Category Archives: ہندوستان

بھارتی سیکورٹی فورسز مقبوضہ کشمیر کی موجودہ مخدوش صورتحال پر قابو پانے میں نا کام ہو چکی ہیں ۔بھارتی آرمی چیف کا اعتراف

اسلام آباد ‘ بھارتی آرمی چیف نے اعتراف کیا ہے کہ بھارتی سیکورٹی فورسز مقبوضہ کشمیر کی موجودہ مخدوش صورتحال پر قابو پانے میں نا کام ہو چکی ہیں ۔ بھارتی ٹی وی کو انٹرویو کے دوران جنرل وی کے سنگھ کا کہنا تھا کہ کچھ عرصہ سے مقبوضہ کشمیر میں امن وامان کی صورتحال انتہائی کشیدہ ہے جس کے پیچھے بہت سے محرکات کار فرما ہیں۔اس کی بنیادی وجہ یہ بھی ہے کہ ہم وادی کے مقامی لوگوں کا اعتماد حاصل کرنے میں نا کام رہے ہیں۔ وی کے سنگھ کا کہنا تھا کہ بھارتی فوج کشمیر کی کشیدہ صورتحال کوکنٹرول کرنے میں مکمل کامیابی حاصل نہیں کر سکی اور وادی میں امن قائم کرنے کے لیے مزید اقدامات کرتا ہوں گے ۔ بھارتی افواج کے حوالے سے ان کا کہنا تھا کہ بھارتی فوج نے اس ضمن میں بڑا کام کیا ہے جس کی وجہ سے امن قائم کرنے میں کسی حد تک کامیابی ملی ہے جبکہ مزید بہتری کے لیے اقدامات کرنا ہوں گے ۔ وی کے سنگھ کا کہنا تھا کہ بھارتی فوج کو ان عناصر کے خلاف اقدامات کرنا ہوں گے جو احتجاج کرنے والوں کو ٹیلیفون پر ہدایات دیتے ہیں ان کی نشاندہی کی جانی چاہیے۔ وی کے سنگھ کا کہنا تھا کہ احتجاج کرنے والوں کی مالی معاونت کرنے والوں کی بھی نشاندہی کی جانی چاہیے ان کا کہنا تھا کہ مقامی منتخب نمائندوں کو چاہیے کہ وہ عام آدمی کا اعتماد حاصل کریں اور انہیں احتجاج کرنے والے عناصر سے دور رکھیں۔ بھارتی چیف کا کہنا تھا کہ 11 جون سے تشدد کا خاتمہ کرنے کے لیے وادی کے مختلف حصوں میں بڑے پیمانے پر فوج تعینات کی گئی ہے

Share

ماؤ نواز باغیوں کی دو روزہ ’’ بھارت بند ‘‘ ہڑتال دوسرے روز بھی جاری ‘ حملے میں کانگریس راہنما کے 2 رشتہ دار ‘ 6 باغی ہلاک

