Urdu News-Online Urdu Newspaper

اہم قومی معاملات میں تمام اتحادیوں کو اعتماد میں لیا جائے گا

اسلام آباد۔ سید یوسف رضا گیلانی نے کہا ہے کہ حکومت اپنی مفاہمتی پالیسی جاری رکھے گی۔ اور اہم قومی معاملات میں تمام اتحادیوں کو اعتماد میں لیا جائے گا ۔ بلوچستان میں ترقی حکومت کی اولین ترجیح ہے صوبے بھر میں بنیادی ضروریات کے لئے حکومت فنڈز فراہم کر رہی ہے ایوان وزیر اعظم سے جاری بیان کے مطابق بدھ کو پنجاب اور بلوچستان کے گورنرز نے وزیر اعظم ہاؤس میں وزیر اعظم گیلانی سے الگ الگ ملاقاتیں کیں اور وفاق و صوبے سے متعلق اہم امور پر تبادلہ خیال کیا گیا وزیر اعظم سید یوسف رضا گیلانی نے گور نر پنجاب سلمان تاثیر سے گفتگو کرتے ہوئے کہا کہ حکومت اپنی مفاہمتی پالیسی کو جاری رکھتے ہوئے قوم کے اہم معاملات میں اپنے اتحادیوں کو اعتماد میں لے گی بعد ازاں گور نر بلوچستان سے ملاقات میں وزیر اعظم گیلانی نے صوبے ترقیاتی منصوبوں ،فنڈز اور موجودہ صورت حال کے بارے میں اظہار خیال کر تے ہوئے کہا کہ حکومت بلوچستان میں ترقی کا خواہاں ہے اور صوبے میں ترقی حکومت کی اولین ترجیح ہے وزیر اعظم نے کہا کہ بلوچستان بھر میں اہم بنیادی ضروریات کے لئے حکومت فنڈز فراہم کر رہی ہے انہوں نے کہ’’ آغاز حقوق بلوچستان ‘‘ کے اعلان کے بعد بلوچستان کے عوام کی محرومیاں دور ہو جائیں گی اب بلوچستان میں خوشحالی اور ترقی کا نیا دور آئے گا۔

اسلام آباد/لاہور۔اتحاد تنظیمات مدارس کے رہنماء اور وفا ق المدارس العربیہ پاکستان کے ناظم اعلیٰ مولانا محمد حنیف جالندھری کی وزیراعلی پنجاب میاں شہباز شریف سے تفصیلی ملاقات ،وزیر اعلی کی طرف سے مدارس کے کردار وخدمات کو زبردست الفاظ میں خراج تحسین ،مدارس کے تقدس کو برقرار رکھنے اور اہل مدارس کو ہراساں نہ کرنے کی یقین دہانی، وزیر اعلی نے مدارس پر چھاپو ں اور دیگر شکایات کے ازالے کے لیے آئی جی ،ہوم سیکرٹری ، دیگر متعلقہ اداروں اور مدارس کی نمائندہ تنظیموں کا ہنگامی اجلاس طلب کرلیا۔تفصیلات کے مطابق اتحاد تنظیماتِ مدارس کے رہنماء اور وفاق المدارس العربیہ پاکستان کے ناظم اعلی مولانا محمد حنیف جالندھری نے وزیر اعلی پنجاب میاں شہباز شریف سے تفصیلی ملاقات کی۔ اس ملاقات کے دوران انہوں نے وزیر اعلی سے پنجاب کے مختلف علاقوں میں دینی مدارس کے خلاف کریک ڈاؤن ،چھاپوں اور کوائف طلبی کے نام پر اساتذہ وطلباء کو ہراساں کرنے کے حوالے سے مدارس کی شکایات وخدشات کا اظہار کیا اور کہا کہ مدارس تعلیمی ادارے ہیں ، ان کا عصری تعلیمی اداروں کی طرح بلکہ ان سے زیادہ احترام ہونا چاہیے اورمدارس کا تقدس پامال کرنے کی کسی کو اجازت نہیں ہونی چاہیے جس پر وزیر اعلیٰ نے وضاحت کی کہ انہوں نے کسی مدرسہ پر چھاپہ مارنے کے احکامات جار ی نہیں کیے اور نہ ہی آئندہ ہم کسی کو کسی دینی ادارے کا تقدس پامال کرنے اور مدارس کے اساتذہ وطلباء کو ہراساں کرنے کی اجازت دیں گے ۔وزیر اعلی نے کہاکہ ہم تومدارس کا نہ صرف یہ کہ احترام کرتے ہیں بلکہ مدارس کی خدمات کے معترف بھی ہیں اور مدارس کی مزیدترقی اور وسعت کے لیے کوشاں بھی ہیں ۔ہماری خواہش ہے کہ مدارس کے طلباء زندگی کے دیگر شعبوں میں بھی فعال کردارا دا کریں,،ہم مدارس کے طلباء کو یکساں مواقع مہیا کرنے کی کوشش کرتے ہیں اس لیے ہم چھاپے مارکر مدارس کا تقدس پامال کرنے کے قطعاً حق میں نہیں۔ انہوں نے فوری طور پر ہدایات جاری کیں کہ مدارس کی شکایات کے ازالے اور چھاپوں کے معاملے پر غور کر نے کے آئی جی ،ہوم سیکرٹری ،دیگر متعلقہ اداروں اور مدارس کی نمائندہ تنظیموں کا مشترکہ ہنگامی اجلاس طلب کیا جائے اور تمام حل طلب امور کو باہمی افہام وتفہیم سے طے کیا جائے ۔

