Urdu News-Online Urdu Newspaper

میانوالی ‘ پاکستان تحریک انصاف کے چیئرمین عمران خان نے کہا ہے کہ میانوالی سے شروع ہونے والا انقلاب سارے ملک میں پھیل جائے گا۔ پاکستان کو حقیقی معنوں میں اسلامی فلاحی مملکت بنائیں گے۔ ان خیالات کا اظہار انہوں نے سوموار کو جہازچوک میانوالی میں تحریک انصاف میانوالی ،بھکر اورخوشاب کے کسان اتحاد کے بجلی کی قیمتوں کے اضافے کے خلاف ایک بڑے احتجاجی مظاہرے سے خطاب کرتے ہوئے کیا۔ عمران نے کہا کہ سب سے پہلے فلاحی مملکت مدینہ میں قائم ہوئی تھی۔ مغرب میں فلاحی ریاست کا تصور مسلمانوں سے لیا مگر ہم نے اسے چھوڑ دیا دیا۔ موجودہ پاکستان کو قائد اعظم کا پاکستان بنانا ہمارے نصیب میں ہے۔اللہ کسی جرم کی سزا ہمیں صدر زرداری کی صورت میں دے رہے ہیں۔ زرداری اور نواز شریف بتائیں کہ سیاست پاکستان میں کر رہے ہیں۔ اور اپنا پیسہ ملک سے باہر کیوں رکھا ہے۔ میانوالی، بھکر اور خوشاب کے کسان اتحاد کو اپنے حقوق کیلئے اٹھ کھڑے ہونے پر مبارک باد پیش کرتا ہوں۔ حکومت میں آکر کسان کو خوشحال بنائیں گے۔ تاکہ ملک خوشحال ہو سکے۔ اگر کسانوں کے مسائل حل نہ کیئے گئے تو چار گناہ زیادہ لوگوں کے ساتھ اسلام آباد کی طرف مارچ کریں گے۔ میانوالی کے لوگوں کو خون سے ہوں اس لئے یہ لوگ میرے دل کے قریب ہیں۔ عوام سے کبھی جھوٹا وعدہ نہیں کیا۔ جو کہا ہے ہمیشہ پورا کیا ہے۔ ہم ہار سے ڈرنے والے نہیں۔ پھر سے عزم نو کے ساتھ الیکشن میں حصہ لیں گے۔ آنے والے انتخابات میں میانوالی کے دونوں حلقوں سے حصہ لیں گے۔ اس موقعہ پر تحریک انصاف میانوالی کے راہنما ڈاکٹر صلاح الدین نیازی، ظفر اللہ خان کے علاوہ تحریک انصاف کے دیگر راہنماؤں اور کسان اتحاد کے راہنماؤں نے خطاب کیا۔ اس موقع پر ہزاروں کی تعداد میں لوگ موجود تھے جو عمران خان کے حق میں اور حکومت کے مخالف سخت نعرہ بازی کر رہے تھے۔ عمران خان کابن حافظ موسیٰ خیل اور جہاز چوک میں زبردست احتجاج کیا گیا۔

اسلام آباد ‘ تحریک انصاف کے سربراہ عمران خان نے کہا ہے کہ مسلم لیگ ن اورپیپلزپارٹی ذاتی مفادات کے تحفظ کیلئے نظام اور جمہوریت بچانے کی آڑ لے رہے ہیں عوام دونوں جماعتوں کی سیاست سے آگاہ ہوچکے ہیں اور ان کے اصل چہرے بے نقاب ہورہے ہیں ایک انٹرویو میں انہوں نے کہاکہ ملک میں بدعنوانی ‘ لاقانونیت ‘ رشوت ‘ کرپشن کے نظام نے ملکی معیشت کو مفلوج کررکھا ہے ملک میں پھیلے ہوئے اس کینسر کاخاتمہ ضروری ہے انہوں نے کہا کہ میں نے ملک اور قوم کی بہتری کیلئے سیاست میں قدم رکھا انشاء اللہ ملک میں پھیلے ہوئے کینسر کاعلاج کرنے میں اپنی صلاحیتیں اور وسائل بروئے کار لاتے ہوئے عوامی حمایت سے اپنی جدوجہد جاری رکھونگا انہوں نے کہاکہ ملک میں اپوزیشن اور حکومت اپنا آئینی کردار ادا نہیں کررہے امریکہ کے کہنے پر فوج سے بندے