Urdu News - Online Urdu News Paper

لاہور ۔ امیر جماعت اسلامی قاضی حسین احمد نے صوبہ سرحد میں سفارتکاروں کے اغوا و قتل کے بڑھتے ہوئے رجحان کی شدید مذمت کی ہے اور اسے غیر اسلامی فعل قرار دیا ہے۔ اپنے ایک بیان میں قاضی حسین احمد نے کہا کہ اسلام حالت جنگ میں بھی سفارتکاروں کو تحفظ کی ضمانت دیتا ہے،اور اس اصول کا تمام قومیں احترام کرتی ہیں،ایسا کرنے والے دشمنان دین و وطن ہیں۔انھوں نے کہا کہ بالخصوص ایران اور چین جیسے دوست ممالک کے سفارتکاروں اور باشندوں کا اغوا و قتل انتہائی شرمناک ہے،اور اس مکروہ فعل میں ملوث لوگ پاکستان کو اس کے دوستوں سے محروم اور دنیا میں تنہا کرنا چاہتے ہیں۔ سفارتکاروں کے اغواکے تسلسل کا مطلب یہ ہوگا کہ پاکستانی سفارتکار اور شہری پوری دنیا میں غیر محفوظ ہوجائیں۔قاضی حسین احمد نے کہا کہ اس عمل سے قوم،ملک اور صوبے کی بدنامی ہورہی ہے،اور یہ عمل پاکستان کو ناکام ریاست قرار دلوانے کے عمل کا حصہ ہوسکتا ہے۔ ان بڑھتے ہوئے واقعات سے دنیا میں پاکستان کے غیر محفوظ ملک ہونے کا تاثر شدت کے ساتھ ابھرے گااوردشمن اسے اپنے مقاصد کے لیے استعمال کرے گا۔ امیرجماعت اسلامی نے کہا کہ حکومت کی ذمہ داری ہے کہ وہ اس بات کاسراغ لگائے کہ یہ طالبان کررہے ہیں،پیشہ ور اغوار کار گروہ اس میںملوث ہیں یا پاکستان کی شبیہ خراب کرنے کی کوئی غیر ملکی سازش ہے۔ انھوں نے حکومت سے سفارتکاروں کو فوری بازیاب کرانے،انھیں مکمل تحفظ فراہم کرنے اور اس رجحان کے تدارک کا مطالبہ کیا ہے۔