Urdu News

Urdu News…The 3rd Largest Online Urdu Newspaper

Urdu News header image 2

پاکستان اور اسامہ بن لادن نظریاتی طور پر ایک ہیں،بھارتی سازشوں بارے وکی لیکس کا انکشاف

February 7th, 2011 · No Comments · دنیا کی خبریں, پاکستان, ہندوستان

پاکستان کی اسٹبلشمنٹ خطے کی سلامتی کیلئے سب سے بڑا خطرہ بنی ہوئی ہے‘ ڈاکٹر اجیاسہنی
امریکا نے پرویز مشرف پر ضرورت سے زیادہ اعتبار کیا جس کی وجہ سے کافی نقصان اٹھانا پڑا‘ سابق سربراہ ’’ را‘ ‘ اے ایس د لت
آئی ایس آئی چند مشہور دہشتگردوں کو گرفتار کرکے امریکا کو بے وقوف بنارہی ہے جبکہ اسامہ بن لادن کو آزاد چھوڑ رکھا ہے
علی محمد جان اورکزئی کو صوبہ سرحد کا گورنر بنانے پر سابق بھارتی سفیر گوپال سوامی نے کہا کہ وہ امریکا سے شدید نفرت کرتا ہے

نئی دہلی ‘ بھارت نے دہشتگردی کا سارا ملبہ پاکستان پر ڈالنے کا کوئی موقع ہاتھ سے جانے نہیں دیا۔ وکی لیکس نے بھارتی حکام کی امریکیوں سے ملاقات میں الزام تراشیوں کا بھانڈہ پھوڑا ہے۔ بھارتی عہدیداروں نے پاکستانی اسٹبلشمنٹ کو تو خطے کی سلامتی کیلئے سب سے بڑا خطرہ قرار دیا ہے ساتھ یہ بھی الزام لگایا کہ پاکستان امریکا کے افغانستان میں ناکام ہونے کا انتظار کررہا ہے۔18 دسمبر 2006 کو نئی دہلی میں پولیٹیکل قونصلرٹید اوسیئس نے واشنگٹن کو مراسلہ بھیجا جس میں 7 دسمبر کو بھارتی ماہرین اور سابق عہدیداروں کی انسداد دہشتگردی کے ڈپٹی معاون ورجینیا پالمر اور دیگر امریکی حکام سے ملاقات کی تفصیل بتائی گئی۔ اس ملاقات میں پاکستان کیلئے سابق بھارت ی سفیر گوپال سوامی پرتھاسراتھی بھی شریک تھے جو اس وقت افغانستان میں قیام سے متعلق بھارتی کمیٹی کے ماہر کے طور پر خدمات انجام دے رہے تھے۔ امریکی عہدیداروں سے ملاقات میں انسداد دہشت گردی کے ماہر ڈاکٹر اجیاسہنی نے الزام عائد کیا کہ پاکستان کی اسٹبلشمنٹ خطے کی سلامتی کیلئے سب سے بڑا خطرہ بنی ہوئی ہے۔ ان کا کہنا تھا کہ پاکستان اور اسامہ بن لادن نظریاتی طور پر ایک ہیں۔ طالبان پاکستان کی اسٹریٹیجک دہشتگردی سے جڑے ہیں۔ اس موقع پر بھارتی خفیہ ایجنسی’’ را‘ ‘کے سابق سربراہ اے ایس د لت نے کہا کہ امریکا نے پرویز مشرف پر ضرورت سے زیادہ اعتبار کیا جس کی وجہ سے کافی نقصان اٹھانا پڑا۔’ ’را‘ ‘ سابق سربراہ کا کہنا تھا کہ اگر امریکا افغانستان اور بھارت میں پاکستان کی جانب سے ریاستی دہشتگردی بند کرانا چاہتا ہے تو اسے پرویز مشرف پر دباؤڈالنا ہوگا۔ پاکستان کی خفیہ ایجنسی آئی ایس آئی کے بارے میں ڈاکٹر اجیاسہنی نے کہا کہ اگرچہ یہ آرگنائزیشن پاکستان کے فوجی ڈھانچے کا ایک ڈسپلن حصہ ہے لیکن آئی ایس آئی چند مشہور دہشتگردوں کو گرفتار کرکے امریکا کو بے وقوف بنارہی ہے جبکہ اسامہ بن لادن کو آزاد چھوڑ رکھا ہے۔ علی محمد جان اورکزئی کو صوبہ سرحد کا گورنر بنانے پر پاکستان میں سابق بھارتی سفیر گوپال سوامی نے کہا کہ وہ امریکا سے شدید نفرت کرتا ہے۔ بھارتی ماہرین نے امریکی عہدیداروں سے ملاقات میں پاکستان پر توجہ مرکوز رکھی جبکہ افغانستان میں امریکا کو لمبے عرصے تک ٹہرانے پر بھی زور دیا۔

Tags:

No Comments so far ↓

There are no comments yet...Kick things off by filling out the form below.

Leave a Comment