Urdu News - Online Urdu News Paper

اسلام آباد ۔ سابق وزیر اعظم اور مسلم لیگ ن کے قائد میاں محمد نواز شریف نے کہا ہے کہ پاکستان وہ واحد ملک ہے جو اپنی سرحدوں کی خلاف ورزی برداشت کر رہا ہے یہ بات انھوں نے ایک نجی ٹی وی سے خصوصی گفتگو کے دوران کہی۔ انھوں نے کہا کہ پاکستانی قوم تبدیلی چاہتی ہے اس نے 18فروری کو تبدیلی کے لیے ووٹ دیا پھر ہم نے سابقہ پالیسیوں کو جاری رکھا یہ ایسا ہی ہے کہ جیسا امریکی نو منتخب صدر اوبامہ انتخابات جیت کر یہ کہے کہ میں صدر بش کی پالیسیوں کو آگے بڑھاؤں گا میاں نواز شریف نے کہا کہ کتنے افسوس کی بات ہے کہ اب رہائشی علاقوں پر بھی بمباری ہو رہی ہے یہ پاکستان کی خود مختاری و سلامتی کی خلاف ورزی نہیں تو اورکیا ہے ۔ انھوں نے کہا کہ کونسا ملک یہ برداشت کر سکتا ہے میں سمجھتا ہوں کہ پاکستانی حدود کی خلاف ورزی بڑا سنجیدہ معاملہ ہے ۔ انھوں نے کہا کہ اس پر کوئی سیاست نہیں ہونی چاہیے اگر پاکستانی حدود کی اسی طرح خلاف ورزی جاری رہی تو پھر اسے روکنا مشکل ہو گا۔