Urdu News - Online Urdu News Paper

گجرات ۔ حکومت پنجاب نے جماعت الدعوہ کے سات جریدوں کی اشاعت پر فوری پابندی عائد کر دی ہے اور متعلقہ محکموں کو حکم دیا ہے کہ ان جریدوں کی کوئی کاپی منظر عام پر آئے تو اسے فوری طور پر ضبط کر لیا جائے۔ جن جریدوں پر پابندی عائد کی گئی ہے وہ یہ ہیں۔ ماہنامہ الدعوہ،ماہنامہ طیبات،ماہنامہ ضرب طیبہ، ماہنامہ وائس آف اسلام،ماہنامہ الرباط(عربی)،، ہفت روزہ غزوہ اور ہفت روزہ ننھے مجاہد

امریکہ نے نئی انتظامیہ کا اقتدار سنبھالنے پر پاکستانی فوجی و اقتصادی اقتدار میں اضافے کی یقین دہانی کرا دی

اسلام آباد ۔ صدر آصف علی زر داری،وزیر اعظم سید یوسف رضا گیلانی اور چیف آف آرمی سٹاف سے جمعہ کو امریکی نائب صدر جوزف بائیڈن نے اہم نوعیت کی ملاقاتیں کیں امریکہ نے پاکستان کو یقین دہانی کرائی ہے کہ نئی امریکی انتظامیہ کی جانب سے اقتدار سنبھالنے پرپاکستانی فوجی اور اقتصادی امداد میں اضافہ کر دیا جائے گا پاکستان کے ساتھ دہشت گردی کے خلاف تعاون جاری رہے گا ۔ صدر آصف علی زر داری کے ساتھ ایوان صدر میں ملاقات کے درمیان امریکی نائب صدر نے کہا کہ پاکستان اور بھارت مل کر دہشت گردوں کو انصاف کے کٹہرے میں لانے کے لئے ایک دوسرے سے تعاون کریں ۔ ذرائع کے مطابق انہوں نے کہا کہ خطے میں امن کے قیام کے لیے پاک بھارت کشیدگی کو بات چیت سے حل کیا جانا چاہئیے۔ ذرائع کے مطابق جوزف بائیڈن نے کہا کہ وہ ممئی حملوں کے بعد حکومت پاکستان کے اقدامات کو سراہتے ہیں۔ ان کا کہنا تھا کہ پاکستان کے ساتھ تمام شعبوں میں تعاون کو بڑھایا جائے گا۔ ذرائع کے مطابق صدر آصف علی زرداری کا کہنا تھا کہ خطے میں قیام امن کے لیے پاکستان کی کوششوں پر شک نہ کیا جائے۔ انہوں نے کہا کہ دہشت گردی کے خلاف جنگ میں سب سے زیادہ قربانیاں پاکستان نے دیں،صدر آصف ز رادری نے کہا کہ پاکستان ،،،امریکہ کی نئی حکومت سے طویل المدت اور دیرپا تعلقات چاہتا ہے ۔ انہوں نے توقع ظاہر کی کہ امریکی جاسوس طیاروں کے حملے رک جائیں گے۔ امریکی نائب صدر سے ملاقات کے دوران وزیر اعظم سید یوسف رضا گیلانی نے کہا کہ پوری قوم دہشت گردوں کے خلاف متحد ہے۔ امریکہ اور مغرب پاکستان کی مشکلات اور حساس پوزیشن کو مد نظر رکھیں اور زمینی حقائق کا ادارک کیا جائے جبکہ نو منتخب امریکی نائب صدر جوزف بیڈن نے کہا ہے کہ دہشت گردی کے خلاف جنگ میں پاکستان کی قربانیوں کو نظر انداز نہیں کیا جا سکتا۔ امریکہ پاکستان کے لیے اقتصادی اور دفاعی و فوجی تعاون میں اضافہ کرے گا۔ جمعہ کی شام اسلام آباد میں وزیر اعظم سید یوسف رضا گیلانی اور امریکی نائب صدر جوزف بیڈن کے درمیان اہم ملاقات ہوئی۔ پاک بھارت کشیدگی ، علاقائی صورت حال ، پاک امریکہ تعلقات بالخصوص دفاعی اقتصادی ، سیاسی اور دیگر شعبوں میں تعاون سے متعلق امور پر تبادلہ خیال ہوا۔ اس موقع وزیر اعظم نے کہا کہ پوری قوم دہشت گردی کے خاتمے کا پختہ عزم کئے ہوئے جس کا مظاہرہ پارلیمنٹ کی مشترکہ قرارداد میں بھی کیا جا چکا ہے۔ وزیر اعظم نے کہا کہ پاکستان دہشت گردی کا مقابلہ کرنے کی مکمل صلاحیت رکھتا ہے۔ پاکستان کی حساس پوزیشن کو مد نظر کھتے ہوئے زمینی حقائق کا ادارک کیا جائے۔ دہشت گردی کے خلاف جنگ میں پر عزم ہے۔ اس مہم میں امریکہ اور مغربی ممالک کو پا کستان کی بھر پور مدد کرنی چاہئے۔ اس موقع پر نو منتخب امریکی نائب صدر نے وزیر اعظم سید یوسف رضا گیلانی کو یقین دہانی کرائی کہ امریکہ کی نئی انتظامیہ کی جانب سے اقتدار سنبھالنے کے فوری بعد پاکستان کی فوجی اور اقتصادی امداد میں اضافہ کیا جائے گا۔ پا کستان کے تعلقات کو مزید وسعت دیں گے انھوں نے کہا کہ پاکستان امریکہ کا اہم اتحادی ملک ہے۔ اس کو تنہا نہیں چھوڑ یں گے بعد ازاں امریکی نائب وزیر خارجہ جوزف بائیڈن نے چیف آف آرمی سٹاف جنرل اشفاق پرویز کیانی سے جی ایچ کیو میں ملاقات کی ملاقات میں پاک امریکہ سٹریٹیجک تعلقات اور دہشت گردی کے خلاف جنگ پر تبادلہ خیال کیا گیا

