Urdu News - Online Urdu News Paper

قراردادمیں فلسطینیوں کے مفادکا خیال نہیں رکھا گیا،حماس

اجلاس میں امریکہ کی عدم شرکت سے اسرائیل پر صحیح دباؤ نہیں ڈالا جا سکا، عرب سفارکاروں کاموقف

نیویارک+غزہ ۔ اقوام متحدہ کی سلامتی کونسل نے ایک قرار داد کے ذریعے غزہ میں فوری اسرائیلی جارحیت بند کرنے کا مطالبہ کیا ہے تاہم اسرائیل نے قرار داد کو مسترد کرتے ہوئے کہا ہے کہ وہ اس کے باوجود اپنے مفاد میں فوجی کارروائی جاری رکھے گا،جبکہ حماس نے بھی قراردادکوفلسطینیوں کے مفاد کے منافی قراردے کر مسترد کردیا ہے۔گزشتہ روز اقوام متحدہ کی سلامتی کونسل نے اتفاق رائے سے غزہ میں اسرائیلی حارحیت فوری طور پر جنگ بندکرنے کی منظوری دی ہے جس کے نتیجے میں غزہ کی پٹی سے اسرائیلی فوجوں کا مکمل انخلاء ہونے کی توقع تھی۔قرارداد کے مسودے میں غزہ میں بلارکاوٹ انسانی امداد بشمول خوراک،ایندھن اور طبی سہولیات مہیا کرنے پر زوردیا گیا ہے اورانسانی امداد کی بلاتعطل اورمسلسل فراہمی کے لئے محفوظ راستہ کھولنے اور کوئی دوسرا طریقہ کار اختیارکرنے کا بھی خیر مقدم کیا گیا ہے.تاہم امریکہ جو صہیونی ریاست اسرائیل کا پشتی بان اوربڑا اتحادی ہے قرارداد پر رائے شماری کے وقت اجلاس سے غیر حاضر رہا، تاہم اس نے اس قرارداد کو ویٹوبھی نہیں کیا۔ اس سے پہلے عرب اور مغربی ممالک کے وزرائے خارجہ کے درمیان طویل بحث ومباحثے کے بعد قرارداد کے مسودے پر اتفاق رائے ہواتھا. قرارداد کے حق میں ووٹ نہ ڈال کر امریکا نے ایک مرتبہ پھر اپنے اتحادی اسرائیل کا بھرپورساتھ دیا ہے جس پر بعض عرب سفارتکاروں نے اس خدشے کا اظہار کیا ہے کہ اس سے صہیونی ریاست پرقرارداد کی پابندی کے لئے دباؤ میں کمی ہوسکتی ہے اور وہ امریکا کی پشت پناہی سے فلسطینیوں پر حملے جاری رکھ سکتا ہے۔سفارتکاروں کے مطابق امریکی وزیرخارجہ کنڈولیزارائس نے قرارداد پررائے شماری سے قبل اسرائیلی وزیراعظم ایہود اولمرت اور صدر جارج ڈبلیو بش سے ٹیلی فون پر بات چیت کی تھی۔