مروانے اور ڈرون حملے سے دہشتگردی ختم نہیں ہوگی اس کا واحد حل مذاکرات ہیں انہوں نے کہا کہ میاں نوازشریف ہماری بات نہ ماننے سے مشکلات میں گھرے ہئے ہیں حکومت پنجاب بلدیاتی سسٹم میں انگریز کاقانون لانا چاہتی ہے جو ہمیں ہرگز قبول نہیں ایڈمنسٹریٹر لگانا غلط اقدام ہے ایک سوال کے جواب میں انہوں نے کہا کہ عدلیہ اورحکومت کے درمیان محاذ آرائی کے نتیجہ میں اگر حکومت فارغ ہوتی ہے تو اس کے ذمہ دار آصف علی زرداری ہوں گے جن کا اقدام اپنی حکومت پر ہی ڈرون حملہ تصور کیاجائیگا انہوں نے کہا کہ ہم اپنی جماعت کو منظم کررہے ہیں انشاء اللہ سیاست میں کامیاب ہو کرمعاشرے سے ناانصافی غربت جہالت کاخاتمہ کرکے انقلابی اورتعمیری تبدیلیاں لائیں گے اس وقت ملک کو صرف مخلص قیادت کی ضرورت ہے

سید یوسف رضا گیلانی بھی ڈیڈ لاک کے برابر کے ذمہ دار ہیں ۔ ۔
اسلام آباد ‘ پاکستان تحریک انصاف کے چیئرمین عمران خان نے کہا ہے کہ پوری قوم چیف جسٹس آف پاکستان کے ساتھ کھڑی ہے آصف علی زرداری اپنی کرپشن کو بچانے کیلئے ملک کا بیڑہ غرق کرنے پر تلے ہوئے ہیں تصادم میں صرف اور صرف آصف علی زرداری کا نقصان ہو گا۔ججز کی تقرری کے بارے میں صدارتی نوٹیفکیشن کے حوالے سے عمران خان نے کہا کہ این آر او کی بنیاد پر انتخابات ، این آر او زدہ صدر کی موجودگی میں تصادم کا ہی امکان تھا عمران خان نے کہاکہ ایسی صورتحال میں وزیراعظم سید یوسف رضا گیلانی سے امید تھی کہ وہ این آر او زدہ لوگوں سے خودکو الگ کریں گے مگر ایسا نہیں ہوا سپریم کورٹ کے فیصلے پر عملدرآمد میں رکاوٹ ڈال کر تصادم آگیا ہے اسی تصادم کی وجہ سے ڈیڈ لاک پیدا ہو گیا ہے جس کا حتمی نتیجہ عام انتخابات ہوں گے قوم چیف جسٹس کے ساتھ کھڑی ہے۔ ہم عدلیہ کے حق میں قوم کو متحرک کریں گے کیونکہ انصاف کے غیر جانبدارانہ نظام ہی حقیقی جمہوریت کا ضامن ہوتا ہے انہوں نے کہاکہ این آر اوکے بارے میں فیصلے آنے پر آصف علی زرداری کو مستعفی ہونا چاہیے تھا تصادم میں ایک ہی کا نقصان ہوگا وہ آصف علی زرداری ہوں گے۔

واز شریف وفادار ہیں تو اپنی دولت پاکستان میں لائیں،بے نظیر کے قاتلوں کو پیپلز پارٹی گرفتار نہیں کرسکی ہم کریں گے
چیئرمین پاکستان تحریک انصاف کا این اے 55میں اعجاز خان جازی کے انتخابی جلسے سے خطاب

راولپنڈی‘چیئرمین پاکستان تحریک انصاف عمران خان نے کہا ہے کہ مشرف،شوکت عزیزاور زرداری جیسے لوگ عوام سے وفاداری نہیں کرسکتے۔نواز شریف وفادار ہیں تو اپنی دولت پاکستان میں لائیں۔بے نظیر کے قاتلوں کو پیپلز پارٹی گرفتار نہیں کرسکی،ہم کریں گے،چورچور کا احتساب نہیں اس سے مک مکاکرتا ہے۔اعجاز خان جازی پارلیمنٹ میں آکرنورا کشتی نہیں لڑے گا بلکہ حقیقی اپوزیشن کا کردارادا کرے گا۔پارلیمنٹ میں آکر پہلی قرارداد پاس کرائیں گے جس کے مطابق وہ لوگ انتخابات میں حصہ نہیں لے سکیں گے جن کا پیسہ باہرممالک میں ہو۔