اسلام آباد ۔ وفاقی وزیر داخلہ رحمن ملک نے کہاہے کہ ملک میں اپریل 2009ء سے آج تک دس ماہ کے عرصہ میں دہشت گردی کے کل 1780واقعات ہوئے ہیں جن میں کل 2072افراد شہید 6253 زخمی ہوئے ان دس ماہ میں 80خود کش حملوں کے واقعات رونما ہو چکے ہیں متاثرہ خاندانوں کو معاوضوں کی ادائیگی صوبائی حکومتوں کی ذمہ داری ہے پیر کو خاتون رکن قومی اسمبلی شیریں ارشد خان کے سوال کے جواب میں وزیر داخلہ نے ایوان کو بتایا کہ اپریل 2009ء سے آج تک قانون نافذ کرنے والے ادارہپر284 حملے ہوئے اس دس ماہ کے عرصہ میں 164بم دھماکے 225دستی بم کے پھٹنے 435آئی ای ڈی دھماکے 145بارودی سرنگ کے دھماکے 32میزائل فائر ،369راکٹ حملے 46فرقہ وارانہ تشدد اور 80خود کش حملے کے واقعات ہوئے انہوں نے کہاکہ معاوضوں کی ادائیگی صوبائی معاملہ ہے۔

اسلام آباد۔سپریم کورٹ نے پی سی او ججز کی طرف سے 31 جولائی کے فیصلے پر نظر ثانی کی درخواستوں کا تفصیلی جاری کر دیا ہے یہ فیصلہ 87 صفحات پر مشتمل ہے 31 جولائی کے فیصلے کے نتیجے میں فارغ ہو نے والے پی سی او ججز نے نظر ثانی کی درخواستیں دائر کی تھیں ان میں ہائی کورٹ اور سپریم کورٹ کے ججز شامل تھے سندھ ہائی کورٹ بار نے سندھ ہائی کورٹ کے دو ججز کے حوالے سے اس وقت پیش دائر کی تھی جس کی تفصیلی سماعت کے نتیجہ میں تقریباً40 کے قریب ججز کو اپنے عہدوں سے فارغ ہو نا پڑا تھا اور اس کے بعد جسٹس خورشید انور بھنڈر، جسٹس حسنات احمد خان،جسٹس ذوالفقار احمد چوہدری،جسٹس سجاد حسین شاہ، جسٹس شبیر رضا رضوی،جسٹس یاسمین عباسی،جسٹس محمد احسن بھون اور انوار الحق کے علاوہ حامد علی شاہ نے نظر ثانی کی درخواستیں دائر کی تھیں اور یہ موقف اختیار کیا گیا تھا کہ انہیں سماعت کے دوران اپنا موقف پیش کر نے کا موقع فراہم نہیں کیا گیا نظر ثانی کی پٹیشن کے دوران ہی ایک جج سید ذوالفقار علی بخاری کو توہین عدالت کا نوٹس بھی جاری ہوا تھا اس کا بھی اس تفصیلی فیصلے میں ذکر شامل ہے اور چیف جسٹس افتخارمحمد چوہدری کی سر براہی میں 14 رکنی بینچ نے اس کی سماعت کی تھی جس کا متفقہ فیصلہ جاری کر دیا گیا ہے۔

