Urdu News-Online Urdu Newspaper

بھارتی میڈیا نے عالمی معاشی بحران کے بھارت پراثرات مرتب نہ ہونے کے حکومتی دعووں کو غلط قرار دیدیا
نئی دہلی ‘ 2009 کے دوران دنیا بھر میں غریبوں کی تعداد میں8کروڑ 40لاکھ افرادکا اضافہ ہواجن میں3کروڑ 36لاکھ بھارتی ہیں۔بھارتی میڈیا رپورٹ میں اقوام متحدہ کے معاشی اور سماجی شعبے کی طرف سے جاری کردہ اعداد وشمار کے حوالے سے حکومت کے ان دعووں کو غلط قرار دیا گیا ہے کہ عالمی معاشی بحران کے بھارت پر کوئی اثرات مرتب نہیں ہوئے بلکہ حقیقت میں اس بحران کے سب سے زیادہ اثرات بھارت ہی پر پڑے ہیں۔رپورٹ کے مطابق 2009میں عالمی معاشی بحران کے باعث دنیا بھر میں مزید8کروڑ 40لاکھ افراد غربت کا شکار ہوئے جن میں سے 3کروڑ 36لاکھ افراد کا تعلق بھارت سے ہے۔رپورٹ میں کہا گیا ہے کہ عالمی معاشی بحران سے بھارت میں بے روزگاری میں اضافہ اور گھریلو آمدنیوں میں کمی ہوئی ہے۔رپورٹ کے مطابق، صورت حال میں بہتری ضرور آرہی ہے لیکن معاشی بحالی کی رفتار سْست اور روزگارمیں بہتری کے امکانات کم رہیں گے

نئی پالیسی پر صلاح مشورہ شروع ، بھارت خارجہ سیکرٹری سطح کے مذاکرات میں پاکستان کو آگاہ کرے گا
معافی کی پالیسی سے آزاد کشمیر میں موجود 1200 کشمیری مجاہدین اور ان کے خاندان واپس جا سکیں گے
بھارتی پالیسی ایک فریب ہے بھارت کے جھانسے میں نہیں آئیں گے ، ترجمان حزب المجاہدین احسان الہی کی بات چیت