پاکستان اور پاکستانیوں کا وقاردنیا بھر میں بڑھائیں گے۔امیروں سے ٹیکس لے کر غریبوں پرخرچ کریں گے۔تحریک انصاف تمام بڑے مگرمچھوں کا احتساب کرے گی۔ غربتٗ مہنگائی و بیروزگاری کا خاتمہ تحریک انصاف کا مقدر بن چکا ہے۔NA-55سے احتساب کا انقلاب شروع ہوچکا۔تحریک انصاف کے کارکنان گھرگھرپیغام پہنچائیں۔ ان خیالات کا اظہار انہوں نے جمعہ کی شام ریلوے ورکشاپ روڈ ڈھوک رتہ ،راولپنڈی میں این اے 55 سے تحریک انصاف کے امیدوار اعجاز خان جازی کے بڑے انتخابی جلسے سے خطاب کرتے ہوئے کیا۔ اس موقع پرتحریک انصاف کے مرکزی نائب صدر عامر محمود کیانیٗ مرکزی ایڈیشنل سیکرٹری جنرل سیف اللہ نیازیٗ میڈیا ایڈوائزر ٹو چیئرمین تحریک انصاف زاہد حسین کاظمیٗ این اے 55 کے امیدوار اعجاز خان جازیٗ تحریک انصاف پنجاب کے نائب صدر رانا سہیلٗ راولپنڈی ڈویژن کے صدر پروفیسر صداقت عباسیٗ ضلعی صدر فیاض الحسن چوہانٗ تحریک انصاف اسلام آباد کے صدر زیاد احمد عباسیٗ پی پی 14 کے صدر حاجی عطاء محمد خانٗ امجد علی خان اور ملک منیر سمیت دیگر عہدیداران اور کارکنان سمیت ہزاروں کی تعداد میں عوام موجود تھے۔ عمران خان نے کہا کہ جس ملک میں بڑے مجرم عہدوں پر بیٹھے ہوں اس ملک میں غریبوں کا بیڑہ غرق ہو جاتا ہے۔ کیونکہ چور چور سے مفاہمت اور مک مکا تو کر سکتا ہے لیکن اس کا احتساب نہیں کر سکتا ۔ آج پاکستان کی جیلوں میں کوئی طاقتور ڈاکو موجود نہیں بلکہ ملک کا سب سے بڑا ڈاکو صدر بن چکا ہے۔ 40 سال قبل پاکستان دنیا میں تیزی سے ترقی کرنے والا ملک تھا لیکن خود غرض،مطلب پرست اور بداعنوان حکمرانوں کی وجہ سے آج ہم دنیا میں ذلیل و رسوا ہوچکے ہیں۔غریب مررہا ہے اور امیر،امیرتر ہوتا جارہا ہے۔ ملک بچانے کے لئے انقلاب کی ضرورت ہے جس کا آغاز این اے 55 سے تحریک انصاف کے امیدوار اعجاز خان جازی کی کامیابی سے ہو گا۔ انہوں نے کہا کہ اعجاز خان جازی پارلیمنٹ میں پہنچ کر سب سے پہلے یہ قرار داد پیش کرے گا کہ جس شخص کا پیسہ اور جائیداد ملک سے باہر ہو وہ الیکشن لڑنے کا اہل نہیں کیونکہ جس شخص کا اپنا پیسہ اور جائیداد باہر ہو وہ کیسے ملکی مفاد میں فیصلہ کر سکتا ہے۔ہمیں شوکت عزیزسے سبق سیکھناچاہئیے۔ جو بھی اس قرار داد کی مخالفت کرے گا اور پاکستان اور اس کے عوام کا خیر خواہ نہیں ہو گا ۔ اعجاز خان جازی پارلیمنٹ سے پوچھے گا کہ بڑے بڑے سیاسی لیڈر کتنا ٹیکس دیتے ہیں۔مہنگائی روکنے کے لئے امیروں سے ٹیکس لینا ہوگا۔ پیپلز پارٹی کی حکومت بے نظیر کے قاتلوں کو نہیں پکڑ سکی یہ کام بھی تحریک انصاف ہی کا مقدر بن چکی ہے۔ بڑے مگر مچھوں کا احتساب کریں گے۔دوحکمرانوںنے ملک کو امریکہ کا غلام بنا دیاٗ ڈاکٹر عافیہ صدیقی سمیت کئی افراد ڈالروں کی خاطر امریکہ کے حوالے کئے۔ اپنے شہریوں اور لال مسجد میں عورتوں اور بچوں پر بمباری کروائی ۔ ملک کو امریکہ کی غلامی سے نجات بھی تحریک انصاف ہی کے نصیب میں لکھ دی گئی ہے۔ انہوں نے کہا کہ اس ملک میں وہی لیڈر تبدیلی لا سکتا ہے جو اپنی کشتیاں جلا کر آئے گا اور اس کا جینا مرنا پاکستان اور پاکستانی عوام کے لئے ہو گا۔تحریک انصاف کے امیدوار اعجاز خان جازی نے اپنے خطاب میں کہا کہ یہ نعروں کا نہیں، ملک بچانے کا وقت ہے۔ این اے 55 انقلاب کا وہ تالا ہے جس کی چابی عوام کے پاس ہے۔ اگر 24 فروری کو دیانتداری اور ایمانداری سے یہ تالا کھولا گیا تو نہ صرف گھروں کے چولہوں کی بدقسمتی بلکہ ملک کی بدقسمتی کا تالا بھی کھل جائے گا۔ ملک اور قوم کو عوام کے سینوں میں پیدا ہونیوالی بیداری اور عمران خان کی جواں ہمت قیادت ہی بچا سکتی ہے۔ ہم ایٹمی طاقت اور بہترین قوم ہیں۔ ہمارے فوجی جوان دنیا کی کسی بھی بڑی فوج کے مقابلے میں لڑنے کی صلاحیت رکھتے ہیںمگر بدقسمتی سے بہترین لیڈر ہمیں نہ مل سکا ۔ انہوں نے کہا کہ اب تبدیلی کا آغاز ہوچکا۔عمران خان کی صورت میں ہمیں وہ قائد مل گیا ہے جس کے سینے میں قوم کا درد ہے۔ عمران خان نہ صرف پاکستان بلکہ سارے اسلامی ممالک کی قیادت کرے گا

امیدواروں کی بجائے اپنے نظریے کی بنیاد پر انتخابات جتیں گے
موجودہ حکومدت پوری نہیں کرے گی ۔ کارکنان انتخابات کی تیاری کریں
پاکستان تحریک انصاف کے چیئر مین عمران خان کا پارٹی کارکنان سے خطاب

اسلام آباد ‘ پاکستان تحریک انصاف کے چیئر مین عمران خان نے کہا ہے کہ اسلام سمیت دنیا کے کسی نظام میں صدر کو آئین کے تحت استثنیٰ حاصل نہیں ہے ۔تحریک انصاف امیدواروں کی بجائے اپنے نظریے کی بنیاد پر انتخابات جیتے گی۔ پاکستان میں انقلاب کے لیے کارکنان کو تیار کر رہے ہیں۔ موجودہ حکومدت پوری نہیں کرے گی ۔ کارکنان انتخابات کی تیاری کریں۔ ان خیالات کا اظہار انھوں نے بدھ کے روز اسلام آباد میں پارٹی سیکرٹریٹ میں ضلع اسلام آباد کے نو منتخب عہدیداران سے خطاب کرتے ہوئے کیا۔اس موقع پر عمران خان نے نو منتخب عہدیداران میں ان کی تقرری کے نوٹیفکیشن بھی تقسیم کیے ۔ کارکنان سے خطاب کرتے ہوئے عمران خان نے کہا کہ میں نومنتخب عہدیداران کو مبارکباد پیش کرتا ہوں۔ ہم نچلی سطح تک تنظیم سازی کر کے ملکی تاریخ میں نئی مثال قائم کر رہے ہیں۔ تحریک انصاف کی نچلی سطح سے لے کر اوپر تک کی قیادت کارکنان منتخب کریں گے ۔ تحریک انصاف خاندانی نہیں بلکہ سیاسی اور جمہوری پارٹی بنے گی ۔ پارٹی میں ہر دو سال کے بعد صاف اور شفاف الیکشن کروائیں گے ۔ پارٹی کے کارکنان ہی اپنے حلقے کے لیے انتخابی امیدواروں کا انتخاب کریں گے ہم امیدواروں نہیں بلکہ اپنے نظریے کی بنیاد پر انتخابات جیتیں گے اور ملک میں انقلاب لائیں گے کیونکہ ملک کے اندر ایسا نظام چل رہا ہے جو غریب کے لیے تو قانون لاگو کرتا ہے لیکن امیر کے لیے کوئی قانون نہیں۔