شریف برادران 24 مارچ تک پیپلز پارٹی کے خلاف بولنے کی جرات نہیں کر سکتے
ن لیگ کے موجودہ دو سال اور ان کی پچھلی حکومتوں کا موازنہ کر لیں ہماری حکومت نے پنجاب میں ان تمام کی نسبت زیادہ کام کیے
گجرات۔پاکستان مسلم لیگ کے سینئر مرکزی رہنما چودھری پرویزالٰہی نے کہا ہے کہ شریف برادران 24 مارچ تک پیپلزپارٹی کے خلاف بولنے کی جرأت نہیں کر سکتے جب تک گجرات میں ضمنی الیکشن نہیں ہوتا انہیں پیپلزپارٹی میں ہر اچھائی نظر آتی رہے گی۔ انہیں پنجاب کے عوام کا جو دکھ اور درد ہے اس کا اندازہ اس بات سے بخوبی ہو جاتا ہے کہ بلڈ پریشر وزیراعلیٰ نے پنجاب کو دیوالیہ کر دیا ہے۔ انہوں نے کپور فیملی کے پیپلزپارٹی کو چھوڑ کر پاکستان مسلم لیگ میں شمولیت کے اعلان کا خیرمقدم کرتے ہوئے اسے خوش آئند قرار دیا۔ وہ گجرات میں ایک بڑے انتخابی جلسہ سے خطاب کر رہے تھے جس سے امیدوار میاں عمران مسعود، کامل علی آغا، سابق رکن پنجاب اسمبلی سلیم بریار، شیخ محمد رفیق، مرکزی صدر انجمن تاجران خاور بشیر بٹ، افضل کپور اور میاں پرویز اختر پگانوالہ سابق ناظم نے بھی خطاب کیا۔ چودھری پرویزالٰہی نے کہا کہ گجرات الیکشن میں شریف برادران کا اصل چہرہ سامنے آ گیا ہے۔ گجرات میں ضمنی الیکشن کے بعد شریف برادران پھر آصف زرداری کو ہدف تنقید بنائیں گے۔ شریف برادران منافقت کی سیاست کرتے ہیں ہم نے ان کو بہت قریب سے دیکھا ہے۔ عام آدمی بھی کوئی بات کرنے سے پہلے سوچتا ہے کہ لوگ کیا کہیں گے مگر نواز شریف اور شہباز شریف کو مکرنے کا کوئی ملال نہیں ہوتا۔ نواز شریف 17ویں ترمیم پر لوگوں کو بیوقوف بنا رہے ہیں جب ان کے پاس دو تہائی اکثریت تھی اس وقت یہ تمام اعلیٰ عہدیدار اپنی مرضی سے مقرر کرتے تھے تب انہوں نے عوام کی کیا خدمت کی؟ عوام کی فلاح و بہبود کیلئے انہوں نے پہلے اور اب کوئی کام نہیں کیا۔ ن لیگ کے موجودہ دو سال اور ان کی پچھلی حکومتوں کا موازنہ کر لیں ہماری حکومت نے پنجاب میں ان تمام کی نسبت زیادہ کام کیے۔ لاہور سے وزیروں، مشیروں کی فوج شاید لاہور میں ہونیوالے دھماکوں سے اپنی جان بچانے کیلئے یہاں ڈیرے جمائے ہوئے ہے اور یہ ڈر کے مارے لاہور نہیں جارہے۔ انہوں نے کہا کہ جاتی امراء والوں کو گجرات کا کیا درد ہو سکتا ہے۔ انہوں نے تو ملتان کے ترقیاتی فنڈز بھی جاتی امراء میں لگا دئیے ہیں ہم نے ہر کام غریبوں کی بھلائی کیلئے کیا۔ انہوں نے ہماری دی گئی سہولتیں بھی ختم کر دیں۔ تمام اچھے لوگ بلڈ پریشر وزیراعلیٰ کے تحت کام کرنے کو تیار نہیں۔ یہ کیسا وزیراعلیٰ ہے جس کو دھماکوں کی انفارمیشن پہلے مل گئی لیکن ان کو کنٹرول نہ کر سکا۔ انہوں نے کہا کہ اگر آپ ملک اور صوبے میں تبدیلی چاہتے ہیں تو میاں عمران مسعود کو بھاری اکثریت سے کامیاب کرائیں۔ اللہ تعالیٰ نے ہمیں دوبارہ موقع دیا تو ایک بار پھر ہم دوائیاں اور تعلیم مفت کرنے کے علاوہ عوام کی ترقی و خوشحالی کیلئے انقلابی اقدامات کریں گے۔ چودھری پرویزالٰہی نے کہا کہ پاکستان مسلم لیگ نے خواتین کیلئے بلدیاتی اداروں، صوبائی اسمبلیوں، سینیٹ اور قومی اسمبلی میں نشستیں بڑھائیں، خواتین کیلئے نوکریوں کا کوٹہ مختص کیا اس لیے خواتین کا بھی فرض بنتا ہے کہ وہ پاکستان مسلم لیگ کو ووٹ دیں۔ قائداعظم نے اقلیتوں کو دہرے ووٹ کا جو حق دیا تھا پاکستان مسلم لیگ کی حکومت نے دوبارہ انہیں یہ حق دیا۔