پولیس سٹیشن ‘ ریلوے سٹیشن اور ٹریکس پر بھی حملے ‘ عمارتیں تباہ ‘ ٹرینوں کی آمد و رفت معطل
نئی دہلی ‘ بھارت میں ماؤ نواز باغیوں نے اپنے ترجمان چیرکوری راج کمار کی پولیس کے ہاتھوں ہلاکت کے خلاف دو روزہ ’’ بھارت بند ‘‘ ہڑتال جمعرات کو دوسرے روز بھی جاری رکھی اور ملک بھر میں پولسی سٹیشن ‘ ریلوے سٹیشن ‘ ٹریکس اور کانگریس کے راہنما کے گھر پر پانچ سے زائد حملے کئے جس کے نتیجے میں کانگریس راہنما ایودش گوتم کے 2 رشتہ دار ہلاک اور ان کے بیٹے سمیت 2 زخمی ہو گئے ۔ پولیس کی کارروائی میں 5 باغی ہلاک کر دیئے گئے ہیں ۔ ٹرینوں کی آمد و رفت معطل ہو گئی ۔ اطلاعات کے مطابق جمعرات کو ماؤ نواز باغیوں نے اپنے ترجمان چیرکوری راج کمار کی بھارتی ریاست اندھرا پردیش میں پولیس کے ہاتھوں ہلاکت کے خلاف دو روزہ ’’ بھارت بند ‘‘ کے سلسلے میں دوسرے روز بھی ملک بھر میں ہڑتال جاری رکھی اور حکومتی تنصیبات پر حملے کئے ۔ ماؤ نواز باغیوں نے ریاست جھارکنڈ میں ہیگارا ریلوے سٹیشن اور نیچتپور کے قریب ریلوے ٹریک پر حملہ کیا جس سے عمارت کو نقصان پہنچا ۔ جس کی وجہ درجنوں ٹرینوں کو روک دیا گیا ۔ ماؤ نواز باغیوں نے تیتولمری ریلوے سٹیشن پر بھی حملہ کیا جبکہ ریلوے کو دھماکے سے اڑا دیا گیا جس کے نتیجے میں ٹریک تقریباً تین فٹ تک اکھڑ گیا ۔ ذرائع کے مطابق مختلف مقامات پر ریلوے ٹریکس تباہ ہونے کے باعث راج دھانی ایکسپریس سمیت کئی اہم ٹرینیں مختلف مقامات پر روک دی گئی ۔ ریلوے ٹریک کی بحالی کے انتظار میں مسافروں کو شدید مشکلات کا سامنا کرنا پڑا ۔ ادھر نکسیل باغیوں نے کوا کوندا پولیس سٹیشن پر باغیوں کے حملے میں عمارت کو شدید نقصان پہنچایا ۔ پولیس نے کہا ہے کہ جوابی کارروائی میں 6 باغی بھی مارے گئے ہیں ۔ دریں اثناء ریاست چھتیس گڑھ کے گاؤں ناکولنار کے قریب کانگریس راہنما ایودش گوتم کی رہائش گاہ پر باغیوں نے حملہ کیا جس کے نتیجے میں ان کے 2 رشتہ دار ہلاک اور ان کے بیٹے اور سیکورٹی اہلکار سمیت 2 افراد زخمی ہوئے ۔

Share

ثانیہ مرزا کی ناقص کارکردگی جاری ‘ عالمی رینکنگ میں مسلسل تنزلی کے باعث ٹاپ 100 کی فہرست سے باہر ہو گئیں

پیرس‘ پیرس بھارتی ٹینس سٹار ثانیہ مرزا ٹینس کی عالمی رینکنگ میں مسلسل تنزلی کے باعث ٹاپ 100 کی فہرست سے باہر ہو گئی ہیں اور وہ اپنی ناقص کارکردگی اور انجری مسائل کے باعث ویمنز ڈبلز کی عالمی رینکنگ میں بھی ٹاپ 90 سے نیچے چلی گئی ہیں لیکن مسلسل ناکامیوں اور تنزلی کا سلسلہ جاری رہنے کے باعث وہ ویمنز سنگلز کی عالمی رینکنگ میں ٹاپ 100 کی فہرست سے باہر ہو چکی ہیں جبکہ وہ ویمنز ڈبلز کی عالمی رینکنگ میں بھی ٹاپ 100 کی فہرست سے باہر ہونے والی ہیں اور اسوقت وہ ویمنز ڈبلزمقابلوں کی عالمی رینکنگ میں 92 ویں نمبر پر ہیں۔ واضح رہے کہ ثانیہ مرزا ٹینس میں ناقص کارکردگی کے باوجود ذرائع ابلاغ پر چھائی ہیں اور عوام کی توجہ کا مرکز ہیں۔