پاکستان کو انقلاب کی ضرورت ہے جس کے لیے کارکنان کو تیار کر رہے ہیں۔ انھوں نے کہا کہ آج غریب ٹیکس دے رہا ہے لیکن امیر ٹیکس چوری کرتا ہے ۔ ہم نے اس نظام کے خلاف جنگ کرنا ہے ۔ آج حکمران غیروں سے ڈالر لے کر اپنے لوگوں پر بمباری کر رہے ہیں۔ ہم قائد اعظم رحمتہ اﷲ علیہ کا پاکستان بنائیں جو ایک اسلامی فلاحی ریاست ہو گا۔ عمران خان نے کہا کہ موجودہ حکومت چلتی ہوئی نظر نہیںآتی کسی بھی وقت انتخابات ہو سکتے ہیں کارکنان الیکشن کی تیاری کریں۔ اسلام سمیت دنیا کے کسی نظام میں صدر کو کسی قسم کا استثنیٰ حاصل نہیں ہے ۔ قانون کے سامنے سب برابرنہیں۔ ریاست تعلیم کی ذمہ داری اپنے سرے اور ملک سے طبقاتی نظام تعلیم کا خاتمہ کیا جائے ۔ ریاست بے روزگاروں کو روزگار فراہم کرے ۔ انھوں نے کہا کہ آج پاکستان قرضوں کی دلدل میں ڈوبا ہوا ہے جس کی وجہ امیر طبقے کی طرف سے ملک کو لوٹنا اور ٹیکس چوری ہے ۔ کسانوں اور مزدوروں کو کچلا جا رہا ہے ۔انھوں نے کہا کہ ملک کے موجودہ حالات کی ذمہ دار عوام بھی ہے جو چھوٹی چھوٹی باتوں پر بک جاتی ہے ۔ قوم کو جگانا ہو گا کوئی بھی قوم بھیک مانگ کر زندہ نہیں رہ سکتی ۔ قومیں ہمیشہ قیادت اورعوام کے زور پر کھڑی رہتی ہیں۔

نارووال ‘ پاکستان تحریک انصاف کے چیئر مین عمران خان نے کہا ہے کہ حکومت ناکام ہو چکی ہے تحریک انصاف اقتدار میں آ کر اس نظام کو بدلے گی ۔ ان خیالات کا اظہار انہوں نے نارووال بائی پاس پر تحریک انصاف کے کارکنوں سے خطاب کرتے ہوئے کیا انہوں نے کہا کہ تحریک انصاف ظلم کا نظام نہیں چلنے دے گی ہم اس ملک میں بنیادی تبدیلی لانا چاہتے ہیں عوام مہنگائی اور بے روز گاری کی وجہ سے مر رہے ہیں اور حکمران عیاشیوں میں مصروف ہیں آج کرپٹ افراد بڑے بڑے عہدوں پر فائز ہو گئے اگر حکومت پانچ سال رہی تو ملک میں کچھ نہیں رہے گا عمران خان نے کہا کہ حکمران امریکی غلامی قبول کر چکے ہیں ڈرون حملے اور ڈاکٹر عافیہ صدیقی کا کیس اس کی مثالیں ہیں لیکن ہم امریکہ کے آگے سر نہیں جھکائیں گے ڈاکٹر عافیہ صدیقی پاکستان کی بیٹی ہے ہم حکومت سے مطالبہ کرتے ہیں کہ جن لوگوں نے اسے امریکہ کے حوالے کیا اسے انصاف کے کٹہرے میں لایا جائے انہوں نے کہا کہ اس وقت ملک میں پہلی مرتبہ عدلیہ اور میڈیا آزاد ہیں اور پاکستان کو قائد کے خوابوں کی تعبیر بنا کر دم لیں گے

٭۔ ۔ ۔ لندن میں بیٹھا لیڈر حکومت چلارہا ہے‘ حکمرانوں کو ’’میں‘‘ اور ’’خوف‘‘ کے بت سے نکلنا ہوگا
٭۔ ۔ ۔ اگر ڈاکٹر عافیہ کی جگہ کوئی امریکی خاتون ہوتی تو پورا مغرب اس کیلئے اٹھ کھڑا ہوتا‘جس قوم میں خودداری ختم ہو جائے اس میں اور بھیڑ بکریوں میں کوئی فرق نہیںہوتا: چیئرمین تحریک انصاف کی گفتگو