نئی دہلی + مظفر آباد ‘ بھارتی حکومت نے اعتماد کی بحالی کے اقدام کے طور پر کشمیری مجاہدین کو عام معافی دینے کا فیصلہ کیا ہے۔ اس سلسلے میں ’’ ہتھیار ڈالنے اور بحالی ‘‘ کے نام سے پالیسی تیار کر لی گئی ہے ۔پالیسی پر بھارتی حکومت کے مختلف اداروں کے درمیان مشاورت شروع ہو گئی ہے ۔مقبوضہ کشمیر کے اخبار کی رپورٹ کے مطابق بھارت نے کشمیر کے سلسلے میں اعتماد کی بحالی کا ایک نیا قدم اٹھانے کا فیصلہ کیا ہے اس فیصلے کے تحت عسکریت سے وابستہ کشمیری نوجوانوں اور ان کے خاندانوں کو عام معافی دینے کا منصوبہ ہے۔ پالیسی کے تحت آزاد کشمیر اور پاکستان کے مختلف علاقو ںمیں مقیم کشمیری مجاہدین اور ان کے خاندان واپس مقبوضہ کشمیر جا سکیںگے۔ انہیں محفوظ راہ داری فراہم کی جائے گی ۔بھارت اس نئے منصوبے سے پاکستان کو باضابطہ طور پر مطلع کرے گا ۔ پاکستان اور بھارتی خارجہ سیکرٹری کے سطح کے مذاکرات میں بھارت یہ نئی پالیسی پاکستان کے سامنے رکھے گا تاکہ پاکستان کا تعاون حاصل کیاجائے بھارت چاہتا ہے کہ پاکستان آزاد کشمیر اور دوسرے علاقوں میں مقیم کشمیری مجاہدین اور ان کے خاندانوں کی شناخت اور تصدیق کے عمل میں تعاون کرے ۔مقبوضہ کشمیر کے وزیر اعلیٰ عمر عبد اللہ نے نئی دہلی میں بھارتی ریاستوں کے وزراء اعلیٰ کی کانفرنس کے موقع پر خطاب کرتے ہوئے کہا کہ ہمارے پاس ایک موقع ہے اس موقع سے فائدہ اٹھاتے ہوئے کشمیری واپس آ سکیں گے ۔ مجاہدین ہتھیار ڈال کر معمول کی زندگی گزار سکیں گے ۔ ادھر بھارتی وزارت داخلہ کے ایک افسر نے بھی مذکورہ پالیسی کی تصدیق کرتے ہوئے کہا کہ اس پالیسی پر مقبوضہ کشمیر حکومت سے بھی مشاورت ہو رہی ہے ۔بھارتی وزیر اعظم من موہن سنگھ نے دو سال پہلے مقبوضہ کشمیر میں قیام امن کے سلسلے میں ورکنگ گروپ قائم کئے تھے ایک ورکنگ گروپ کے سربراہ حامد انصاری تھے ۔ حامد انصاری نے اس بارے میں بتایا کہ ہم نے اصولی طور پر اس پالیسی سے اتفاق کر لیا ہے تاکہ مظفر آباد میں مقیم مجاہدین واپس آسکیں اور انہیں عام معافی ملے ۔ اخبار کے مطابق نئی پالیسی کے تحت مجاہدین اور ان کے خاندانوں کو لائن آف کنٹرول کے کراسنگ پوائنٹس چکوٹھی ، چکندرا باغ ، راولا کوٹ میں آ کر سرنڈر کرنا ہو گا ۔ ان مقامات پر لائن آف کنٹرول کے مقبوضہ کشمیر سائڈ پر بھارتی خفیہ اداروں ’’ آئی بی ‘‘ ، ’’ را ‘‘ اور جموں کشمیر پولیس کے کیمپ ہوں گے ۔ سرنڈر کرنے والوں کو ایک ماہ تک بھارتی اداروں کی تحویل میں تفتیش کے عمل سے گزرنا ہو گا جبکہ بعد ازاں ہر ہفتے مقامی پولیس سٹیشن میں حاضری دینا ہو گی ۔بھارتی وزارت داخلہ کے حکام کا کہنا ہے کہ مظفر آباد میں 800 سے زائد عسکریت پسند موجود ہیں ۔ جبکہ مقبوضہ کشمیر حکومت کا کہنا ہے کہ یہ تعداد 1200 سے زیادہ ہے ۔اخبار کے مطابق بھارتی حکومت نے 2005 اور 2007 ء کے دوران بھی سرنڈر پالیسی کا اعلان کیا تھا تاہم سرنڈر ہونے والے مجاہدین کی طرف سے اس وقت کے وزیر اعلیٰ غلام نبی آزاد پر قاتلانہ حملے میں ملوث ہونے کی وجہ سے پالیسی واپس لے لی گئی تھی۔ نئی پالیسی کے سلسلے میں ان دونوں بھارتی حکومت بڑے پیمانے پر مشاورت کر رہی ہے ۔جن نوجوانوں نے آزاد کشمیر اور پاکستان میں شادیاں کرلی ہیں ان کے لیے کہا گیا ہے کہ وہ اسلام آباد میں بھارتی ہائی کمیشن سے رجوع کریں گے۔ مقبوضہ کشمیر میں بھارتی فورسز کے خلاف برسرپیکار مجاہد تنظیم حزب المجاہدین نے بھارتی پالیسی کو مسترد کرتے ہوئے کہا ہے کہ اب کشمیری مجاہدین بھارت کے کسی فریب میں نہیں آئیں گے۔ بھارت کی نئی پالیسی دراصل مجاہدین اور عوام میں غلط فہمیاں پیدا کرنے کی کوشش ہے ۔ حزب المجاہدین کے ترجمان احسان الہی نے نئی بھارتی پالیسی پر تبصرہ کرتے ہوئے ثناء نیوز کو بتایا کہ ماضی قریب میں مقبوضہ کشمیر کے وزیر اعلیٰ مفتی سعید کے دورمیں ایسی ہی پالیسی بنائی گئی تھی ۔ کچھ نوجوان بھارت کے اس جھانسے میں آ گئے تھے اب ان کی حالت قابل رحم ہے ۔ انہوںنے کہا کہ نئی پالیسی میں عملاً کچھ نہیں ہے اور نہ ہی کشمیریوں کی ہمدردی میں کچھ ہورہا ہے۔ ماضی قریب میں جن لوگوںنے سرنڈر کیا تھا وہ اب پچھتا رہے ہیں اس لیے کہ سرنڈر نوجوانوں کے ساتھ انتہائی ظالمانہ سلوک ہو رہا ہے ۔ ان سے کئے وعدے پورے نہیں کئے گئے ۔ اب کی بار جس نئی پالیسی کی باتیں ہو رہی ہیں وہ دراصل کشمیری عوام اورمجاہدین میں غلط فہمیاں پیدا کرنے کی کوشش ہے ۔ اگر کوئی اس غلط فہمی کا شکار ہوا تو یہ اس کی اپنی غلطی ہو گی۔ بھارت تحریک آزادی کشمیر کو کمزور کرنے کی کوشش کر رہا ہے۔ ہم اپنی جدوجہد جاری رکھیں گے