Share

پاکستان کو مقبوضہ کشمیر میں انسانی حقوق کی خلاف ورزیوں پر تشویش ہے ، عبد الباسط

بھارت آرمڈ فورسز اسپیشل پاور ایکٹ اور ڈسٹرب ایریا ایکٹ جیسے کالے قوانین کا خاتمہ کرے
اسلام آباد ‘ پاکستان نے بھارت سے مطالبہ کیا ہے کہ مقبوضہ کشمیر میں نافذ ’کالے‘ قوانین کا خاتمہ کرے اور ایسے اقدامات کرے جن کے نتیجے میں کشمیر کی بگڑتی صورتحال پر قابو پایا جا سکے۔دفترِ خارجہ کے ترجمان عبدالباسط کا کہنا ہے کہ پاکستان کو کشمیر میں انسانی حقوق کے حوالے سے شدید تشویش ہے۔بی بی سی اردو کے ہارون رشید سے بات کرتے ہوئے انہوں نے کہا کہ ’ہمیں انسانی حقوق کے حوالے سے جو حالات ہیں ان پر تشویش ہے اور ہم چاہتے ہیں کہ وہاں حالات بہتر ہوں‘۔ترجمان کا کہنا تھا کہ ’اس سلسلے میں وہاں پر نافذ کالے قوانین جن میں آرمڈ فورسز سپیشل پاور ایکٹ اور ڈسٹربڈ ایریاز ایکٹ جیسے قوانین شامل ہیں انہیں منسوخ کر دینا چاہیے‘مقبوضہ کشمیر کی موجودہ صورتحال پر تبصرہ کرتے ہوئے عبدالباسط نے کہا کہ ’یہ انسانی حقوق کا مسئلہ ہے، حقِ خودارادیت کا مسئلہ ہے اور اسی سے دیگر مسائل جنم لیتے ہیں۔ اس مسئلے کی جڑ پر بھی نظر رکھنی چاہیے اور اسے بھی حل کرنے کی کوشش کرنی چاہیے‘۔ان کا کہنا تھا کہ ’پاکستان کی خواہش ہے کہ بھارت کشمیر کی موجودہ صورتحال سے احسن طریقے سے نمٹنے اور ایسے اقدامات کرے کہ صورتحال مزید نہ بگڑے‘۔ انہوں نے بھارت پر زور دیا کہ وہ زیرِ حراست کشمیری رہنماؤں کو فوری طور پر رہا کر دے۔ماہِ رواں میں پاک بھارت خارجہ سیکرٹریز کی ملاقات کے حوالے سے ترجمان نے کہا کہ ’ہم پندرہ جولائی کی ملاقات کو مثبت انداز سے دیکھ رہے ہیں اور چاہتے ہیں کہ اس ملاقات کے نتیجے میں پائیدار امن مذاکرات کا سلسلہ شروع ہو جائے‘۔خیال رہے کہ مقبوضہ کشمیر میں گزشتہ ماہ فوج کے ہاتھوں فرضی جھڑپ میں تین شہریوں کی ہلاکت اور انہیں شدت پسند قرار دیے جانے پر پوری وادی میں مظاہروں کا سلسلہ شروع ہوگیا تھا۔ ان مظاہروں کے دوران اب تک ایک پچیس سالہ خاتون سمیت اْنیس افراد مظاہرین کے خلاف پولیس یا نیم فوجی دستوں کی فائرنگ سے ہلاک ہوچکے ہیں۔ بیشتر اموات نیم فوجی دستوں کے ہاتھوں ہوئی ہیں۔اس عوامی احتجاج کو دبانے اور کرفیو کے باوجود ہنگاموں کو روکنے میں پولیس اور نیم فوجی ملیشیاء کی ناکامی کے بعدگزشتہ روز صبح سرینگر اور دوسرے حساس قصبوں میں فوج طلب کر لی گئی ہے

Share

بھارتی بحریہ کے کمانڈر ایئرایڈمرل ایس ایس جانوال جنگی جہاز پر فائرنگ سے ہلاک

کوچی ‘ بھارتی بحریہ کی جنوبی کمان کے سربراہ ایئر ایڈمرل ایس ایس جانوال فائرنگ سے ہلاک ہو گئے ۔ بھارتی میڈیا کے مطابق بھارتی بحریہ کی جنوبی کمان کے سربراہ ایئر ایڈمرل ایس ایس جانوال جنگی بحری جہاز پر حادثاتی طور پر گولی لگنے سے ہلاک ہو گئے ۔ بھارتی بحریہ کے ترجمان کمانڈر سی دی ایس سنتیش نے اسے ایک حادثہ قرار دیا ہے تاہم واقعہ کی اعلیٰ سطح پر تحقیقات شروع کر دی گئی ہیں ۔ ترجمان کا کہنا ہے کہ انہیں سینئر آفیسر کے حادثاتی موت پر بہت صدمہ ہوا ۔ جانوال کی عمر 51 سال تھی وہ بھارتی بحریہ کے فیئر آفیسر تھے ۔ انہوں نے اپنے پیچھے ایک بیوی اور 2 بچے چھوڑے ہیں