لاہور‘ چیئرمین تحریک انصاف کے عمران خان نے کہا ہے کہ المیہ کی بات ہے کہ حکومت کرپٹ بھی ہے اور نااہل بھی اور اپوزیشن نظام بچانے کے بہانے عوام کی نمائندگی نہیں کر رہی حالانکہ جمہوریت اور سسٹم عوام بچاتے ہیں۔ دونوں جماعتوں میں مک مکا ہوچکا ہے اور ایک دوسرے کو بچا رہے ہیں۔ موجودہ نظام مولانا فضل الرحمن سے بھی زیادہ مک مکا کا ہے۔ ان خیالات کا اظہار نجی کالج کی تقریب سے خطاب اور عبدالقادر حسن کالم نگار کی اہلیہ کی وفات پر فاتحہ خوانی کے بعد میڈیا سے گفتگو کرتے ہوئے کہی۔ انہوں نے کہا کہ ہمارے لیڈروں کو خوف ہے۔ کوئی قلعہ کے اندر بند ہے اور کوئی اپنی دولت بچانے پر لگا ہوا ہے۔ امریکہ کے خوف سے وہ اپنے لوگوں پر بمباری کر رہے ہیں۔ اگر ڈاکٹر عافیہ کی جگہ کوئی امریکی خاتون ہوتی تو پورا مغرب اس کیلئے اٹھ کھڑا ہوتا۔ صرف کرسی بچانے کیلئے ڈاکٹر عافیہ کو امریکہ کے حوالے کیا گیا۔ ایک بزدل آمر نے امریکہ کے خوف سے اور ڈالروں کے عوض ملک کو دہشت گردی کے حوالے کردیا اور دہشت گردی کے خلاف خوف کی پالیسی اپنائی گئی۔ کوئی دولت بچانے اور کوئی جان بچانے پر لگا ہوا ہے۔ انہوں نے کہا کہ لیڈر لندن میں بیٹھا ہوا ہے‘ پارٹی حکومت میں ہے‘ ٹیلیفون پر حکومت چلائی جارہی ہے‘ حکمرانوں کو ’’میں‘‘ اور ’’خوف‘‘ کے بت سے نکلنا ہوگا۔ انہوںنے کہا کہ دولت بچانے کیلئے عدالتوں کو برباد کیا جارہا ہے اور ملک کو غلام بنانے پر تلے ہوئے ہیں۔ بھیک مانگ کر قومیں طاقتور نہیں بنتیں اور نہ ہی فیصلے آزادی سے کئے جاسکتے ہیں اور جو لوگ ڈکٹیشن لیتے ہیں وہ لیڈر نہیں بن سکتے۔ انہوں نے کہا کہ ہم آزاد اور خودمختار پاکستان چاہتے ہیں جبکہ یہاں سب سے غریب جیلوں میں جاتا ہے اور ڈاکو اسمبلیوں میں بیٹھے ہیں۔ انصاف لوگوں کو آزادی دیتا ہے۔ فلاحی ریاست میں تعلیم‘ انصاف‘ روزگار حکومت کی ذمہ داری ہوتی ہے۔ یہاں غریب کیلئے تعلیم‘ روزگار‘ صاف پانی اور انصاف نہیں ہے تو یہ سسٹم کیسے چل سکتا ہے۔ پیسے والے لوگ ٹیکس نہیں دے رہے۔ اربوں روپے کے اثاثے بنائے ہوئے ہیں اور ٹیکس صرف پانچ ہزار روپے دے رہے ہیں۔ انہوں نے کہا کہ جس قوم میں خودداری نہیں اس میں اور بھیڑ بکریوں میں کوئی فرق نہیں۔ انہوں نے کہا کہ موجودہ صورتحال کی (ن) لیگ بھی برابر کی ذمہ دار ہے۔ صدر آصف علی زرداری بھی (ن) لیگ کی حمایت کر رہے ہیں۔ انہوں نے مزید کہا کہ موجودہ نظام فضل الرحمن سے بھی زیادہ مک مکا کا ہے۔

کراچی ‘ قومی کرکٹ ٹیم کے سابق کپتان عمران خان نے قومی کرکٹ ٹیم کی آسٹریلیا میں ٹیسٹ اور ون ڈے میچز میں مایوس کن کارکردگی پر دلچسپ تبصرہ کیا ہے کراچی میں میڈیا سے بات چیت کے دوران اس بارے میں سوال کے جواب میں عمران خان نے یہ شعر کہ ’’ کچھ شہر دے لوگ وی ظالم سان ۔ کچھ سانوں مردن دا شوق بھی سی ‘‘ پڑھتے ہوئے کرکٹ ٹیم کی ناقص کارکردگی پر تبصرہ کیا انہوں نے کہا کہ باصلاحیت کھلاریوں کو آگے لانے اور کرکٹ بورڈ میں اہل لوگوں کی تقرری کو ضرورت ہے ۔ آصف علی زرداری کو کیا یہ اختیار حاصل ہے کہ وہ پاکستان کرکٹ بورڈ کے چیئرمین کی تقرری کریں ۔ انہیں کیا معلوم کرکٹ کیا ہوتی ہے ۔

