Urdu News - Online Urdu News Paper

لاہور۔ پاکستان کرکٹ بورڈ نے قومی کرکٹ ٹیم کے 26کھلاڑیوں کو سینٹرل کنٹریکٹ دینے کا اعلان کردیا ہے۔ جن میں اے کیٹگری میں نو کھلاڑی بی کیٹگری میں چار کھلاڑی اور سی کیٹگری میں 13 کھلاڑی شامل ہیں۔کھلاڑیوں کو سینڑل کنٹریکٹ دینے کا اعلان کرتے ہوئے پی سی بی کے چیف آپریٹنگ آفیسر سلیم الطاف نے بتایا کہ آئندہ جمعہ سے کھلاڑیوں کو سینٹرل کنٹریکٹ دستاویزات جاری کرنے کا کام شروع ہوجائے گا جس میں ان کی سابقہ مراعات کو برقرار رکھا گیا ہے۔ جبکہ ٹیسٹ میچ کی فیس بڑھا کر ساڑھے تین لاکھ روپے کردی گئی ہے۔انہوں نے بتایا کہ سری لنکا کی جانب سے ہمیں تاحال ٹیسٹ اور ایک روزہ میچوں کی سیریز الگ وقت میں کھیلنے کی باقاعدہ تفصیل موصول نہیں ہوئی۔ ان کا کہنا تھا کہ شیڈول کے مطابق آسٹریلیا کو اپریل میں ایک روزہ میچوں کی سیریز کھیلنے کے لیے پاکستان آنا ہے جبکہ تین ٹیسٹ میچوں کی سیریز کھیلنے کے لیے آسٹریلیا آئندہ برس پاکستان آئے گی۔پی سی بی کی جانب سے جاری کردہ سینٹرل کنٹریکٹ میں شامل کھلاڑیوں کی تفصیل کے مطابق اے کیٹگری میں شعیب اختر ، یونس خان ، دانش کنیریا ، شاہد آفریدی ، کامران اکمل ، شعیب ملک ، مصباح الحق ، سلمان بٹ ، عمر گل شامل ہیں جبکہ بی کیٹگری میں یاسر حمید ، فیصل اقبال ، محمد حفیظ ، سہیل تنویر شامل ہیں اور سی کیٹگری میں راؤ افتخار ، عبد الرحمان ، یاسر عرفات ، فواد عالم ، خرم منظور ، سعید اجمل ، سہیل خان ، وہاب ریاض سمیع اللہ خان نیازی ، سرفراز احمد ، ناصر جمشید ، عمر امین اور اظہر علی شامل ہیں۔

اسلام آباد۔ پاکستان کرکٹ بورڈ نے بھارتی کرکٹ ٹیم کا دورہ پاکستان نہ کرنے پر قومی انڈر 19 کرکٹ ٹیم کو بھارت بھیجنے سے انکار کر دیا ہے ایک انٹرویو میں جونئیر سلیکشن کمیٹی کے چئیرمین محمد الیاس نے بتایا کہ قومی انڈر 19 کرکٹ ٹیم کے رواں ماہ شروع ہونے والے بھارتی دورہ کو منسوخ کر دیا گیا ہے۔ انہوں نے کہا کہ انڈر نائٹین ٹیم کے دورہ بھارت کے متبادل کے طور پر اب انگلینڈ ،ساؤتھ افریقہ اور آسٹریلیا کرکٹ بورڈ سے مذاکرات کیے جا رہے ہیں۔ایک سوال کے جواب میں محمد الیاس کا کہنا تھاکہ بھارتی کرکٹ ٹیم کے پاکستان کا دورہ منسوخ کرنے سے خطے میں کرکٹ سمیت دیگر کھیلوں کو شدید نقصان پہنچا ہے