مذاکرات حافظ سعید کی گرفتاری سے مشروط نہیں، سکھ تحریک کو سرحد پار سے ہوا دی جارہی ہے‘ چدمبرم کی میڈیا سے گفتگو
نئی دہلی ‘ بھارتی وزیرداخلہ چدمبرم کشمیر کی آزادی کے لئے سو سال تک لڑ نے سے متعلق صدر زرداری کے بیان پر حیرت زدہ رہ گئے اور کہا ہے کہ بھارت نے پاکستان کے ساتھ مذاکرات حافظ سعید کی گرفتاری سے مشروط نہیں کئے۔ حافظ سعید اور صلاح الدین ظالم قوتوں کے نمائندے ہیں وہ جب بھی بھارت کے خلاف لڑیں گے ان کو شکست دے دی جائے گی۔نئی دہلی میں میڈیا سے بات چیت کرتے ہوئے چدمبرم نے کہا کہ جہاں تک وہ جانتے ہیں تو بھارت نے غیرمشروط مذاکرات کی پیشکش کی ہے ۔ ایک سوال کے جواب میں چدمبرم نے کہا کہ حافظ سعید اور صلاح الدین ظالم قوتوں کے نمائندے ہیں وہ جب بھی بھارت کے خلاف لڑیں گے ان کو شکست دے دی جائے گی۔ بھارتی وزیر داخلہ نے کہا کہ پنجاب اور راجستھان میں سکھ خالصہ تحریک کو سرحد پار سے ہوا دینے کی کوشش کی جا رہی ہے لیکن یہ سنگین مسئلہ نہیں۔جب ان سے صدر زرداری کے اس بیان کے بارے میں سوال کیا کہ کشمیر کی آزادی کے لئے سو سال تک لڑیں گے تو وہ حیرت زدہ رہ گئے۔ پی چدم برم نے کہا کہ گجرات میں ایسے حالات نہیں کہ وہاں مہاراشٹر کی طرز پر منظم جرائم کی روک تھام کا قانون نافذ کیا جائے اس لئے وزیر اعلیٰ مودی کی درخواست مسترد کر دی گئی۔