اسلام آباد ‘ پاکستان تحریک انصاف کے چئیرمین عمران خان نے کہا ہے کہ بمباری سے دہشت گرد وں کو فائدہ ہورہا ہے،ڈرون حملوں کی قیمت پاکستانی عوام کو چکانی پڑتی ہے،ڈرون حملے فوراًبند کئے جائیں،دہشت گردی کے خلاف جنگ سے پاکستان کے ساتھ ساتھ امریکی معیشت بھی تباہ ہو جائے گی۔مذاکرات کی راہ اپنانے کا فیصلہ خوش آئند ہے مگر کامیابی اسی صورت میں ہوسکتی ہے جب لڑائی بند کی جائے۔ ان خیالات کا اظہارانہوں نے جمعہ کی دوپہر اپنی رہائش گاہ پرامریکی کانگرس مین کے وفد سے ملاقات کے دوران گفتگومیں کیا۔امریکی کانگرس مین پرمشتمل وفد میں ریپبلکن کے بوب اینجلیز،ٹوڈپلاٹس اور ڈیموکریٹک پارٹی کے سٹیفن لائن،جو ڈونلیاور بیٹی سوٹن کے علاوہ دیگر نمائندگان شامل تھے۔عمران خان نے کہا کہ پاکستانی علاقوں میں امریکی ڈرون حملوں کے نتیجے میں دہشت گردی اور شدت پسندی میں اضافہ ہو رہا ہے۔بارڈر کے دونوں اطراف بمباری بند کی جائے۔ملٹری آپریشن اوربمباری سے دہشت گردوں کو فائدہ ہورہا ہے۔جب معصوم اور بے گناہ شہریوں کو ڈرون حملوںسے جانی و مالی نقصان پہنچایا جاتا ہے تووہ بدلہ لینے کے لئے دہشت گردوں کے ساتھ مل جاتے ہیں۔اس سے دہشت گرد مضبوط ہوتے ہین۔ڈرون حملوں کے نتیجے میں پیدا ہونے والی دہشت گردی کی وجہ سے پاکستان کو بھاری قیمت چکانی پڑتی ہے۔پاکستان ناکردہ گناہ کی سزا بھگت رہا ہے۔اس سے ہماری معیشت اور امن وامان کی صورتحال پر بہت برے اثرات مرتب ہورہے ہیں۔ فوجی آپریشن اور ڈرون حملے مسائل کا حل نہیں بلکہ اس طرح سے ہم دلدل میں مزید دھنستے چلے جارہے ہیں۔ہم مطالبہ کرتے ہیں کہ ڈرون حملے،بمباری اور فوجی آپریشن فوراًبند کر کے مذاکرات کی راہ اپنائی جائے۔اتحادی ممالک کی طرف سے مذاکرات کی راہ اپنانے کا فیصلہ خوش آئند ہے مگر یہ تب کامیاب ہوگا جب لڑائی بند کر کے مذاکرات کئے جائیں۔ایسا نہیں ہو سکتا کہ جنگ بھی جاری رہے اور مذاکرات کی کوشش کی جائے۔

٭۔ ۔ ۔ پاکستان کو موجودہ حالات کا سامنا ناکام لیڈر شپ کیو جہ سے ہے ، وصیت یا کاغذ کے ٹکڑے سے کوئی لیڈر نہیں بن جاتا
٭۔ ۔ ۔ نواز شریف خود کو ننگا ہونے سے بچانے کے لئے زرداری کی حمایت کر رہے ہیں، حکومت اور طالبان کے درمیان پل بننے کی پیش کش کی ہے
٭۔ ۔ ۔ عدلیہ کا راستہ روکا گیا تو لانگ مارچ کریں گے ، دہشت گردی کی جنگ نے معیشت تباہ کر دی ہے