اسلام آباد۔ صدر مملکت آصف علی زرداری کی اہلیت چیلنج کرنے سے متعلق مولوی اقبال حیدر ایڈووکیٹ کا ریفرنس الیکشن کمیشن کو موصول ہو گیا ہے۔ درخواست میں موقف اختیار کیا گیا ہے کہ صدارتی انتخابات کے وقت این آر او کے وجہ سے اہلیت چیلنج نہیں کی جا سکتی تھی ۔ یہ درخواست مولوی اقبال حیدر کی طرف سے بذریعہ ڈاک الیکشن کمیشن کو بھجوائی گئی تھی جو پیر کو الیکشن کمیشن کو موصول ہو گئی ہے اس درخواست موقف اختیار کیا گیا کہ این آر او کی وجہ سے جب صدارتی الیکشن ہو رہے تھے تو اس وقت چیلنج نہیں کیا جا اسکا لہٰذا اب صدر مملکت کی اہلیت کو چیلنج کیا جا رہا ہے ۔ انھوں نے اس میں تمام صدارتی امیدواروں جسٹس سعید الزمان ڈصدیقی ، مشاہد حسین سید اور آصف علی زرداری کو فریق بنایا گیا ہے اور کہا گیا ہے کہ اہلیت کے حوالے سے الیکشن کو الیکشن کمیشن اس پر غور کرے الیکشن کمشین کے حکام نے رابطہ کرنے پر بتایا کہ درخواست انہیں موصول ہو چکی ہے اور اس درخواست کے آئینی او ر قانونی پہلوؤں کا جائزہ لے کر کارروائی کی جائے گی۔

بھارت بڑی جنگ کی ریہرسل کر رہا ہے، پنجاب کو کنگال کرنیوالے حکمران ہر جرم میں برابر کے شریک ہیں، 17 ویں ترمیم آٹے اور چینی کا متبادل نہیں عوام کو دھوکہ دے رہے ہیں

ہم نے سانحہ لال مسجد روکنے کی بہت کوشش اور زلزلہ زدگان کی ہر ممکن مدد کی، مخالفین اقتدار لے کر دونوں جگہ نہیں گئے، یہ اپنے ذاتی مفاد کیلئے پریشان ہیں

ضمنی الیکشن میں کرپشن اور کارکردگی کا مقابلہ ہے، مانسہرہ کے عوام دونوں جماعتوں کا جھوٹ، چالاکیاں اور ہماری خدمات جانتے ہیں: بہت بڑے جلسہ سے خطاب

ن لیگ اور پیپلزپارٹی کا شجرہ نسب ایک ہے اسی تنخواہ پر کام کریں گے، مشاہد حسین: حکمرانوں کیخلاف سوات اور

