Urdu News – Online Urdu News Paper

مردان، صوابی ۔ مردان اور صوابی کے کیمپوں سے نقل مکانی کرنے والے 360 خاندانوں کے مزید قافلے منگل کو سوات میں اپنے گھروں کو روانہ ہوئے۔ خصوصی امدادی گروپ کے چیئر مین لیفٹیننٹ جنرل ندیم احمد نے جلالہ کیمپ مردان میں ان افراد کو رخصت کیا۔ اس موقع پر صحافیوں سے باتیں کرتے ہوئے انھوں نے کہا کہ سوات میں بنیادی سہولتیں اور انتظامیہ بحال کر دی گئی ہے۔ بحالی اور تعمیر نو کے بارے میں جنرل ندیم نے کہا کہ تعمیر نو اور بحالی کا ایک جامع منصوبہ تیار کیا گیا ہے جس پر ڈھائی ارب ڈالر خرچ ہوں گے یہ منصوبہ اس سال اگست میں استنبول میں فرینڈ آف ڈیموکریٹک پاکستان کے اجلاس میں پیش کیا جائے گا۔ انھوں نے کہا کہ امداد دینے والے ادارے اور ممالک پاکستان کی مدد کے لیے تیار ہیں اے ٹی ایم کارڈز کے بارے میں لیفٹیننٹ جنرل ندیم نے کہا کہ اب تک ایک لاکھ 87 ہزار کارڈز جاری کئے جا چکے ہیں اسی طرح یار حسین شاہ منصور ، شیخ شہزاد اور شیخ یاسین کیمپوں کے 75 فیصد خاندانوں کو کارڈز مل چکے ہیں پشاور میں بے گھر افراد کو اے ٹی ایم کارڈز جاری کرنے کا عمل جمعرات سے شروع کیا جائے گا