ٹیم کے سابق 3 کپتانوں نے موجودہ ٹیم کپتان کی حمایت کا اعلان

لندن ۔ انگلینڈ کرکٹ ٹیم کے سابق کپتانوں ڈیوڈ گاور ، ایلک اسٹیورٹ اور ناصر حسین کا کہنا ہے کہ موجودہ کپتان کیون اور کوچ پیٹر مورز کے درمیان جاری سرد جنگ میں جیت پیٹرسن کی ہو گی ۔ سابق کپتان ڈیوڈ گاور کے خیال میں اس تمام قصے میں زیادہ نقصان کوچ مورز کا ہوگا کیونکہ انگلینڈ کی کارکردگی اسی وقت بہتر ہوئی جب کپتانی کا تاج پیٹرسن کے سر پر رکھا گیا وہ ابھی کپتانی میں نئے ضرور ہیں مگر ایک اچھے کھلاڑی ہیں ، جن کو بورڈ کی پشت پناہی حاصل ہو جائے گی۔ انہوں نے کہاکہ کپتان ، کوچ کے مقابلے میں زیادہ طاقتور ہوتا ہے اور اس کا فیلڈ پر اپنی ٹیم سے مطمئن ہونا بے حد ضروری ہے۔ سابق کپتان ایلک اسٹیورٹ اور ناصر حسین کے خیالات بھی گاور سے ملتے جلتے ہیں ۔ دونوں کے بقول کپتان اور کوچ کے درمیان اچھے تعلقات سے ٹیم کو فائدہ ہوتا ہے اور اگر ایسا نہیں تو پھر بورڈ کو دونوں میں سے ایک کو فارغ کرنا پڑے گا۔ دونوں کا ماننا ہے کہ پیٹرسن کا پلہ اس لڑائی میں بھاری ہے ۔ اس ماہ کے آخر میں شروع ہونے والے ویسٹ انڈیز ٹور کے بعدانگلینڈ اور ویسٹ انڈیز کی ٹیمیں انگلینڈ میں مد مقابل ہوں گی جس کے بعد آسٹریلیا کی ٹیم سے کیون پیٹرسن الیون ایشنز کیلئے جنگ لڑے گی۔

بھارتی بورڈ یہ سیریز کرا کر سیاست کر رہا ہے ،ون ڈے سیریز کی منصوبہ بندی کھلی سیاست ہے۔ یہ واقعات کھیل کے مفاد میں نہیں ہیں۔مدن لعل