مانسہرہ میں الیکشن لڑنے والی ہماری واحد جماعت ہے: امیر مقام

اسلام آباد۔ پاکستان مسلم لیگ کے سینئر مرکزی رہنما چودھری پرویزالٰہی نے کہا ہے کہ مفاہمت کے نام پر چوروں اور لٹیروں کا اتحاد مسترد کرتے ہیں جو پاکستان اور عوام کے مسائل حل کرنے میں ناکام ہو چکا ہے۔ اتحادی حکمران سرحدوں پر بھارتی فائرنگ اور بلوچستان میں ملکی یکجہتی کے خلاف غیر ملکیوں کی مداخلت پر بھی خاموش ہیں۔ لال مسجد کا پروپیگنڈہ کرنے والوں کو اقتدار لے کر لال مسجد یا زلزلہ سے متاثرہ علاقوں کا دورہ تک کرنے کی توفیق نہیں ہوئی۔ پی پی پی اور ن لیگ کی نورا کشتی بے نقاب ہو چکی ہے۔ پنجاب کو کنگال کرنے والے صوبائی حکمران ہر جرم میں برابر کے شریک ہیں۔ 17 ویں ترمیم آٹے اور چینی کا متبادل نہیں یہ عوام کو دھوکہ دے رہے ہیں۔ پاکستان مسلم لیگ ہی ملک و قوم کو درپیش موجودہ خطرات و مشکلات سے نکال سکتی ہے۔ ضمنی انتخابات میں کارکردگی اور کرپشن کا مقابلہ ہے اور انشاء اللہ ہمارے امیدوار ہی کامیاب ہوں گے۔ وہ پیر کو مانسہرہ میں مسلم لیگ کے امیدوار حاجی زرگل خان کی انتخابی مہم کے سلسلے میں بہت بڑے عوامی اجتماع سے خطاب کر رہے تھے۔ مشاہد حسین سید، انجینئر امیر مقام، ضلع ناظم سردار محمد یوسف، ہم خیال گروپ کے صوبائی صدر وجیہہ الزماں اور دیگر مقررین نے بھی جلسے سے خطاب کیا۔ خواتین سمیت علاقے بھر سے لوگوں کی بہت بڑی تعداد نے اس جلسے میں شرکت کی اور چودھری پرویزالٰہی کے حق میں پرجوش نعرے لگاتے رہے۔چودھری پرویزالٰہی نے کہا کہ اتحادی حکمرانوں کی توجہ صرف اپنے مسائل پر ہے جو ذاتی مفادات کے بارے میں پریشان ہیں اور قومی اداروں کا تصادم چاہتے ہیں۔ انہوں نے کہا کہ بھارت سرکار پاکستان کے خلاف ایک بڑی جنگ کی ریہرسل کر رہی ہے۔ اس نے ہمارے دریاؤں کا پانی بند کر دیا ہے۔ بارڈر پر آئے روز اندھا دھند فائرنگ سے ہمارے فوجی شہید کیے جا رہے ہیں لیکن حکومت خاموش ہے۔ یہ مسئلہ عالمی سطح پر نہیں اٹھایا جا رہا۔ بلوچستان میں ایک نہیں کئی ملک مداخلت کر رہے ہیں۔ ثبوت ہونے کے باوجود حکومت کسی سے احتجاج تک نہیں کر رہی۔ اتحادی حکمرانوں کو صرف اپنے مفاد کی فکر ہے اور وہ قومی اداروں کا تصادم چاہتے ہیں۔ انہوں نے کہا کہ پنجاب کے حکمرانوں نے صوبے کو کنگال کر دیا ہے۔ ہم نے اقتدار چھوڑا تو خزانے میں 150 ارب روپے تھے دو سال میں ہی ان کی عیاشیوں نے پنجاب کو 80 ارب روپے کا مقروض کر دیا۔ انہوں نے زلزلے کی مصیبتوں کا دلیری سے مقابلہ کرنے پر مانسہرہ کے عوام کو شاندار خراج تحسین پیش کرتے ہوئے کہا کہ چودھری شجاعت حسین کی قیادت میں ہماری پارٹی اور اس وقت کی پنجاب حکومت نے مانسہرہ کے مصیبت زدہ عوام کی مشکلات کم کرنے کیلئے دن دیکھا نہ رات۔ ہم نے حتی المقدور یہاں کے عوام کی خدمت کی ہے لیکن ان سے ہمدردی جتانے اور کارروائی ڈالنے والوں کو پاکستان واپس آ کر متاثرہ علاقوں کا دورہ تک نہیں کیا۔ مانسہرہ کے عوام بہادر ہیں کہ انہوں نے پانچ سال کے مختصر عرصہ میں زلزلے کے مصائب پر قابو پا لیا۔ چودھری پرویزالٰہی نے سانحہ لال مسجد کا ذکر کرتے ہوئے کہا کہ لال مسجد کا پروپیگنڈہ کرنے والوں کو اقتدار میں آنے کے بعد لال مسجد میں جانے کی توفیق تک نہیں ہوئی۔ جبکہ مولانا عبد العزیز نے خود کہا تھا کہ چودھری شجاعت حسین نے لال مسجد آپریشن رکوانے کی بہت کوشش کی تھی اور مولانا عبد الرشید غازی نے آخری وقت میں اپنے زیر کفالت دو بچیاں چودھری شجاعت حسین کی کفالت میں دی تھیں جو آج بھی ہماری کفالت میں ہیں۔ انہوں نے کہا کہ مانسہرہ کے عوام کو ایک بار پھر اپنے دلیرانہ جذبے کا اظہار کرنا ہو گا اور قوم کو مشکلات سے نکالنے کیلئے راہنمائی دینا ہو گی اور یہ راہنمائی مسلم لیگ کے امیدوار کی کامیابی سے ہی ممکن ہو گی۔ انہوں نے کہا کہ اتحادی حکمرانوں کی نا اہلی سے ضروری اشیاء کی قیمتوں میں ہمارے دور کے مقابلے میں 300 گنا اضافہ ہو گیا ہے۔ ملکی سلامتی، وقار، خودمختاری خطرے میں ہے عوام مہنگائی، بیروزگاری، بدامنی اور دیگر مسائل پر بے بس ہیں۔ انہوں نے کہا کہ گلگت بلتستان میں تمام سرکاری وسائل استعمال کرنے کے باوجود ن لیگ صرف 2 نشستیں حاصل کر سکی جبکہ ہم نے یہاں 3 نشستیں جیتیں۔ کہ پیپلزپارٹی اور ن لیگ اپنے امیدواروں کی کامیابی کیلئے جھوٹے وعدے اور دعوے کر رہی ہیں۔ عوام کو گمراہ کرنے کیلئے یہاں گیس کے پائپ اور بجلی کے کھمبے دھڑا دھڑ پہنچائے جا رہے ہیں لیکن عوام با شعور ہیں وہ ان کی چالبازیوں اور چالاکیوں کو سمجھتے ہیں۔ عوام گیس کے پائپ اور بجلی کے کھمبے پر نہیں کارکردگی کی بنیاد پر فیصلہ کریں گے۔ چودھری پرویزالٰہی نے کہا کہ مانسہرہ کسی کی خاندانی جاگیر نہیں ہے۔ مانسہرہ کے عوام کا ووٹ پاکستان مسلم لیگ اور سائیکل کیلئے ہے۔ اس ووٹ کے ذریعے مانسہرہ کے عوام ن لیگ اور پیپلزپارٹی دونوں پر عدم اعتماد کا اظہار کریں گے اور ووٹ کی طاقت سے ملک میں آزادی اور انصاف کی نوید دیں گے۔ پاکستان مسلم لیگ کے سیکرٹری جنرل مشاہد حسین سید نے اپنے خطاب میں ن لیگ اور پیپلزپارٹی کے کردار اور کارکردگی کا تفصیلی جائزہ لیتے ہوئے کہا کہ دونوں کا شجرہ نسب ایک ہے۔ یہ دونوں اسی تنخواہ پر کام کریں گی کیونکہ یہ صرف فون کالز کی سیاست کرتی ہیں۔ ایک کا قبلہ و کعبہ لندن تو دوسرے کا واشنگٹن ہے جہاں سے ایک فون کال ان کیلئے حکم کا درجہ رکھتی ہے۔ پاکستان مسلم لیگ صوبہ سرحد کے صدر امیر مقام ایم این اے نے کہا کہ اپنی شاندار کارکردگی کی بناء پر ہم فخر سے سربلند کر کے عوام کے پاس آئے ہیں۔ انہوں نے کہا ہماری واحد جماعت ہے جو حکمرانوں کے خلاف سوات اور مانسہرہ میں الیکشن لڑ رہی ہے اور انشاء اللہ عوام اسے ووٹوں کی طاقت سے کامیاب بنائیں گے۔