Share

بھارت میں پٹرولیم مصنوعات کی قیمتوں میں اضافے کے خلاف ملک گیر ہڑتال

پولیس نے مظاہرین پر لاٹھی چارج بھی کیا ‘ اپوزیشن پارٹی کے درجنوں راہنما گرفتار
نئی دہلی ‘ بھارت میں پٹرولیم مصنوعات کی قیمتوں میں اضافے کے خلاف ملک گیر ہڑتال میں اپوزیشن پارٹی کے درجنوں راہنما گرفتار کر لئے گئے ۔ بھارت میں پٹرولیم کی قیمتوں میں 6.7 فیصد اضافے کے خلاف بی جے پی اور کمیونسٹ جماعتوں نے ملک گیر ہڑتال کا اعلان کیا تھا ۔ چنائے اور گجرات میں ہڑتال اور مظاہروں کے دوران پولیس نے بی جے پی کے درجنوں رہنماؤں سمیت کئی کارکنوں کو گرفتار کر لیا گیا جبکہ پولیس نے مظاہرین پر لاٹھی چارج بھی کیا ۔ مظاہروں میں شدت اور ہڑتال کی وجہ سے کاروبار زندگی معطل جبکہ لوکل ٹرانسپورٹ اور ریلوے کا نظام بھی درہم برہم ہو گیا ۔ چنائے اور ممبئی ایئرپورٹ سے درجنوں پروازیں معطل کر دی گئیں ۔

Share

آسٹریلیا میں مریضوں کے قاتل بھارتی ڈاکٹر کو 7 سال قید کی سزا

کینبرا ‘ آسٹریلوی عدالت نے بھارتی نژاد امریکی قاتل ڈاکٹر جیانت پٹیل کو تین مریضوں کو موت کے گھاٹ اتارنے پر سات سال قید کی سزا سنا دی۔ کوئینز لینڈ ہسپتال میں 2003ء سے لے کر 2005ء تک کے درمیانی عرصے میں جیانت پٹیل نے کئی مریضوں کے غلط آپریشن کئے اور مریضوں کے اعضاء کو بڑے پھوہڑپن کے ساتھ جوڑا۔ ملزم جیانت پٹیل کو آسٹریلوی میڈیا نے ڈاکٹر ڈیتھ قرار دیا۔ عدالت میں مقدمہ کی سماعت کے دوران بتایا گیا کہ ملزم جیانت پٹیل نے کئی مریضوں کے آپریشن کے دوران ان کے صحت مند اعضاء جسم سے نکال کر پھینک دیئے۔ عدالت کو بتایا گیا کہ ڈاکٹر جیانت کی غلط کاریوں اور سرجری سے لاعلمی کے باعث ہسپتال کی نرسیں بھی مریضوں کو ڈاکٹر ڈیتھ سے چھپاتی رہیں۔ یہ امر قابل ذکر ہے کہ جیانت پٹیل پر قبل ازیں نیویارک اور اوریگون میں مریضوں کے آپریشن کرنے پر پابندی لگائی گئی تھی تاہم اس نے آسٹریلیا کا رخ کر لیا۔

Share

بھارت نے جاپان سے سول نیو کلیئر انرجی کے حصول کے لیے مذاکرات شروع کر دئیے

مذاکرات کے نتیجے میں بھارت جاپان سے انتہائی ترقی یافتہ ٹیکنالوجی حاصل کرسکے گا
جاپان بھارت سے ایٹمی معاملات پر تعاون سے اب تک گریز کرتارہا ہے لیکن ٹورنٹو میں بھارتی وزیراعظم اور جاپانی وزیراعظم کے درمیان ملاقات میں ڈیڈ لاک ختم ہو گیا
نئی دہلی ‘ پاک چین ایٹمی تعاون کے مخالف بھارت نے امریکا کے بعد جاپان سے بھی سو یلین نیوکلیئر انرجی کے حصول کے لیے مذاکرات شروع کردیئے۔بھارت کے سرکاری خبر رساں ادارے کے مطابق شروع ہونے والے مذاکرات کے نتیجے میں بھارت جاپان سے انتہائی ترقی یافتہ ٹیکنالوجی حاصل کرسکے گا۔واضح رہے کہ جاپان بھارت سے ایٹمی معاملات پر تعاون سے اب تک گریز کرتارہا ہے لیکن ٹورنٹو میں بھارتی وزیراعظم من موہن سنگھ اور جاپانی وزیراعظم ناؤٹوکان کے درمیان ملاقات میں اس معاملے میں ڈیڈ لاک ختم ہو گیااوردونوں ملکوں کے درمیان فوری طور پرمذاکرات شروع ہوگئے۔پی ٹی آئی کے مطابق بھارت کے آٹھ ممالک سے اس طرح کے معاہدے ہیں جن میں امریکا ،فرانس ،روس اورکیینڈا بھی شامل ہیں ان معاہدوں کا مقصد بھارت کی ایٹمی صنعت کو ترقی دینا ہے۔

