Urdu News-Online Urdu Newspaper

المبحوح کے حالیہ قتل میں اگر اسرائیل ملوث ہوا تو نیتن یاہو ہی نے اس کی ہلاکت کا حکم جاری کیا ہو گا
دبئی ‘ دبئی پولیس نے کہا ہے کہ حماس کے بانی رکن المبحوح کے حالیہ قتل میں اگر اسرائیل کا ہاتھ ہے تو وہ اسرائیلی وزیرِ اعظم کی گرفتاری کے وارنٹ جاری کریں گے۔پولیس ذرائع کا کہنا ہے کہ اگر اسرارئیل اس قتل میں ملوث ہوا تو نیتن یاہو ہی نے اس کی ہلاکت کا حکم جاری کیا ہو گا۔ اسرائیل حکام نے اس قتل کی تصدیق کرنے یا اس میں ملوث ہونے سے انکار کیا ہے۔دبئی پولیس کا کہنا ہے کہ انہیں زیادہ شبہ ایک پیشہ ور مجرم گروہ کے ان ارکان پر ہے جن کے پاس یورپین پاسپورٹ تھے اور جو المبحوح کی سرگرمیوں کی نگرانی کر رہے تھے۔ حماس نے کہا ہے کہ المبحوح کے قاتل ان کے قتل سے کئی دن قبل اسرائیلی وزیر اوزی لینڈاؤ کے ساتھ عرب امارات پہنچے تھے

بغداد ‘ عراق کے شہر کربلا میں دو خودکش بم حملوں میں 41 افراد جاں بحق اور 150زخمی ہو گئے ہیں۔ پولیس نے بتایا ہے کہ شہر کے باہر پل کے دونوں اطراف بم سے حملے کیے گئے بعض اطلاعات کے مطابق بم دھماکوں کے بعد مارٹر گولے بھی فائر کیے گئے ۔رواں ہفتہ کے دوران دوسرے دو حملوں میں 60 زائرین جاں بحق ہوئے ۔ حکام کا خیال ہے کہ یہ دھماکے القاعدہ اور صدام حسین کی بعث پارٹی نے کیے ہیںکربلامیں حفاظتی انتظامات کے لیے فوج اور پولیس کے تقریباً 30 ہزار اہلکار تعینات کیے گئے تھے ۔

بغداد ‘ عراقی شہر کربلا میں دو کار بم دھماکوں میں ستائیس زائرین جاں بحق جبکہ 75 زخمی ہوگئے۔ عراقی پولیس کے مطابق دونوں کار بم دھماکے کربلا میں زائرین کے قافلے کے قریب ہوئے۔ جس کے نتیجے میں بیس زائرین موقعے پر ہی جاں بحق ہوگئے۔ پولیس حکام کے مطابق زخمیوں میں سے اکثر کی حالت تشویشناک ہے۔ جاں بحق ہونے والوں کی تعداد بڑھنے کا خدشہ ہے۔ پولیس کے مطابق زخمیوں کو طبی امداد دی جارہی ہے

سیٹلائٹ کے بعد جلد خلاء ء باز بھی خلائء میں روانہ کیے جائیں گے۔ احمد ی نژاد
واشنگٹن+ تہران ‘ امریکہ نے ایران کی جانب سے سیٹلائٹ راکٹ کی خلاء میں روانگی کو اشتعال انگیز اقدام قرار دیا ہے جبکہ ایرانی صدر محمود احمدی نژاد نے توقع ظاہر کی ہے کہ سیٹلائٹ کے بعد جلد خلاء باز بھی خلاء میں روانہ کیے جائیں گے۔ سرکاری ٹی وی کے مطابق ایران نے خلاء میں سیٹلائٹ روانہ کیا ہے جس کے ذریعے پہلی بار کچھوے سانپ اور چوہے بھیجے گئے ہیں جس پر خلاء میں ہونے والی تبدیلیوں کا مشاہدہ کیا جائے گا جبکہ تہران میں تین نئے سیٹلائٹس کے افتتاح اور خلائی ٹیکنالوجی کی کامیابیاں سامنے لانے کے لیے خصوصی تقریب منعقد کی گئی ۔ تقریب سے خطاب کرتے ہوئے ایرانی صدر محموداحمدی نژاد نے کہا کہ سائنس اور ٹیکنالوجی کے لیے دنیا پر مغربی ممالک کا قبضہ ختم کیا جا سکتا ہے ۔ ایران نے خلاء میں جانوروں کو بھیج کر اہم کامیابی حاصل کی ہے ۔ اور امید ہے کہ جلد خلاء باز بھی خلاء میں بھجوائے جائیں گے۔ دوسری جانب امریکہ نے سیٹلائٹ کی روانگی کو اشتعال انگیز قرار دیا ہے۔