جمہوری و سیاسی نظام کے استحکام کیلئے حکومت کاہر قسم کی محاذ آرائی سے بچنے کا فیصلہ

حکومتی اکابرین کو اتحادی جماعتوں کی جانب سے مکمل تعاون کی یقین دہانی ، حکمران اتحاد میں قریبی رابطوں پر اتفاق

اسلام آباد۔صدر آصف علی زرداری اور وزیراعظم سید یوسف رضا گیلانی کے درمیان جمعہ کو اسلام آباد میں اہم ملاقات میں جمہوری و سیاسی نظام کے استحکام کیلئے ہر قسم کی محاذ آرائی سے بچنے پر اتفاق کیاگیاہے جبکہ حکومتی اتحادی جماعتوں نے بھی اسی قسم کا عزم کیا ہے اور این آر او پر عدالتی تفصیلی فیصلے کے نتیجہ میں پیدا شدہ صورتحال کے حوالے سے حکومتی اکابرین کو اپنے ہر ممکن تعاون کی یقین دہانی کرائی ہے کسی بھی ممکنہ صورتحال سے نمٹنے کیلئے حکمران اتحاد میں شامل اکابرین کے درمیان قریبی رابطے رکھنے پر اتفاق کیاگیا ہے صدر وزیراعظم کے درمیان ملاقات میں ملک کی سیاسی صورتحال کا جائزہ بھی لیا گیا یہ ملاقات ایوان صدر میں ہوئی اس بات پر اتفاق کیا گیا کہ ملک میں محاذ آرائی کی فضا قائم نہیں ہونے دی جائے گی جمہوری وسیاسی قوتیں ذمہد ارانہ رویوں کا اظہار کریں گی ۔ ادھر سپریم کورٹ کے این آر او پر تفصیلی فیصلے کے بعد پیدا شدہ صورتحال میں حکمران جماعت پاکستان پیپلز پارٹی اتحادی جماعتوں نے مکمل تعاون کی یقین دہانی کرادی یہعزم جمعہ کو ایوان صدر میں صدر آصف علی زرداری کی زیر صدارت ہونے والے اجلاس میں کیاگیا جس میں وزیراعظم سید یوسف رضا گیلانی عوامی نیشنل پارٹی کے چیئرمین اسفند یار ولی ایم کیو ایم کے ڈاکٹر فاروق ستار فاٹا کے منیر خان اورکزئی اور دیگر وزراء سید خورشید شاہ ، ڈاکٹر بابر اعوان بھی شریک ہوئے تاہم جمعیت علماء اسلام (ف) نے اجلاس میں شرکت نہیں کی اجلاس کا بنیادی مقصد سپریم کورٹ کے این آر او پر تفصیلی فیصلے کے بعد پیدا ہونے والی صورتحال پر غور کرنا تھا اجلاس میں قانونی اور سیاسی حوالوں سے مختلف امور زیر بحث آئے وزیراعظم سید یوسف رضا گیلانی نے عدالتی فیصلے کے بارے میں آئینی و قانونی ماہرین سے کی جانے والی مشاورت سے آگاہ کیا ملکی سیاسی صورتحال کے حوالے سے حکمران اتحاد کے درمیان قریبی رابطے رکھنے پر بھی ا تفاق کیاگیا ہے۔صدر نے حکمران اتحاد کو نئی صورتحال کے حوالے سے اعتماد میں لیا۔

