما کے آنے پر امریکی حملے بند ہو جائیں گے‘‘ ۔ وزیر اعظم کے اس بیان سے ظاہر ہوتا ہے کہ موجودہ بش حکومت سے تو ’’ خاموش معاہدہ ‘‘ طے ہے جس کی وجہ سے امریکی حملوں پر احتجاج نہیں کر سکتے، اوباما کی حکومت قائم ہو گی تو دوبارہ معاہدہ کیا جائے گا ۔