بغداد ‘ عراق میں کربلا کے نزدیک بم دھماکے سے بیس زائرین جاں بحق اور سو سے زیادہ زخمی ہو گئے دھماکہ چہلم امام حسین میں شرکت کے لئے جانے والے زائرین کے قافلے میں ہوا۔ بم ایک موٹر سائیکل میں نصب تھا زخمیوں کو ہسپتال پہنچایا گیا ہے جہاں کئی کی حالت نازک بتائی جاتی ہے۔ادھر مختلف شہروں سے زائرین قافلوں کی شکل میں کربلا پہنچنا شروع ہو گئے جمعے کو چہلم امام حسین کے موقع پر لاکھوں افراد کی کربلا آمد متوقع ہے جس کے باعث کربلا اور اس کے اطراف کے علاقوں میں سیکورٹی بڑھا دی گئی ہے پولیس کی اضافی چیک پوسٹیں قائم ہیں اور فوج بھی تعینات کی گئی ہے

تہران ‘ ایران نے خلاء میں سیٹلائٹ لے جانے والے راکٹ کا کامیاب تجربہ کیا ہے ۔ ایران کے سرکاری ٹی وی کے مطابق ایران نے خلائی راکٹ کا کامیاب تجربہ کیا ہے ۔ یہ راکٹ خلاء میں سیٹلائٹ لے جانے کی صلاحیت رکھتا ہے ۔ ایران نے ایک سال پہلے اپنے دفاع کے لئے تیار کردہ ایک سیٹلائٹ کو کامیابی سے خلاء میں بھیجا تھا

شیل غزہ میں اقوام متحدہ کے احاطے پر داغے گئے تھے ، ذمہ دار دو فوجی افسروں کی سرزنش کی گئی
اسرائیل کا یہ انکشاف گولڈ سٹون رپورٹ کے ردِ عمل میں سامنے آیا ہے
اسرائیلی فوج اب تک سفید فاسفورس کے استعمال کے ضابطوں کی خلاف ورزی سے انکار کرتی رہی ہے
مقبوضہ بیت المقدس‘ اسرائیل نے انکشاف کیا ہے کہ گذشتہ سال غزہ پر کئے جانے والے حملے کے دوران سفید فاسفورس کے شیل داغے گئے۔یہ شیل غزہ میں اقوام متحدہ کے احاطے پر داغے گئے تھے اور اسرائیل نے اس پر شیل ذاغنے کے ذمہ دار دو فوجی افسروں کی سرزنش کی ہے۔اسرائیل کا یہ انکشاف گولڈ سٹون رپورٹ کے ردِ عمل میں سامنے آیا ہے۔ اس سے پہلے اب تک اسرائیلی فوج سفید فاسفورس کے استعمال کے ضابطوں کی خلاف ورزی سے انکار کرتی رہی ہے۔غزہ پر22 دن تک جاری رہنے والے اس حملے کے دوران ذرائع ابلاغ کے ذریعے ایسی تصاویر سامنے آتی رہی تھیں جن میں اقوام متحدہ کے احاطے پر سفید فاسفورس کے شیل گرتے ہوئے دیکھے جا سکتے تھے۔اسرائیلی میڈیا میں ان افسران کے نام غزہ ڈویڑن کمانڈر بریگیڈئر جنرل ایال ایزنبرگ اور بریگیڈ کمانڈر کرنل ایلان مالکا بتائے جا رہے ہیں۔رپورٹ میں کہا گیا ہے کہ ’ توپ خانے نے جنگ کے ضابطوں کی خلاف ورزی کرتے ہوئے ایک ایسے علاقے پر متعدد گولے داغے جہاں کثیر آبادی تھی۔غزہ میں اقوام متحدہ کے دفاتر حملے کے دوران بھی کام کر رہے تھے ۔رپورٹ میں مزید کہا گیا ہے کہ ان افسروں کے خلاف کارروائی اس لیے کی گئی ہے کہ ان افسروں نے 15 جنوری 2009 کو حملے کے دوران ایسے ہتھیاروں کے استعمال کا حکم دیا جس کا انہیں اختیار نہیں تھا۔مذکورہ افسر اپنے موجودہ عہدوں پر برقرار رہیں گے تاہم اسرائیلی افواج کے ترجمان کا کہنا ہے کہ یہ سرزنش ان افسروں کے ریکارڈ پر رہے گی اور اگر یہ افسر ترقی کی درخواست کریں گے تو اس سرزنش کو سامنے رکھا جائے گا۔غیر ملکی خبر رساں ادارے کے مطابق بریگیڈیئر جنرل ایزنبرگ اب بھی غزہ ڈویژن کی کمانڈ کر رہے ہیں جب کے کرنل مالکا کو تبدیل کر کے غرب اردن میں لگا دیا گیا ہے۔