نئی دہلی ‘ بھارت اگنی بیلسٹک میزائل کا تجربہ کیا ہے ۔ بھارتی ٹی وی کے مطابق اگنی ۔ 3 میزائل کا تجربہ ریاست اڑیسہ میں کیا گیا اگنی ۔ 3 درمیانے فاصلے تک مار کرنے والا میزائل ہے اور یہ 3 ہزار سے 5 ہزار کلومیٹر کے فاصلے تک اپنے ہدف کو نشانہ بنانے کی صلاحیت رکھتا ہے ۔ بھارت نے اگنی ۔ 3 میزائل کا پہلا تجربہ 9 جولائی 2006 ء کو کیا تھا جو ناکام ہو گیا تھا تاہم نئی دہلی نے اپریل 2007 ء میں کئے گئے تجربے کی کامیابی کا دعویٰ کیا تھا

نئی دہلی ‘ بھارتی وزیر اعظم من موہن سنگھ نے دعویٰ کیا ہے کہ سرحد پار سے نہ صرف بھارت میں دہشت گردی کی جارہی ہے بلکہ جعلی کرنسی نوٹ چھاپ کر بھارت اسمگل کئے جارہے ہیں ۔من موہن سنگھ نے یہ بات اتوار کے روز نئی دہلی میں داخلی سلامتی سے متعلق اجلاس سے خطاب کرتے ہوئے کہی ۔ انہوں نے کہا کہ اگرچہ 2008اور2009 میں جموں و کشمیر میں دہشت گردی کے واقعات کم ہوئے لیکن در اندازی میں اضافہ ہوا ہے۔ سرحد پار سرگرم بھارت مخالف عناصر جموں و کشمیر میں دہشت گردی کررہے ہیں ۔ اس کے علاوہ سرحد پار سے جعلی کرنسی نوٹ تیار کرکے بھارت اسمگل کئے جا رہے ہیں ۔اِس پر قابو پانے کے لئے ریاستوں اور مرکز کے درمیان مربوط کوششوں کی ضرورت ہے ۔ من موہن سنگھ کا کہنا تھا کہ بائیں بازو کی انتہا پسند جماعتیں ملک کی داخلی سلامتی کے لئے سب سے بڑا خطرہ ہے ۔

نئی دہلی ‘ بھارت نے پاکستان کو باضابطہ مذاکرات کی پیشکش کر دی ہے اور کہ اہے کہ وہ کھلے ذہن کے ساتھ تمام معاملات پر بات کرنے کا خواہاں ہے ۔ بھارتی میڈیا کے مطابق بھارت نے پاکستان کو مذاکرات کی باضابطہ پیشکش کی ہے جس میں بھارتی وزارت خارجہ کی جانب سے موقف اختیار کیا گیا ہے کہ وہ پاکستان کے ساتھ کھلے ذہن کے ساتھ تمام معاملات پر بات چیت کرنا چاہتے ہیں ۔ بھارتی میڈیا کے مطابق بھارت پاکستان کے ساتھ معاملات پر دہشت گردی سمیت تمام امور پر مذاکرات کرنا چاہتا ہے جبکہ پاکستان کی جانب سے دفتر خارجہ مذاکرات کی بھارتی پیشکش کا خیر مقدم کرتے ہوئے کہا ہے کہ یہ بات چیت میں مسئلہ کشمیر سمیت پانی کے معاملے پر بھی بات کی جائے گی ۔ پاکستان اور بھارت کے درمیان جامع مذاکرات کا سلسلہ ممبئی حملوں کے بعد سے معطل ہے جبکہ رواں ماہ سال وزراء داخلہ کانفرنس میں بھارتی وزیر داخلہ پی چدمبرم کی پاکستان آمد مذاکرات کی بحالی کے لیے اہم پیشرفت ہو سکتی ہے