جمہوری عمل کو کچھ ہوا تو ملک ایک بھنور کی طرف چلا جائے گا

فیصلے پرعملدرآمد کرانے کے لیے وکلاء پر بھاری ذمہ داری عائد ہوتی ہے

پاکستان مسلم لیگ (ن) کے سینئر رہنماکا استقبالیہ سے خطاب

اسلام آباد۔ پاکستان مسلم لیگ (ن) کے سینئر رہنما سینٹر راجہ ظفر الحق نے کہا ہے کہ این آر او کے بارے عدالتی فیصلے پر عملدرآمد نہ کیا گیا تو یہ نظام کو جڑ سے اکھاڑے کی وجہ بن سکتا ہے ۔ ایسا ہوا تو ملک کو بھنور کی طرف دھکیل دیا جائے گا۔ فیصلے پرعملدرآمد کو یقینی بنوانے کے لیے وکلاء کے کندھوں پر بھاری ذمہ داری عائد ہو گی ۔ ان خیالات کا اظہار انھوں نے جمعرات کو پاکستان مسلم لیگ (ن) سے تعلق رکھنے والے اسلام آباد کے نومنتخب جوائنٹ سیکرٹری مہتاب خان ایڈووکیٹ کے اعزاز میں استقبالیہ کے موقع پر کیا۔ حکومتی آزمائش کا وقت ہے ۔ انہوں نے کہا کہ عدلیہ انصاف فراہم کر رہی ہے ۔ این آر او کے بارے میں عدالتی فیصلے پر عملدرآمد کو یقینی بنوانے کے لیے شایدبار کو مرکزی کردار ادا کرنا پڑے اور وکلاء کے کندھوں پر بھاری ذمہ داری عائد ہو گی ۔ این آر او کا حکومت نے بھی دفاع نہیں کیا تھا۔ نظر ثانی کی پٹیشن پر کسی فیصلے کے تبدیل ہو نے کے امکانات کم ہو تے ہیں ،اس میں بھی اگر بڑی غلطی سامنے آئے تو پھر نظر ثانی کی اپیل کی جا سکتی ہے۔ این آر او کے خلاف عدلیہ کا فیصلہ عالمی سطح کا تاریخ ساز فیصلہ ہے ۔حکومت کے لئے فیصلے پر عمل کرنا ناگزیر ہے ۔ کوئی ادارہ اس پر عمل کرنے سے انکار اوراسے روک نہیں سکتا۔ عملدرآمد نہ کیا گیا تو پاکستان کو بھنور کی جانب سے دھکیل دیا جائے گا جو نظام کو جڑ سے اکھاڑنے کے مترادف ہو گا۔ انھوں نے کہا کہ ہم چاہتے ہیں کہ آئین کی حکمرانی کے ذریعے ملک آگے بڑھے۔ اس موقع پر احسن اقبال نے کہا کہ ملک میں محاذ آرائی بڑھانے سے بڑا بحران پیدا ہو گا۔ حکمران ہوش کے ناخن لیں ۔ این آر او کے بارے میں عدالتی فیصلے کو سیاست کی بھینٹ نہ چڑھایا جائے ایسا انتہائی خطرناک ہو گا۔