امریکی فوجی جدید ترین میزائل دفاعی نظام سے لیس بحری جہاز خلیج فارس میں عرب ریاستوں کے ساحلوں پر لنگر انداز کررہی ہے ۔حکام
واشنگٹن‘ امریکہ نے خلیج فارس میں بڑھتے ہوئے ایرانی خطرے کے خدشات کے باعث 4 ممالک میں میزائل دفاعی نظام کی تنصیب کا کام شروع کردیا ہے ۔ ایک معروف امریکی اخبار کے مطابق امریکی فوج خلیج فارس میں عر ب ریاستوں کے ساحلوں پرخصوصی بحری جہاز لنگر انداز کرر ہی ہے جو جدید ترین میزائل دفاعی نظام سے لیس ہیں ۔ اخبار نے امریکی فوجی حکام کے حوالے سے بتایا ہے کہ امریکہ نے ایران پر ممکنہ طور پر مزید پابندیوں کے بعد پیدا ہونے والی صورت حال سے نمٹنے کے لیے پیشگی تیاریاں شروع کردی ہیں۔ اخبار نے دعوی کیا ہے کہ ان اقدامات کا مقصد اسرائیل کو یہ باور کرانا ہے کہ امریکہ ایرانی خطرے سے نمٹنے کی صلاحیت رکھتا ہے اور اسرائیل کو ایرانی ایٹمی تنصیبات پر حملے کی ضرورت نہیں۔

بغداد ‘ عراق میں خودکش حملے میں 2 افراد ہلاک اور 23 زخمی ہوگئے ۔ پولیس کے مطابق خودکش بمبار نے سامرہ شہر میں ایک کیفے میں خود کو دھماکے سے اڑا دیا جس کے باعث 2 افراد ہلاک اور 23 زخمی ہو گئے۔ خود کش حملے کی ذمہ داری کسی گروپ نے قبول نہیں کی ۔

واشنگٹن ‘ امریکی سینٹ نے ایران کے خلاف نئی پابندیوں کا بل منظور کر لیا ہے ۔ دوسری جانب امریکہ جوہری ہتھیاروں کو جدید بنانے کے لئے 7 ارب ڈالر خرچ کرے گا ۔ بل کے تحت ایران ریفائن پٹرولیم مصنوعات برآمد نہیں کر سکے گا جبکہ اس قانون کی خلاف ورزی کرنے والی کمپنیوں پر بھی پابندی عائد کر دی گئی ۔ بل کی منظوری سے امریکی مارکیٹ میں ایرانی قالین ‘ خشک میوہ جات اور مچھلی کے اچار کی فروخت پر بھی پابندی لگا دی گئی ہے ۔ سینٹ میں گفتگو کرتے ہوئے ڈیموکریٹک رکن کرسی ڈوٹ کا کہنا تھا کہ بل کا مقصد ایران کو اپنا ایٹمی پروگرام بند کرنے پر مجبور کرنا ہے ۔ ان کا کہنا تھا کہ ایران کی موجودہ حکومت نہ صرف اپنے ملک میں انسانی حقوق کی شدید خلاف ورزیوں کی مرتکب ہوئی ہے بلکہ وہ مشرق وسطیٰ میں دہشت گردوں کی مدد بھی کر رہی ہے ۔ سینٹ کے بعد ایوان نمائندگان سے منظوری کے بعد حتمی منظوری کے لئے صدر اوبامہ کو بھیجا جائے گا جس کے بعد یہ باقاعدہ قانون بن جائے گا ۔ امریکی نائب صدر جوبائیڈن کا کہنا ہے کہ آئندہ 5 سالوں میں جوہری ہتھیاروں کے بجٹ کو مزید 5 ارب ڈالر بڑھایا جائے گا ۔ انہوں نے کہا کہا کہ مشکل معاشی حالات کے باوجود امریکی سیکورٹی کو یقینی بنانا ہو گا