راہول گاندھی اور انتہا پسند ہندو جماعت شیوسینا کی طرف سے ایک دوسرے پر الزام تراشی میں مزید شدت
ممبئی ‘ بھارت کے کانگریسی رہنما راہول گاندھی اور انتہا پسند ہندو جماعت شیوسینا کی طرف سے ایک دوسرے پر الزام تراشی میں مزید شدت آ گئی ہے اور راہول گاندھی کے اس بیان پر کہ بھارت تمام بھارتی شہریوں کا ہے شیوسینا کے رہنما بال ٹھاکرے نے کہا ہے کہ بھارت بھارتی شہریوں کا ہو سکتا ہے ’’اطالوی ماں‘‘ کا نہیں۔ شیوسینا کے اخبار’’ سامنا ‘‘میں شائع ہونے والے بیان میں انہوں نے راہول گاندھی کو پرنس آف کانگریس کا خطاب دیتے ہوئے کہا کہ وہ اس وقت شدید مایوسی کی کیفیت میں مبتلا ہیں اور اس کے با عث انہوں نے مراٹھی لوگوں اور مہاراشٹرریاست دونوں کی توہین کی ہے۔ انہوں نے کہا کہ ممبئی کوئی دھرم شالہ نہیں کہ بھارت بھر سے جو چاہے یہاں آئے اور اسے استعمال کر کے واپس چلا جائے۔ انہوں نے کہا کہ 1920 کے عشرے میں سان بکنا تحریک کے دوران مہاراشٹر کے 105 افراد نے اس لئے اپنی جانوں کی قربانی نہیں دی تھی کہ ممبئی پورے بھارت کیلئے دھرم شالہ (گیسٹ ہاؤس) بن جائے۔

ھارت روسی شہریوں کو تحفظ فراہم اورگھنااؤنی حرکت کے مرتکب افراد کے خلاف سخت کارروائی کرے‘ روس
نئی دہلی ‘ بھارت میں ایک اور 9 سالہ روسی لڑکی کی عصمت دری کے واقعے پرروس نے بھارت سے شدید احتجاج کرتے ہوئے اپنے شہریوں کو فوری تحفظ فراہم کرنے اورگھناؤنی حرکت کے مرتکب افراد کے خلاف سخت کارروائی کا مطالبہ کر دیا ۔ بھارت میں روسی سفارت خانے کی جانب جاری بیان میں واقعہ پر سخت مذمت کرتے ہوئے گہری تشویش کا اظہار کیا ۔بیان میں مزید کہا گیا کہ بھارتی حکومت اس طرح کے واقعات کی روک تھام کے لئے اقدامات کرے اور روسی شہریوں کو تحفظ فراہم کیا جائے ۔ یاد رہے کہ ریاست گوا کے ساحل پر ایک 9 سالہ روسی لڑکی جوکہ اپنی ماں کے ساتھ آرمبول ساحل پر آئی ہوئی تھی اسے دو بھارتی باشندوں نے اس وقت اپنی ہوس کا نشانہ بنایا جب وہ کھیل رہی تھی۔ بھارت کی اسی ریاست میں ایک ماہ قبل بھی ایک اور روسی خاتون کی مقامی سیاستدان نے عزت لوٹ لی تھی

ملک میں خراب امن و امان کی صورت حال کی وجہ سے غیر ملکی سر مایہ کاری نہیں کی جا رہی

