Urdu News - Online Urdu News Paper

٭۔ ۔ ۔ اوباما کے آنے سے کوئی تبدیلی نہیں آئے گی، صیہونی اور متعصب نیو کونز سیاہ فام کو اپنے مقاصد کیلئے استعمال کرنا چاہتے ہیں

٭۔ ۔ ۔ قوم کو حقیقت میں آزادی نہیں ملی ہے انگریزوں نے جاتے ہوئے اسے اپنے غلاموں کے حوالے کردیا۔ نماز جمعہ کے اجتماع سے خطاب

لاہور۔ امیر جماعت اسلامی پاکستان قاضی حسین احمد نے کہا ہے کہ قبائلی علاقوں پر امریکی جارحیت میں حکومت اور فوج کی رضا مندی شامل ہے، ملی بھگت سے پاکستانیوں کا قتل عام ہو رہا ہے ۔امریکی سفیر کو دفترخارجہ طلب کرنا ڈرامہ ہے، زبانی کلامی احتجاج کی اجازت لی گئی ہے ۔ اوباما کے آنے سے کوئی تبدیلی نہیں آئے گی ۔ صیہونی اور متعصب نیو کونز سیاہ فام کو اپنے مقاصد کیلئے استعمال کرنا چاہتے ہیں ۔ ان خیالات کا اظہار انہوں نے جامع مسجد منصورہ میں نماز جمعہ کے اجتماع سے خطاب کرتے ہوئے کیا ۔ قاضی حسین احمد نے کہا کہ افغان سرحد پر پاک امریکہ مشترکہ فوجی آپریشن لائن ہارٹ سے واضح ہو گیا ہے کہ پاکستانی حکومت اور فوج امریکی جنگ لڑ رہی ہیں اور امریکی خوشنودی کیلئے اپنے لوگوں کو قتل کیا جارہا ہے ۔ انہوں نے کہا کہ امریکی میزائل سے دس آدمی قتل ہوتے ہیں مگر پاک فوج کی گہل باری سے سینکڑوں لوگ جاں بحق اور لاکھوں ہجرت پر مجبور ہوئے ہیں ۔ سوات اور مہمند سرچ آپریشن جاری ہے جس کی نگرانی ہیلی کاپٹر کرتے ہیں ۔ انہوں نے کہا کہ مہاجرین پہاڑوں میں 48 گھنٹے کا پیدل سفر کر کے پشاور اور چارسدہ پہنچتے ہیں مگر ان کی دیکھ بھال کا کوئی انتظام نہیں ہے ۔ انہوں نے کہا کہ چند غیر ملکیوں کے نام پر اپنے لوگوں کو قتلکرنا اور ملک اور فوج کے خلاف نفرت کے بیج بونا عقلمندی نہیں ہے ۔ انہوں نے کہا کہ اگرک ہیں کوئی غیر ملکی موجود ہے تو وہ پاکستان اور فوج کا مخالف نہیں ہے ۔ انہوں نے مقامی قبائل میں شادیاں کی ہیں اور اپنے خاندان کے ساتھ رہتے ہیں ۔ قاضی حسین احمد نے کہا کہ قوم کو حقیقت میں آزادی نہیں ملی ہے انگریزوں نے جاتے ہوئے اسے اپنے غلاموں کے حوالے کردیا جو ان کے مفادات کے نگہبان ہیں، صوبیدار جرنیل بن گئے اور کیپٹن نے چیف آف آرمی سٹاف بن کر ملک پر قبضہ کرلیا، تب سے فوج اپنی ہی قوم کو فتح کرتی چلی آرہی ہے دشمن کے سامنے اس کی توپیں خاموش ہیں ۔ انہوں نے کہا کہ سول و ملٹری اسٹیبلشمنٹ مغرب کی غلام ہے، قومی خود مختاری اس کے نزدیک کسی چیز کا نام نہیں ہے، انہیں استعماری مفادات کی حفاظت کی ذمہ داری دی گئی ہے جسے وہ پورا کر رہے ہیں ۔ انہوں نے کہاکہ نیٹو فورسز پاکستان پر مسلسل حملے کر رہی ہیں مگر بے حمیتی کا یہ عالم ہے کہ سارا اسلحہ اور ایمونیشن پاکستان کے راستے افغانستان پہنچتا ہے ۔ انہوں نے کہا کہ حکومت کی خاموشی عوام کو مجبور کر رہی ہے کہ وہ خود آگے بڑھ کر نیٹو کی سپلائی لائن کاٹ دیں ۔ قاضی حسین احمد نے کہا کہ وزیر اعظم کہہ رہے ہیں کہ اوباما کے آنے سے حملے رک جائیں ۔ یہ قوم کو دھوکہ دینے کے مترادف ہے ۔ امریکی انتظامیہ یہودیوں کے قبضے میں ہے وہ سیاہ فام کو آگے کر کے اسے اپنے مقاصد کیلئے استعمال کریں گے اور مسلمانوں پر زیادہ ظلم ڈھائیں گے ۔ قاضی حسین احمد نے ڈیرہ اسماعیل خان میں ہونے والے بم دھماکے کی شدید مذمت کی ہے اور کہا کہ صوبائی حکومت امن و امان قائم کرنے اور عوام کو تحفظ فراہم کرنے میں مکمل طور پر ناکام ہو گئی ہے ۔ انہوں نے جاں بحق ہونے والوں کی مغفرت اور زخمیوں کیلئے جلد صحتیابی کی دعا کی ہے