٭۔ ۔ ۔ تماثیل تھیٹر اور ٹریفک سنگنل بند ہونے کے باعث کوئی نہیں جانی نقصان نہیں ہوا ، دھماکہ سے سوئی گیس پائپ لائن پھٹ گئی

لاہور۔ صوبائی دارلحکومت لاہور میں الفلاح تھیٹر کے اندر چار بم دھماکوں کے کچھ ہی دیر بعد فیروز پور روڈ پر واقع تماثیل تھیٹر کے باہر پانچواں دھماکہ ہوا جس کے نتیجہ میں سوئی گیس کی پائپ لائن پھٹ گئی اور بنک آف پنجاب کے شیشے ٹوٹنے کے علاوہ تماثیل کے بالمقابل واقع پٹرول پمپ کی مشین کو بھی نقصان پہنچا ۔ تھیٹر اور ٹریفک کا اشارہ بند ہونے کے باعث کوئی شخص زخمی یا ہلاک نہیں ہوا ۔ تفصیلات کے مطابق ریسکیو ٹیمیں ابھی الفلاح تھیٹر کے دھماکوں سے فارغ نہیں ہوئیں تھیں کہ فیروز پور روڈ پر واقع تماثیل تھیٹر کے باہر دھماکہ کی اطلاع ملی ۔جس پر پولیس اور ریسکیو ٹیمیں فوری طور پر جائے وقوعہ پر پہنچیںاور فیروز پور روڈ کو ٹریفک کے لئے بند کر دیا گیا ۔ دھماکہ کے وقت مزنگ چونگی کی جانب سے تھیٹر کی طرف آنے والی ٹریفک کا اشارہ بند ہونے کے باعث کوئی جانی نقصان نہیں ہوا اور نہ ہی کوئی شخص زخمی ہوا ۔ پولیس کے مطابق یہ دھماکہ بھی الفلاح تھیٹر میں ہونے والے دھماکوں جیسا تھا تا ہم سڑک پر رکھا ہوا یہ کریکرجس وقت پھٹا ارد گرد کوئی شخص نہیں تھا جس سے قریبی سوئی گیس لائن کا پائپ پھٹ گیا اور تیزی سے گیس کی لیکج شروع ہوگئی۔ اطلاع ملنے پر ریسکیو 1122 ، سول ڈیفنس ، ایدھی ایمبولینسیں، بم ڈسپوزل یونٹس اور فائربریگیڈ کا عملہ موقعہ پر پہنچ گیا اور امدادی کام شروع کر دیئے ۔

٭۔ ۔ ۔ دھماکے شوشروع ہونے سے پہلے ہوئے ہال میں کوئی تماشائی موجود نہیں تھا، امدادی کاموں کی ڈی سی او لاہور نے نگرانی کی