تعلیم کسی بھی معاشی چیلنج سے نبرد آزد ہو نے کے لئے انتہائی اہمیت کی حامل ہے

وزیر اعظم کا ذکریا یونیورسٹی ملتان میں تقریب سے خطاب

ملتان۔ وزیر اعظم سید یوسف رضا گیلانی نے کہا ہے کہ ملک کو جہالت کی وجہ سے دہشت گردی اور انتہا پسندی کا سامنا ہے اس لئے پیپلز پارٹی کی حکومت نے تعلیم کو بنیادی حقوق میں شامل کرتے ہوئے تعلیمی بجٹ میں سات فیصد سے بڑھا کر 2015تک 20فیصد کر نے کا فیصلہ کر لیا ہے۔ ان خیالات کا اظہار انہوں نے بہاؤالدین ذکریا یونیورسٹی کے کانوکیشن ہال میں منعقدہ تقریب سے خطاب کے دوران کیا ۔ انہوں نے کہا کہ ملک میں خراب امن و امان کی صورت حال کی وجہ سے غیر ملکی سر مایہ کاری نہیں کی جا رہی۔ تعلیم کسی بھی معاشی چیلنج سے نبرد آزد ہو نے کے لئے انتہائی اہمیت کی حامل ہے۔ گلوبل اکنامک ایسے چیلنجز سے نمٹنے کے لئے ہمیں ہائر ایجوکیشن کے ساتھ ریسرچ پر بھی گہری توجہ دینا ہو گی اکیسویں صدی میں بائیو ٹیکنالوجی کے فروغ پر گہری نظر رکھنا ہو گی۔انہوں نے کہا کہ پیپلز پارٹی کی حکومت نے انہی چیلنجز کو مد نظر رکھتے ہوئے نیشنل ایجوکیشن پالیسی کا اعلان کیا ہے طلباء کے بہتر مستقبل کے لئے اساتذہ پر خطیر رقم خرچ کر نا ہو گی تاہم اساتذہ طلبہ کو صرف تعلیمی ڈگری دلوانے کے لئے نا پڑھائیں بلکہ طلباء کو بتایا جائے کہ جدید ٹیکنالوجی کا حصول کس طرح ممکن ہے انہوں نے طلباء سے کہا کہ دہشت گردی سے متاثرہ سیکورٹی فورسز قانون نافذ کر نے والے ادارے اور سول سوسائٹی کے اراکین کی حوصلہ افزائی کریں اور اس جنگ میں شہید ہو نے والوں کی قربانی کو رائیگاں نہ جانے دیں۔ وزیر اعظم سید یوسف رضا گیلانی نے بہاؤالدین ذکریا یونیورسٹی کے مختلف شعبہ جات کا افتتاح کیا جن میں ٹیلی کمیونیکیشن سسٹم ، وٹرنری سائنسز،انجینئرنگ ڈیپارٹمنٹ کے علاوہ سرائیکی سٹیڈیز ریسرچ سنٹر کی عمارت کا بھی افتتاح کیا۔وزیر اعظم سیدیوسف رضا گیلانی نے 81 ملین روپے سید یوسف رضا گیلانی فارن سکالر شپ ایوارڈ کی مد میں یونیورسٹی کو دئیے اس فنڈ سے 100 سکالرز کو بیرون ملک پی ایچ ڈی کے لئے وظیفہ دیا جائے گا۔ اس موقع پر وائس چانسلر محمد ظفر اللہ نے بہاؤالدین ذکریا یونیورسٹی میں موسیٰ پاک شہید چیئر کے قیام کا اعلان کیا۔

ممبئی۔ ممبئی دہشت گرد حملوں کے مرکزی ملزم اجمل قصاب نے گزشتہ روز عدالت میں کہا کہ اس نے گزشتہ سال جولائی میں عدالت میں جو اعتراف جرم کیا وہ اس پر پولیس کے دباؤ کا نتیجہ تھا۔ اجمل قصاب نے بھارتی خصوصی عدالت کے جج کو کہا کہ اس کا اعتراف جرم دراصل اس کے خلاف ایک سازش کا حصہ ہے۔ اجمل قصاب نے جولائی 2009ء میں عدالت میں معمول کی کارروائی رکوا کر جج سے کہا تھا کہ اس نے لشکر طیبہ کے کیمپوں میں تربیت حاصل کی اور وہ کراچی سے سمندری راستے سے ممبئی پہنچا۔ اس نے کاما ہسپتال چترا پتی شیوا جی میں لوگوں پر فائرنگ بھی کی اور پولیس مقابلے میں بھی تھا۔