Urdu News-Online Urdu Newspaper

کراچی۔ لیاری کے مختلف علاقوں میں جاری پولیس اور رینجرز کے مشترکہ سرچ آپریشن کے خلاف لیاری کے سینکڑوں افراد نے ڈگری کالج کے باہر احتجاج کیا اور پیپلز پارٹی کے خلاف شدید نعرے بازی کی۔مظاہرے میں خواتین کی بڑی تعداد شریک تھی جو وفاقی وزیرداخلہ رحمن ملک اور دیگر حکومتی عہدیداروں کے خلاف نعرے بازی کر رہی تھی۔ مشتعل مظاہرین نے ٹائر جلا کر سڑکیں بلاک کردیں۔ مظاہرین کا کہنا تھا کہ قانون نافذ کرنیوالے اداروں نے گھر وں میں بے گناہ افرادکو حراست میں لیا ہے۔ مظاہرین نے حکومت سے مطالبہ کیا کہ لیاری میں آپریشن کو فوری بند کیاجائے اوربے گناہ افراد کو رہاکرکے اصل ملزمان کوگرفتارکیا جائے۔ دوسری جانب وفاقی وزیرداخلہ رحمن ملک نے کہا ہے کہ جرائم پیشہ افراد کے خلاف بلا تفریق کاررائی کی جائے گی اوراس سلسلے میں کسی قسم کا کوئی بھی دباؤ برداشت نہیں کیا جائے گا۔ پاک کالونی اور لیاری سمیت کراچی کے مختلف علاقوں کے ہنگامی دورے کے موقع پر انہوں نے کہا کہ لیاری کو جلد جرائم پیشہ افراد سے پاک کردیا جائے گا۔ انہوں نے کہا کہ گینگ وار نہ لسانی فسادات کی سازش ہے اور نہ ہی سیاسی بلکہ یہ چند جرائم پیشہ افراد کے مفاد کی جنگ ہے جس میں سب سے زیادہ نقصان عام شہریوں کو اٹھانا پڑ رہا ہے۔ رحمان ملک نے کہا کہ کراچی میں ٹارگٹ کلنگ کے واقعات کو کسی صورت بھی برداشت نہیں کیا جاسکتا اور ان واقعات میں ملوث افراد کے خلاف بلا تفریق کارروائی کی جائے گی۔ اس موقع پر رینجرز کے اعلیٰ حکام وفاقی وزیر داخلہ کے ہمراہ تھے۔ اپنے دورے میں رحمن ملک نے مقامی افراد سے ملاقات بھی کی اور ان سے امن وامان کی صورتحال کے متعلق معلومات بھی حاصل کیں

اس خبر سے ملتی جلتی خبریں دیکھیں

• کراچی‘ ٹارگٹ کلنگ میں مزید 8 افراد ہلاک ،چارروز میں تعداد27 ہوگئی
• کراچی:نامعلوم افراد کی فائرنگ سے خاتون سمیت3افراد جاں بحق
• کراچی ‘ ہلاکتوں میں اضافہ ‘ حالات بدستور کشیدہ
• کراچی ‘ ہلاکتوں میں اضافہ ‘ اورنگی میں دفعہ ایک سو چوالیس نافذ ۔۔اپ ڈیٹ
• کراچی ‘ کلفٹن میں مسلح افرادکی پولیس پارٹی پرفائرنگ،2 افرادہلاک ،2زخمی