لاہور۔ مال روڈ لاہور پر واقع الفلاح تھیٹرکے اندر یکے بعد دیگرے چار بم دھماکوں کے نتیجہ میں چار افراد زخمی ہو گئے ، تھیٹر لاک ہونے کے باعث کوئی جانی نقصان نہیں ہوا ۔جبکہ ڈی سی او لاہور سجاد بھٹہ کے مطابق ان دھماکوں میں کوئی بھی شخص زخمی نہیں ہوا ۔پولیس نے جائے وقوعہ سے دو مشتبہ افراد کو گرفتار کر لیا جن میں سے مشتاق صوفی نامی شخص کا تعلق پتوکی سے بتایا جاتا ہے ۔ تفصیلات کے مطابق محرم الحرام کی چھٹیوں کے بعد الفلاح تھیٹر میں شو کے لئے بکنگ جاری تھی اور شو شروع ہونے میں کچھ وقت باقی تھا کہ بکنگ کلرکوں کے قریب ہونے والے دھماکہ سے ریسکیو کے مطابق چار افراد معمولی زخمی ہو گئے جبکہ کچھ افراد کو معمولی خراشیں آئیں۔دھماکوں کے بعد ڈی سی او سجاد بھٹہ فوری طور پر موقعہ پر پہنچ گئے جبکہ پولیس نے مال روڈ کو فوری طور پر ٹریفک کے لئے بند کر دیا اورریگل چوک سے گورنر ہاؤس تک علاقہ کو سیل کر دیا گیا ۔ ریسکیو اور سول ڈیفنس کی ٹیموں نے موقعہ پر پہنچ کر کارروائی شروع کر دی اور اس موقع پر تربیت یا فتہ کتوں سے بھی مدد لی گئی ۔ ڈی سی او کے مطابق ہال کے تمام دروازے لاک تھے اور اندر کوئی تماشائی موجود نہیں تھا۔ جبکہ ایس پی لاہور سہیل سکھیرا کے مطابق اگر یہ دھماکے تماشائیوں کی موجودگی میں ہوتے تو خاصہ نقصان ہو سکتا تھا ۔ گرفتار کئے گئے مشتبہ افراد سے متعلق انہوں نے کہا کہ ان سے تفتیش کے بعد ہی اصل صورتحال سامنے آئے گی کہ آیا یہ افراد ان دھماکوں میں ملوث ہیں اور اگر یہ ملوث ہیں تو ان کے مقاصد کیا تھے۔ دھماکوں کے بعد لوگوں بڑی تعداد جائے وقوعہ پر جمع ہو گئی جبکہ بہت سے افراد ہال کے اندر جانے میں بھی کامیاب ہو گئے جس سے ریسکیو ٹیموں کو خاصی مشکلات کا سامنا کرنا پڑا اور وہ یہ تعین بھی نہ کر پائیں کہ کون سا دھماکہ کہا ںپر ہوا ہے ۔ بعض افراد کی طرف سے یہ بھی کہا گیا کہ یہ دھماکے کریکر پھینک کر کئے گئے ہیں ۔ ریسکیو ٹیموں کا کام ختم ہونے سے پہلے ہی ڈی سی او لاہور سجاد بھٹہ نے ہال سمیت علاقہ کو کلیر قرار دے دیا ۔ کچھ ہی دیر بعد پیپلز پارٹی کے صوبائی وزیر ثقافت تنویر الاسلام اور اشرف سوہنا بھی موقعہ پر پہنچ گئے اور اس بات اعادہ کیا کہ دہشت گرد اور سماج دشمن عناصر کسی بھی طور اپنے عزائم میں کامیاب نہیں ہونگے۔فتح ہر صورت عوام کی ہی ہو گی

حکومتی شخصیات کے بیانات اور موقف میںتضادات کی وجہ سے پوری دنیا میں پاکستان کی یوں جگ ہنسائی نہ ہوئی