اسلا م آباد ۔ بھارتی کرکٹ کنٹرول بورڈ نے پاکستان کے دورے سے انکار کردیا لیکن اب وہ ’’سیاسی کھیل‘‘ کھیل رہا ہے یہی وجہ ہے کہ وہ سری لنکا کے دورہ پاکستان پر اثرانداز ہونے کی کوششوں میں مصروف ہے۔ بھارتی کرکٹ ٹیم سری لنکا کے خلاف پانچ ون ڈے انٹرنیشنل کی سیریز کھیلے گی اس طرح سری لنکا کی ٹیم جو 19 جنوری کو آرہی تھی اب 15 فروری کے بجائے مزید تاخیر سے پاکستان کا دورہ کرے گی۔ بھارتی کرکٹ کنٹرول بورڈ کے ذرائع کے مطابق بھارت اور سری لنکا کے درمیان پانچ ون ڈے میچوں کی تجویز ہے۔ سری لنکا کی ٹیم نے15 فروری کو پاکستان آنا تھا اب وہ 17 سے19 فروری کے درمیان پاکستان آئیں گے۔ بھارت کے سابق ٹیسٹ فاسٹ بولر مدن لال نے کہاکہ بھارتی بورڈ یہ سیریز کرا کر سیاست کر رہا ہے حالانکہ بورڈ اس کی تردید کرتا رہا ہے لیکن ون ڈے سیریز کی منصوبہ بندی کھلی سیاست ہے۔ یہ واقعات کھیل کے مفاد میں نہیں ہیں۔ مدن لال نے کہاکہ دونوں ممالک2011ء کا ورلڈ کپ مشترکہ کرا رہے ہیں اس قسم کے حالات ورلڈ کپ پر بھی اثرانداز ہو سکتے ہیں۔ بھارتی بورڈ نے سری لنکا کو دعوت دینے سے قبل بنگلہ دیش کو بھی مدعو کیا تھا۔ بھارتی بورڈ کا مقصد پاکستان کی انٹرنیشنل سیریز کو سبوتاژ کرنا ہے۔ پی سی بی کے چیف آپریٹنگ آفیسر سلیم الطاف نے موجودہ صورتحال پر تبصرہ کرنے سے انکار کردیا۔ انہوں نے کہاکہ پیر کو دورے کا شیڈول منظور ہونے کے بعد صورتحال واضح ہوگی۔ سری لنکا نے سیریز کو حتمی شکل دے دی تو پھر ہم اس کے بعد بنگلہ دیش کے خلاف پانچ ون ڈے اور ٹوئنٹی20 انٹرنیشنل کی تاریخیں طے کریں گے۔کولمبو پاکستان کی کرکٹ سیریز کی منسوخی کے باعث ہونے والے نقصان کے ازالے کے لئے سری لنکا کی ٹیم بھارت کے ساتھ ون ڈے سیریز کھیلنے کی منصوبہ بندی کر رہی ہے۔ سری لنکا کے وزیر کھیل گامینی کاکہنا ہے کہ اس بات کے60 فیصد امکانات ہیں کہ سری لنکا اور بھارت کے درمیان سیریز جلد ہوگی۔ ہمارے بھارتی کرکٹ بورڈ کے ساتھ کامیاب مذاکرات ہوئے ہیں اور دونوں بورڈز دورے کے پروگرام کو حتمی شکل دے رہے ہیں۔ بھارتی کرکٹ کنٹرول بورڈ نے بھی دورے کی تصدیق کی ہے۔ گزشتہ سال بھارتی ٹیم نے سری لنکا کا دورہ کیا تھا۔ سری لنکا کی ٹیم پاکستان کا دورہ کر کے دو ٹیسٹ، تین ون ڈے اور ایک ٹوئنٹی20 میچ کھیلنا چاہتی ہے۔ پاکستانی ٹیم نے3 مارچ سے بنگلہ دیش کا دورہ کرنا ہے اس لئے پاکستان، سری لنکا سیریز کی تاریخیں بنگلہ دیش سیریز سے متصادم ہیں۔

سیریز کے 3,3 میچز بھارت اور سری لنکا میں کھیلے جائیں گے

نئی دہلی ۔ بھارتی کرکٹ بورڈ نے سری لنکا کو بھارت کے خلاف چھ ایک روزہ میچوں کی سیریز کھیلنے کی پیشکش کردی ہے بی سی سی آئی نے پرکشش معاوضے کے عوض یہ سیریز فروری اور مارچ میں کھیلنے کی تجویز دی ہے ذرائع کے مطابق بھارتی کرکٹ ٹیم کے دورہ پاکستان کی منسوخی کے بعد پاکستان کرکٹ بورڈ نے قومی ٹیم کے لیے انٹرنیشنل کرکٹ یقینی بنانے کے لیے سری لنکا کو ہوم سیریز کے لیے مدعو کیا تھا ، سری لنکن بورڈ اس سیریز میں شرکت کی تصدیق بھی کر چکا ہے لیکن پروگرام کو حتمی شکل دینے میں سری لنکا کی جانب سے وقت مانگا گیا ہے جبکہ ذرائع کا کہنا ہے کہ اس سارے معاملے میں بی سی سی آئی ایک اہم کردار ادا کررہا ہے اور تازہ پیش رفت میں انڈین حکام نے سری لنکا کو بھارت سے چھ ایک روزہ میچز کھیلنے کی تجویز دی ہے بی سی سی آئی کی تجویز کے مطابق سیریز کے تین میچز بھارت اور تین میچز سری لنکا میں کھیلے جائیں گے اور بھارت کی خواہش ہے کہ یہ سیریز فروری اور مارچ میں کھیلی جائے ۔ فروری اور مارچ میں سری لنکا کی ٹیم کو پاکستان کے خلاف سیریز کھیلنی ہے اور بی سی سی آئی کی کرکٹ سری لنکا کو پیش کش اس بات کی نشاندہی ہے کہ انڈین حکام پاکستان کرکٹ کو نقصان پہنچانے کے لیے ہر ممکن کوششیں کررہے ہیں