Share

پاکستان سے بچائو ‘ من موہن سنگھ کی باراک اوباما سے رو رو دہایاں

من موہن سنگھ کی ٹورنٹو میں اوباما سے ملاقات، پاکستان کے خلاف شکایات کے انبار لگادیئے
امریکی صدر سے پاکستان پر ممبئی حملہ آوروں کے خلاف سنجیدہ اقدام کرنے کیلئے دباؤ ڈالنے کا مطالبہ
بھارت قیام امن کے لیے عالمی برادری کے ساتھ مل کر کام کرے،باراک اوباما
اوبامہ نے جاپانی وزیر اعظم سے بھی ملاقات کی،جی ۔ 20 کانفرنس میں عالمی معیشت کی بحالی کیلئے تجویز کردہ اقدامات پرعمل کرنے پر تفاق

ٹورنٹو‘ بھارتی وزیر اعظم من موہن سنگھ نے کینیڈا میں جی ٹوئنٹی سربراہ اجلاس کے موقع پر امریکی صدر باراک اوباما سے ملاقات کی اورپاکستان کے خلاف شکایات کے انبار لگادیئے۔ بھارتی وزیر اعظم نے صدر اوبامہ سے پاکستان پر ممبئی حملہ آوروں کے خلاف سنجیدہ اقدام کرنے کیلئے دباؤ ڈالنے کا مطالبہ بھی کیا ۔ٹورنٹو میں دونوں رہنماؤں کی تقریبا ایک گھنٹے کی طویل ملاقات میں بھارت اور امریکہ کے درمیان تعلقات کے فروغ ‘ باہمی دلچسپی اور بین الاقوامی امور کے علاوہ پاکستان اور افغانستان میں جاری صورت حال پر بھی تبادلہ خیال کیا گیا ۔ بھارتی خبر رساں ادارے کے مطابق وزیر اعظم من موہن سنگھ نے صدر باراک اوبامہ سے مطالبہ کیا کہ وہ ممبئی حملہ آوروں کے خلاف سنجیدہ اقدامات کرنے کے لئے پاکستان پر دباؤ بڑھائے ۔ پاکستان کو ممبئی حملہ آوروں کے حوالے سے فراہم کئے گئے شواہد کے پیش نظر ٹھوس اقدامات کرنے چاہئے ۔من موہن سنگھ نے صدر اوبامہ سے پاکستان کے حوالے سے اپنے تحفظات کا اظہار کرتے ہوئے کہا کہ پاکستان کو سمجھنا چاہئے کہ ڈیوڈ ہیڈلی سے تحقیقات میں کالعدم لشکر طیبہ کے ملوث ہونے کے انکشافات کے بعد اسے سنجیدگی سے کارروائی کرنا چاہئے ۔ کیونکہ ہیڈلی سے تحقیقات کے دوران بھارتی حکام نے حاصل کی گئیں معلومات پاکستان کو بھی فراہم کی ہیں لیکن پاکستان نے ابھی تک ان حملہ آوروں کے خلاف کوئی اقدام نہیں کیا ۔بھارتی وزیر اعظم کا مزید مطالبہ تھا کہ پاکستان کو دہشت گردی کے خلاف مزید اقدامات کرنے چاہئے اور پاکستان نے شرم الشیخ میں بھارت سے جو وعدہ کیا تھا کہ وہ اپنی سرزمین کو بھارت کے خلاف استعمال کرنے کی اجازت نہیں دے گا پر عملدرآمد کرنا ہو گا ۔ ان کا کہنا تھا کہ پاکستان کو امن کے لئے اقدامات کے حوالے سے یہ دکھانا ہو گا کہ آیا پاکستان دہشت گردی کے خلاف کارروائی میں سنجیدہ ہے یا نہیں ۔اس موقع پر گفتگو کرتے ہوئے صدر اوباما نے عالمی معاشی بحران کے خاتمے کے حوالے سے ان کی تجاویز اور حکمت عملی کو سراہا اور کہا کہ بھارت نہ صرف اپنے خطے بلکہ دنیا کی ایک ابھرتی ہوئی طاقت ہے اور اس لحاظ سے اس پر اہم ذمے داریاں عائد ہوتی ہیں۔انھوں نے بھارت پر زور دیا کہ وہ قیام امن کے لیے عالمی برادری کے ساتھ مل کر کام کرے۔ امریکہ بھارت جیسے دوست ملک کے ساتھ اپنی سٹرٹیجک پارٹنر شپ اور باہمی تعلقات جاری رکھے گا ۔صدر باراک اوبامہ نے کہا کہ بھارتی وزیر اعظم من موہن سنگھ بھارت کی قیادت کی زمہ داری اچھے انداز سے نبھا رہے ہیں ۔ امریکی صدر نے کہا کہ وہ نومبر میں دورہ بھارت کا بے تابی سے انتظار کر رہے ہیں ۔من موہن سنگھ کا کہنا تھا کہ بھارت امریکی صدر اور ان کی اہلخانہ کا پرتپاک استقبال کریں گے ۔ بھارتی وزیر اعظم نے صدر اوباما کو کہا کہ آپ بھارت آکر دیکھ سکتے ہیں کہ وہاں غربت ،جہالت اور بیماریوں سے نجات کیلئے کیا کوششیں کی جا رہی ہیں۔انھوں نے اس سلسلے میں امریکا کے تعاون کا شکریہ بھی ادا کیا۔ اس کے علاوہ صدر باراک اوبامہ نے جاپانی وزیر اعظم سے بھی ملاقات کی ۔ دونوں سربراہان کے درمیان ہونے والی ملاقات میں باہمی دلچسپی کے امور سمیت علاقائی اور بین الاقوامی امور پر تبادلہ خیال کیا گیا ۔ دونوں رہنماؤں نے جی ۔ 20 کانفرنس میں عالمی معیشت کی بحالی کے لئے تجویز کردہ اقدامات پر پوری طرح عمل کرنے پر بھی اتفاق کیا ۔