کنڈولیزارائس نے سلامتی کونسل کے اجلاس سے خطاب کرتے ہوئے کہا کہ امریکا قرارداد کی حمایت کرتا ہے لیکن وہ اس وجہ سے رائے شماری کے وقت اجلاس سے غیر حاضر رہا ہے کہ وہ مصر کی جانب سے ثالثی کی کوششوں کے نتائج دیکھنا چاہتا ہے۔وہ مصر کے صدر حسنی مبارک کی جانب سے اس ہفتے پیش کئے گئے جنگ بندی کے منصوبہ کا حوالہ دے رہی تھیں۔عرب ممالک کے نمائندوں کا اصرار تھا کہ سلامتی کونسل ایک لازمی پابندی کی حامل قرار داد منظور کرے جس کے تحت اسرائیل کو اس بات پرمجبور کیا جائے کہ وہ غزہ میں اپنی جارحانہ فوجی مہم فوری طور پر ختم کردے ۔قراردا د کی منظوری کے بعد اسرائیل نے اسے مسترد کر دیا اور کہا کہ وہ غزہ میں فوجی مشن جاری رکھے گا ۔ اسرائیلی وزیر اعظم ایہود اولمرٹ کے دفتر کی جانب سے جاری ہونے والے بیان میں کہا گیا ہے کہ فوج اسرائیلی شہریوں کے تحفظ کے لئے کارروائی جاری رکھے گی اور اسے جو مشن سونپا گیا ہے ،وہ پوراکرے گی۔اسرائیلی وزیراعظم کا کہنا تھا کہ فلسطینیوں نے جمعہ کو بھی راکٹ فائر کئے ہیں جس سے ظاہر ہوتا ہے کہ جنگ بندی مطالبہ قابل عمل نہیں ہے.اسرائیلی وزیر خارجہ زیپی لیفینی نے بھی قرار داد کو مسترد کرتے ہوئے کہا ہے کہ اسرائیل اپنے مفاد میں عمل کرے گا۔زیپی لیفینی نے ایک بیان میں کہا کہ اسرائیل نے ہمیشہ اپنے مفاد میں اقدامات کئے ہیں ۔اب بھی وہ اپنے مفاد میں ایسا کررہا ہے اور مستقبل میں بھی ایسا کرتا رہے گا،اسے اپنے شہریوں کے لئے سکیورٹی کی ضرورت ہے اور اسے اپنا دفاع کرنے کا حق حاصل ہے۔اسلامی تحریک مزاحمت حماس کے ایک ترجمان رافت مورا نے قرار داد پر تبصرہ کرتے ہوئے کہا کہ قرارداد فلسطینیوں کے بہترین مفاد میں نہیں ہے اس لئے یہ ہمارے بھی مفاد میں نہیں ہے۔ان کا کہنا ہے کہ قرارداد میں فلسطینیوں کی امنگوں اور خواہشات کو ملحوظ خاطر نہیں رکھا گیا