لاہور۔ تحریک انصاف کے سربراہ عمران خان نے کہا ہے کہ پاکستان کو موجودہ حالات کا سامنا ناکام لیڈرشپ کی وجہ سے ہے وصیت سے کوئی لیڈر نہیں بن جاتا ۔ ملک میں ٹیلنٹ موجود ہے اسے صرف پالش کرنے کی ضرورت ہے ۔ نواز شریف خود ننگا ہونے کے ڈر سے آصف علی زرداری کا ساتھ دے رہے ہیں۔ سپریم کورٹ کو کام نہ کرنے دیا گیا تو لانگ مارچ کریں گے جو گوجرانوالہ پہنچ کر نہیں رکے گا ۔ ان خیالات کا اظہار انہوں نے آج سپیریریونیورسٹی رائے ونڈ یں لیکچر دے رہے تھے ۔ عمران خان نے کہا کہ ہمیں موجودہ حالات کا سامنا ناکام لیڈر شپ کی وجہ سے ہے ۔ انہوں نے کہا کہ کوئی کاغذ کے ٹکڑے پر لیڈر نہیں بن جاتا نہ ہی لیڈر شپ وارثت میں ملتی ہے۔ لیڈر قوم کو اعتماد میں لیتا اور اس کے سامنے جھکتا ہے ۔ انہوں نے کہا کہ عوام کیک سوچ میں میڈیا کی وجہ سے تبدیلی آئی ہے جس نے عوام کو شعور دیا ہے ۔ انہوں نے کہا کہ مشرف کہتا تھا اس کو میڈیا نے ڈبودیا ۔ اب زرداری کہتے ہیں میڈیا ان کے خلاف سازش کر رہا ہے ۔ انہوں نے کہا کہ میڈیا کا جن بوتل سے باہر آگیا ہے اب اسے بوتل میں بند نہیں کیا جا سکتا ۔ انہوں نے کہا کہ آئندہ چھ ماہ کے اندرملک میں کرپشن کے خلاف جنگ چھڑنے والی ہے کرپٹ لوگوں نے عدلیہ کا راستہ روکنے کی کوشش کی تو تحریک چلائیں اور لانگ مارچ ہو گا ۔ انہوں نے کہا کہ زرداری کے خلاف تمام مقدمات نواز نے بنائے تھے اب نواز شریف خود ننگا ہونے کے ڈر سے زرداری کی حمایت کر رہے ہیں ۔ انہوں نے کہا کہ ڈالر لے کر قبائلی علاقوں میں فوج بھجوائی گئی جو اپنے لوگوں کو ہی مار رہی ہے ۔ انہوں نے کہا کہ میں نے حکومت کو پیش کش کی ہے کہ قبائلی ، عمائدین سے بات چیت کا موقع دیں کیونکہ یہ مسئلہ ملٹری ایکشن سے حل نہیں ہو گا ملٹری ایکشن نے ملک میں انتہا پسندی کو جنم دیا ہے ۔ انہوں نے کہا کہ امریکہ بھی افغانستان میں طالبان پر قابو پانے میں ناکام ہو ا ہے اور اس نے طالبان اور حکمت یار کو مذاکرات کی دعوت دی ہے ۔انہوں نے کہا کہ دہشت گردی کے نام پر شروع کی گئی جنگ نے پاکستان کی معیشت کو تباہ کر دیا ہے ۔ پاکستان کا دفاعی بجٹ 450 ارب روپے سے بڑھ کر چھ سو ارب روپے ہو گیا ہے پاکستان نے 60 سال میں 40 ارب قرض لیا جبکہ گذشتہ پونے دو سال کے دوران 15 ارب روپے قرض لئے گئے ہیں پاکستان کو سالانہ 800 ارب روپے قرض کی مد میں ادا کرنے پڑتے ہیں جن کے باعث تعلیم اور صحت کیلئے کچھ بھی نہیں بچتا ہمارے حکمرانوں کو خوف نے ذہنی مریض بنا دیا ہے ۔ اب یہ حکمران امریکی سفیروں کے بھی جوتے پالش کرنے لگے ہیں اور اپنا اقتدار بچانے کیلئے کبھی سندھ کارڈ اور کبھی کوئی دوسرا کارڈ استعمال کرنے کی کوشش کرتے ہیں ۔ انہوں نے کہا کہ قوم کی مہنگائی نے زندگی اجیرن بنا رکھ ہے اور وزیر بجلی کہتے ہیں کہ ابھی قوم کو ایک اور کڑوی گولی نگلنا پڑے گی ۔ انہوں نے کہا کہ غریب ملک میں وزیر اعظم میں روزانہ 10 لاکھ روپے خرچ کئے جاتے ہیں ۔ انہوں نے کہا کہ تحریک انصاف اقتدار میں آکر وی آئی پی کلچر اور کرپشن کا اوپر سے نیچے تک خاتمہ کرے گی ۔