Share

بھارت اور کینیڈا نے سول جوہری تعاون کے معاہدے پر دستخط کردئیے

دونوں ملکوں نے ہر قسم کی دہشت گردی کی مذمت کا اعلان بھی کیا
کینیڈا کے ساتھ سول جوہری معاہدے سے دونوں ممالک کے تعلقات مزید مستحکم ہوں گے۔ من موہن سنگھ
بھارت کے ساتھ توانائی کے شعبے میں تعاون کے ساتھ ساتھ دونوں ممالک کے تعلقات کو مزید فروغ دیا جائے گا، اسٹیفن ہارپر
ٹورنٹو ‘ بھارت اور کینیڈا نے سول جوہری تعاون کے معاہدے پر دستخط کردئیے جبکہ دونوں ملکوں نے ہر قسم کی دہشت گردی کی مذمت کا اعلان بھی کیا ہے۔ٹورنٹو میں جی ٹوئنٹی اجلاس کے سائیڈ لائین میں بھارتی وزیراعظم من موھن سنگھ اور کینیڈین وزیراعظم اسٹیفن ہارپر کے درمیان ون آن ون اور وفود کی ملاقاتیں بھی ہوئیں۔سول جوہری معاعدے پر دستخط بھارتی جوہر ی توانائی کے سیکریٹری کمار بینرجی اور کینیڈا کے وزیر خارجہ لارینس کینن نے کیے، تقریب میں دونوں ممالک کے وزرائے اعظم بھی موجود تھے۔ معاہدے کے تحت بھارت کینیڈا سے یورینیم اور دیگر سامان درآمد کریگا۔ معاہدے کے تحت کینیڈا اور بھارت ایٹمی فضلے کو ٹھکانے لگانے اور تابکاری سے محفوظ رہنے کے اقدامات پر بھی اتفاق کیا گیا ہے۔اس موقع پر ہونے والی تقریب سے خطاب کرتے ہوئے بھارتی وزیر اعظم من موھن سنگھ نے کہا کہ کینیڈا کے ساتھ سول جوہری معاہدے سے دونوں ممالک کے تعلقات مزید مستحکم ہوں گے۔ کینیڈا کے وزیراعظم نے خطاب کرتے ہوئے کہا کہ بھارت کے ساتھ توانائی کے شعبے میں تعاون کے ساتھ ساتھ دونوں ممالک کے تعلقات کو مزید فروغ دیا جائے گا۔

Share