Urdu News – Online Urdu News Paper

پشاور کے علاقے متنی کی منڈی مویشیاں میں خودکش دھماکے کے نتیجے میں 4 بچوں اور یونین ناظم سمیت 11 افراد جاں بحق ، 35 زخمی ہو گئے دھماکے کے نتیجے میں چھ گاڑ یاں بھی مکمل طور پر تباہ ہو گئیں
صدر ، و زیراعظم ، وزیر داخلہ ، وزیر اطلاعات و دیگر سیاسی و مذہبی جماعتوں نے اس واقعے کی شدید مذمت
وزیر داخلہ رحمان ملک نے آئی جی سرحد سے ا س واقعے کی رپورٹ طلب کر لی
ُپشاور ۔۔ صوبائی دارالحکومت پشاور کے علاقے متنی کی منڈی مویشیاں میں خودکش دھماکے کے نتیجے میں 4 بچوں اور یونین ناظم سمیت 11 افراد جاں بحق ، 35 زخمی ہو گئے ۔ دھماکے کے نتیجے میں چھ گاڑ یاں بھی مکمل طور پر تباہ ہو گئیں ۔ صدر ، و زیراعظم ، وزیر داخلہ ، وزیر اطلاعات و دیگر سیاسی و مذہبی جماعتوں نے اس واقعے کی شدید مذمت کی ہے ۔ وفاقی حکومت نے تحقیقات کے احکامات جاری کر دئیے ہیں جبکہ وزیر داخلہ رحمان ملک نے آئی جی سرحد سے ا س واقعے کی رپورٹ طلب کر لی ہے ۔ تعطیل کے باعث ہسپتال میں طبی امداد کی فراہمی میں مشکلات کا سامنا رہا۔ تفصیلات کے مطابق اتوار کے روز تقریبا پونے 10 بجے کے قریب متنی کی منڈی مویشیا ں میں ایک خودکش حملہ آور نے دلاور نامی شخص کو گلے لگا کر خود کو دھماکے سے اڑ ا لیا ۔ دلاور نامی شخص نے اس خودکش حملہ آور کو روکا تھا اور پوچھا تھا کہ کہاں جا رہے ہو۔ جس پر اس نے انہیں گلے لگا کر دھماکہ کر دیا ۔ اس وقت یونین ناظم اویزئی عبدالمالک اپنے ساتھیوں سمیت اس منڈی مویشیاں کے اتوار بازار میں موجود تھے ۔ دھماکے کے نتیجے میں یونین ناظم سمیت 11 افراد جاں بحق ہو گئے ۔ خود کش دھماکے میں ان کے قریبی رشتہ داروں کے جاں بحق ہونے کی اطلاعات ہیں۔ جاں بحق ہونے والوں میں ایک تین سالہ بچی سمیت 4 بچے بھی شامل ہیں۔ یونین ناظم اویزئی عبدالمالک اس واقے میں زخمی ہوئے تھے تاہم وہ زخموں کی تاب نہ لاتے ہوئے لیڈی ریڈنگ ہسپتال میں دم توڑ گئے ۔ یونین ناطم عبدالمالک پر اس سے قبل بھی دو حملے ہو چکے ہیں ۔ انہوں نے عسکریت پسندوں کے خلاف لشکر بنانے کے لیے حکومت کے ساتھ تعاون کیا تھا۔ انہیں عسکریت پسندوں کی جانب سے دھمکیاں بھی دی گئی تھیں ۔ متنی خودکش دھماکے کے بعد کوہاٹ ٹنل کو ہر قسم کی ٹریفک کیلئے بند کر دیا گیا ہے ۔ جبکہ کئی گھنٹوں تک کوئی حکومتی عہدیدار بھی جائے وقوعہ اور ہسپتال نہ پہنچ سکا ۔ صدر آصف علی زرداری ، وزیراعظم سید یوسف رضا گیلانی ، وزیر داخلہ رحمان ملک ، وزیر اطلاعات و نشریات قمر زمان کائرہ نے اس واقعے کی شدید مذمت کرتے ہوئے کہا کہ حکومت کے ان واقعات سے حوصلے پست نہیں ہوںگے ۔ دہشت گردی کے ان واقعات میں ملوث عناصر ملک کو غیر مستحکم کرنا چاہتے ہیں۔ دہشت گردوںکے مذموم عزائم کامیاب نہیں ہوں گے حکومت دہشت گردی کے خلاف کار روائی جاری رکھے گی ۔

اوپر والی خبر سے ملتی جلتی خبریں دیکھیں

• حیات آباد فیز 2 پشاور میں ریسٹورنٹ کی کار پارکنگ میں دھماکہ ، 15 افراد زخمی ، 2 کی حالت تشویشناک
• بڈھ بیر دھماکہ ریموٹ کنٹرول کے ذریعے کیا گیا، بم ڈسپوزل اسکواڈ
• پشاور، قصہ خوانی بازار میں 2 دھماکے، 5 افراد جاں بحق، 60 زخمی ۔۔اپ ڈیٹ
• پشاور۔ پاک فضائیہ کے بیس کیمپ پرراکٹوں سے حملہ
• پشاور صدر بازار میں دھماکا،9 ہلاک،70 زخمی ۔۔۔اپ ڈیٹ