Urdu News - Online Urdu News Paper

راولپنڈی۔ مسلم لیگ ن کے چیئر مین راجہ محمد ظفر الحق نے پاکستانی علاقوں پر امریکی میزائل حملوں کو روکنے کے لئے نیٹو فورسز کو سپلائی بند کر نے اور پارلیمنٹ کے مشترکہ اجلاس کی قرار داد پر فوری عملدر آمد کا مطالبہ کیا ہے ان خیالات کا اظہار انہوں نے ایم ایس ایف پنجاب کے صدر بابر اعوان کی عیادت کے بعد ہولی فیملی ہسپتال کے باہر صحافیوں سے گفتگو کرتے ہوئے کیا اس موقع پر مسلم لیگ ن بلوچستان کے صدر سردار یعقوب ناصر مسلم لیگ ن پنجاب کے جوائنٹ سیکرٹری راجہ وحید محفوظ ، رکن پنجاب اسمبلی شہریار ریاض ،ضیاء اللہ شاہ ،ایم ایس ایف کے مرکزی سینئر نائب صدر ملک عدنان یعقوب ،ڈویژنل صدر مقبول احمد خان ،مسلم لیگ یوتھ ونگ کے ضلعی صدر تنویر اختر شیخ،نائب صدر آصف بٹ اور ضلعی اسمبلی کی رکن زیب النساء اعوان سمیت دیگر عہدیدار بھی موجود تھے۔ انہوں نے کہا کہ حملہ بنوں ،لاہور ،اسلام آباد یا کراچی میں ہو پاکستان کا ایک ایک انچ مقدس ہے اس وقت پاکستان کے 17 کروڑ عوام سخت پریشانی میں مبتلا ہیں حملوں کو روکنے کے لئے کوئی موثر سدباب نہیں کیا گیا ایک کمیٹی بنا دی گئی جس کا ایک اجلاس ہوا اور تاریخ ڈال دی گئی انہوں نے کہا کہ پارلیمنٹ کی مشترکہ اجلاس کی قرار داد پر فوری عملدر آمد ہو نا چاہیے تھا ورنہ یہ الزام لگتا رہے گا کہ شاید یہی طے ہوا ہے کہ وہ بمباری کرتے رہیں اور ہم صرف احتجاج تک محدود رہیں انہوںنے مزید کہا کہ صرف ایک دن نیٹو فورسز کی سپلائی بند ہو نے سے بہت فرق پڑا تھا اس لئے عملی سدباب ہو نا چاہیے انہوں نے کہا کہ ایک دفعہ شام کے ایک گاؤں پر حملہ ہوا تو وہاں کے عوام نے اتنا بڑا احتجاج کیا کہ اسرائیل کو دوبارہ جرات نہیں ہوئی کہ امریکہ سے کہہ کر کاروائی کرائے اس لئے اتنی بے بسی بھی نہیں ہونی چاہیے کہ ہم ظلم کے خلاف خاموش رہیں۔