نیو یارک ۔ غزہ میں اسرائیل اور حماس کے درمیان فائربندی سے متعلق اقوام متحدہ کی سکیورٹی کونسل کی قرارداد نمبر 1860 کا متن حسب ذیل ہے:سلامتی کونسل صورتحال کی نزاکت پر زور دیتے ہوئے فوری اور پائیدار فائربندی کا مطالبہ کرتی ہے جس کا پورا احترام کیا جائے تاکہ غزہ سے اسرائیلی افواج کا مکمل انخلاء ہوسکے۔ سلامتی کونسل پورے غزہ میں انسانی امداد بشمول غذاء ، تیل اور طبی امداد کی بغیر کسی رکاوٹ کے ترسیل اور تقسیم کا مطالبہ کرتی ہے۔ سلامتی کونسل انسانی امداد کی بلا رکاوٹ تقسیم کے لیے انسانی امدادی راہداری اور دیگر طریقہ کار کے قیام اور شروعات کے لیے کی جانے والی کوششوں کا خیرمقدم کرتی ہے۔ سلامتی کونسل رکن ممالک سے اپیل کرتی ہے کہ وہ بین الاقوامی کوششوں کی حمایت کریں جو غزہ میں انسانی اور اقتصادی صورتحال کی بہتری کے لیے کی جارہی ہیں، اور (فلسطینیوں کے لیے اقوام متحدہ کے امدادی ادارے) یو این ڈبلیو آر اے اور ایڈ ہاک رابطہ کمیٹی کو بھی مزید امداد فراہم کریں۔ سلامتی کونسل تمام دہشت گرد کارروائیوں اور شہریوں کے خلاف تمام تشدد اور لڑائیوں کی مذمت کرتی ہے۔ سلامتی کونسل رکن ممالک سے اپیل کرتی ہے کہ پائیدار فائربندی اور امن کی کامیابی کے لیے غزہ میں انتظامات اور گارنٹیوں کی فراہمی کے لیے کوششوں میں تیزی کریں، ہتھیاروں اور بارود کی غیرقانونی منتقلی کو روکنے اور نقل و حرکت اور رسائی سے متعلق سن 2005 کے معاہدے کے تحت فلسطینی انتظامیہ (کے علاقوں) کے درمیان کراسِنگ پوائنٹوں کے مستقل کھولے جانے کو یقینی بنائیںاور اس بارے میں (سکیورٹی کونسل) مصر کے اقدامات اور علاقائی اور عالمی سطح پر اس طرح کے دیگر اقدامات کا خیرمقدم کرتی ہے۔سلامتی کونسل باہمی مفاہمت کی جانب فلسطینیوں کے ٹھوس اقدامات کی حوصلہ افزائی کرتی ہے، (اور) مصر اور عرب لیگ کی مفاہمتی کوششوں کی بھی جن کا ذکر چھبیس نومبر دو ہزار آٹھ کی قرارداد میں ہے، اور جو کہ سن دو ہزار آٹھ کی سکیورٹی کونسل کی قرارداد نمبر 1850 اور اس سے متعلق دیگر قراردادوں سے مطابقت رکھتی ہیں۔ سلامتی کونسل بین الاقوامی برادری اور فریقین سے تازہ اور فوری کوششوں کی اپیل کرتی ہے تاکہ اس علاقے سے متعلق اس وِڑن پر مبنی وسیع تر امن قائم ہوسکے جس کے تحت اسرائیل اور فسلطین دو جمہوری ریاستیں پرامن طور پر تسلیم شدہ سرحدوں کے اندر ساتھ ساتھ رہ سکیں، جن کے بارے میں سن دو ہزار آٹھ کی سکیورٹی کونسل قرارداد نمبر 1850 میں بات کی گئی ہے، (اور سکیورٹی کونسل) عرب امن مہم کو اہم سمجھتی ہے۔ سلامتی کونسل ماسکو میں سن 2009 میں ایک عالمی امن کانفرنس کی فریقین سے مشاورت کے بعد کوارٹیٹ (امریکہ، روس، یورپی یونین اور اقوام متحدہ) کی تجویز کا خیرمقدم کرتی ہے