مسلم لیگ ن کے مرکزی سیکرٹری اطلاعات کا بیان

اسلام آباد۔ پاکستان مسلم لیگ ن کے مرکزی سیکرٹری اطلاعات احسن اقبال نے کہا ہے کہ مسلم لیگ ن قومی اسمبلی کے 12 جنوری سے شروع ہونے والے سیشن کے دوران دیگر جماعتوں سے مشاورت اور اتفاق رائے پیدا کرنے کے بعد 17 ویں ترمیم کے خاتمے کا بل قومی اسمبلی میں مشترکہ طور پر پیش کر دے گی تاکہ ملک میں حقیقی جمہوری پارلیمانی نظام اور پارلیمنٹ کی خود مختاری یقینی بنائی جا سکے۔ انھوں نے کہا کہ جنرل مشرف کی جانب سے محض اپنے ذاتی اقتدار کے دوام اور تحفظ کی خاطر منظور کروائی کی گئی 17 ویں ترمیم کی وجہ سے اہم آئینی اداروں کے درمیان عدم توازن نے ایک بار پھر ملک کے اہم ستونوں کے درمیان بد اعتمادی اور بے ربطگی کی فضا پیدا کر دی ہے جو کہ جمہوریت کے لیے کسی بھی وقت خطرناک ثابت ہو سکتی ہے۔ انھوں نے کہا کہ اگر پارلیمنٹ کو خود مختار نہ بنایاگیا اور ایگزیکٹو اختیارات وزیر اعظم کو منتقل نہ کئے گئے تو ملکی سیاست ایک بار پھر 80 اور 90 کی دہائی میں واپس چلی جائے گی جو کہ پاکستانی قوم کے لیے کسی بھی بڑے المیے سے کم نہیں ہو گا۔ احسن اقبال نے کہا کہ اگر مقننہ آزاد ہوتی اور تمام فیصلے ملک کے منتخب وزیر اعظم کے ذریعے کئے جاتے تو اجمل قصاب کے حوالے سے اہم حکومتی شخصیات کے بیانات اور موقف میں تضادات کی وجہ سے پوری دنیا میں پاکستان کی یوں جگ ہنسائی نہ ہوتی اور بھارت کو عالمی سطح پر ہماری بد نامی کا موقع میسر نہ آتا۔ احسن اقبال نے کہا کہ مسلم لیگ ن ملک میں جمہوری اداروں کی مضبوطی، آئین کی بالا دستی اور عدلیہ کی آزادی کے لیے شخصی یا جماعتی مفادات اور وابستگیوں سے بالا تر ہو کر اصولی جدوجہد کر قانون کی عمل داری ہی ہے اور اس سلسلے میں قومی اتفاق رائے اور اعتماد سازی قائم کرنے کی خاطر تمام سیاسی جماعتوں سے رابطہ کیا جا رہا ہے اور ق لیگ کے بعض ذمہ داران کی مسلم لیگ ن کی قیادت کے ساتھ ملاقاتیں بھی اسی سلسلے کی کڑی ہیں۔ انھوں نے کہا کہ مسلم لیگ ن کے ق لیگ کے ساتھ روابط پارٹیوں کے ادغام کے لیے نہیں بلکہ 17ویں ترمیم کی تنسیخ اورآئین سے جنرل مشرف کی باقیات کے خاتمے کے لیے پارلیمنٹ میں مشترکہ لائحہ عمل اختیار کرنے کے لیے ہیں۔ مولانا فضل الرحمان کی جانب سے نواز شریف کی سیاست پر تنقید اور ’’ ان کی سیاست سمجھ سے با لاتر ہے‘‘ کے بیان میں تبصرہ کرتے ہوئے احسن اقبال نے کہا کہ مولانا محترم جناب نواز شریف کی سیاست کوبھلے نہ سمجھ سکیں مگر پوری قوم خود مولانا صاحب کی بجائے شخصیات کی مضبوطی کے قائل ہوتے تو عین ممکن تھا کہ وطن واپسی سے لے کر آج دن تک ان کے اور جناب شہباز شریف کے سر پر نا اہلی کی ننگی تلوار نہ لٹک رہی ہوتی اور نہ ہی مسلم لیگ ن قوم کے ساتھ کئے گئے وعدوں کے ایفا نہ ہونے کی وجہ سے اقتدار سے علیحدگی اختیار کرنے پر مجبور ہوتی۔ انھوں نے کہا کہ کراچی میں آتشزدگی کی آزادانہ تحقیقات کرائی جائیں اور اس بات کا پتہ لگایا جائے کہ کہیں غریب جھگی والوں کی تباہی کے پیچھے لینڈ مافیا کا ہاتھ تو نہیں انھوں نے حکومت سے مطالبہ کیا کہ اس حادثے کے متاثرین کو از سر نو بحال کرنے کے لیے تمام ممکن اقدامات کئے جائیں