اسلام آباد۔ صدر پاکستان آصف علی زرداری نے امریکہ کے نو منتخب نائب صدر مسٹر جوبائیڈن کو ہلال پاکستان ایوارڈ سے نوازا ہے۔ امریکی نائب صدر نے آج اسلام آباد میں صدر زرداری سے ملاقات کی، ملاقات میں علاقائی امور سمیت باہمی دلچسپی کے امور پر زیر غور آئے۔ ملاقات میں وزیر اعظم پاکستان سید یوسف رضا گیلانی ، وزیر خارجہ شاہ محمود قریشی پاکستان میں امریکی سفیر این ڈبلیو پیٹر سن اور سینٹر لینڈ سے گرلیم بھی موجود تھے۔ اس موقع پر مسٹر بلائیڈن نے پاکستانی عوام اور صدر پاکستان کا ایوارڈ دینے پر شکریہ ادا کیا

پاکستان میں جمہوری حکومت انتہا پسندی سے نمٹنے کے لئے بھرپور کوششیں کر رہی ہے

واشنگٹن۔ امریکا کی سینٹرل کمان کے سربراہ جنرل ڈیوڈ پیٹریاس نے کہا ہے کہ افغانستان میں جنگ جیتنے کے لئے غریب ممالک خصوصاً پاکستان کے مسائل کو سمجھنا ہو گا ۔ ایک دن آئے گا جب امریکا اور اس کے اتحادی ایران سے متعلق مشترکہ اور متفقہ مؤقف اختیار کر لیں گے۔واشنگٹن میں امریکی تھنک ٹینک سے خطاب کرتے ہوئے جنرل پیٹریا س کا کہنا تھا کہ افغانستان میں صورتحال آسان نہیں ہے اور آئندہ کئی سال تک وہاں مسائل ختم نہیں ہوں گے۔ ان کا کہنا تھا کہ افغانستان کے حالات کا انحصار براہ راست پاکستان پر ہے اور پاکستان کی شرکت اور مدد کے بغیر افغانستان سے متعلق کو ئی حکمت عملی کامیاب نہیں ہو سکتی۔ پیٹریا س نے کہا کہ پاکستان میں جمہوری حکومت انتہا پسندی سے نمٹنے کے لئے بھرپور کوششیں کر رہی ہے۔ایران کے بارے میں پیٹریا س کا کہنا تھا کہ ایک دن آئے گا جب امریکا اور اس کے اتحادی ایران سے متعلق مشترکہ اور متفقہ مؤقف اختیار کر لیں گے۔

اسامہ لکنی بے نظیر بھٹو کے قتل میریٹ ہوٹل پر حملے میں ملوث تھے ’’ واشنگٹن پوسٹ ‘‘ کی امریکی انسداد دہشت گردی حکام کے حوالے سے رپورٹ

واشنگٹن ۔ امریکی اخبار ’’ واشنگٹن پوسٹ ‘‘ نے دعویٰ کیا ہے کہ نئے سال کے آغاز پر پاکستان کے قبائلی علاقے میں امریکی میزائل حملے سے القاعدہ کے دو اہم کمانڈر مارے گئے ۔ ان میں القاعدہ راہنما سابق وزیر اعظم بے نظیر بھٹو پر قاتلانہ حملے اور میریٹ ہوٹل حملے میں ملوث تھے ۔ واشنگٹن پوسٹ نے امریکی انسداد دہشت گردی حکام کے حوالے سے انکشاف کیا ہے کہ یکم جنوری کو سی آئی اے کی نگرانی میں جنوبی وزیرستان کے علاقے کری کوٹ میں جاسوس طیارے کی کارروائی کے دوران القاعدہ کے پاکستان میں آپریشنل چیف اسامہ الکنی اوراس کا نائب شیخ احمد سلیم سوئیدان مارے گئے تھے ۔ یہ دونوں ایف بی آئی کی انتہائی مطلوب افراد کی فہرست میں شامل تھے ۔ کینیا سے تعلق رکھنے والے قائد محمد علی مسلام عرف اسامہ ایکنی امریکہ کو کینیا اور تنزانیہ میں اس کے سفارت خانوں پر حملوں کے الزام میں مطلوب تھا ۔ اسے 9/11 کے بعد افغان صوبہ زابل یں القاعدہ کا امیر مقرر کیا گیا تھا ۔ اس کے بعد اسے افغانستان ‘ پاکستان اور مشرقی افریقہ میں آپریشنل نگران مقرر کیا گیا تھا ۔ 2007 ء میں الکنی کو پاکستان میں آپریشنز کی کمان دی گئی ۔ اخبار نے حکام کے حوالے سے دعویٰ کیا ہے کہ دونوں پاکستان میں خودکش حملوں کے ماسٹر مائنڈ تھے ۔ اخبار کے مطابق امریکی حکام کا کہنا ہے کہ سابق وزیر اعظم بے نظیر بھٹو پر کراچی میں کارساز حملے اور میریٹ ہوٹل پر خودکش حملے میں بھی یہ دونوں ملوث تھے ۔ امریکی حکام کے مطابق القاعدہ کے پاکستان میں محفوظ ٹھکانے اب محفوظ نہیں اور تنظیم کے کئی رہنماؤں کا مارا جانا اس کے لئے شدید دھچکا ہے ۔