اسلام آباد۔ سابق چیف جسٹس سپریم کورٹ جسٹس (ریٹائرڈ) سعید الزمان صدیقی نے کہا ہے کہ این آر او ختم ہونے کے بعد صدر زرداری کی اہلیت کو آئین کے آرٹیکل62 اور 63 کے تحت چیلنج کیا جا سکتا ہے ۔ انہیں اب کوئی آئینی استثنائحاصل نہیں آرٹیکل 248 کے تحت صدر کو عدالت میں بلایا نہیں جا سکتا ۔ ان کے خلاف مقدمہ چل سکتا ہے اگر عدالت ریونیو میں فیصلہ برقرار رکھتی ہے تو حکومت کے پاس فیصلے پر عمل درآمد کے سوا کوئی آپشن نہیں تمام ادارے سپریم کورٹ کے فیصلوں پر عملدرآمد کے پابند ہیں۔ ان خیالات کا اظہار انھوں نے ایک نجی ٹی وی انٹرویو میں کیا سعید الزمان صدیقی نے کہاکہ این آر او پر حکومت کی جانب سے عملدرآمد نہ کرنے پر عدالت تعاون نہ کرنے والے اداروں کو توہین عدالت کانوٹس بھیج سکتی ہے یا خود کمشنر بھی مقرر کر سکتی ہے جو عدالتی احکامات پر عمل کروا کر رپورٹ عدالت میں پیش کرے گا۔انھوں نے کہا کہ عدالت سوئس کیسز کے بارے میں حکومت کو واضح طور پر حکم دے چکی ہے اب ان احکامات پر عمل کرنا حکومت کی ذمہ داری ہے۔انھوں نے کہا کہ صدر کو این آر او کے تحت تحفظ ختم ہو چکا ہے ۔ اب آئین کے آرٹیکل 62 اور 63 کے تحت ان کی اہلیت کو دوبارہ چیلنج کیا جا سکتا ہے ۔ آئین کے آرٹیکل 248 کے تحت صدر کے خلاف فوجداری مقدمہ درج نہیں ہو سکتا ۔ دوسرے مقدمات درج ہو سکتے ہیں اور یہ مقدمات عدالتوں میں چل بھی سکتے ہیں لیکن عدالت صدر کو عدالت میں بلا نہیں سکتی اور اگر صدر اپنے عہدے سے ہٹ جاتا ہے تو عدالت انہیں عدالت میں طلب بھی کر سکتی ہے اور ان کو گرفتار بھی کیا جا سکتا ہے ۔انھوں نے کہا کہ آئین کے آرٹیکل 119 کے تحت تمام اداروں پر ضروری ہے کہ وہ ملک کی اعلیٰ ترین عدالت سپریم کورٹ کے احکامات پرعمل کریں۔

اسلام آباد۔وزیر دفاع چوہدری احمد مختار نے کہا ہے کہ پاک فوج ملک کو در پیش اندرونی و بیرونی چیلنجز سے نمٹنے کی مکمل صلاحیت رکھتی ہے۔دہشت گردی بڑا چیلنج تھی لیکن مسلح افواج اس کے خاتمے کے لئے اہم کر دار ادا کیا۔ان خیالات کا اظہار انہوں نے پاکستان میں انڈونیشیاء کے سفیر اشک لائکوسینا سے ملاقات کے دوران بات چیت کرتے ہوئے کیا۔ ملاقات کے دوران دو طرفہ تعاون کے امور پر تبادلہ خیال کیا گیا اور تجارت،معیشت،سیاحت اور دفاع کے شعبوں میں دو طرفہ تعاون اور تعلقات کے فروغ کی ضرورت پر زور دیا۔ انڈونیشیاء کے سفیر سے بات چیت کرتے ہوئے وزیر دفاع نے کہا کہ پاکستان کو ملائیشیاء کے ساتھ اپنے تعلقات پر فخر ہے اور دونوں ممالک ہر مشکل گھڑی میں ایک دوسرے کے کام آئے ہیں ان تعلقات کو باہمی دلچسپی کے شعبوں میں مزید فروغ دینے کی ضرورت ہے۔چوہدری احمد مختار نے دہشت گردی کے خلاف کوششوں اور آئی ڈی پیز کی بحالی کے حوالے سے بھی آگاہ کیا اور کہاکہ پاکستان مشکل حالات سے گزر رہا ہے بین الاقوامی برادری متاثرہ علاقوں میں تعمیر نو اور ترقی کی کوششوں میں پاکستان سے تعاون کرے انڈونیشن سفیر نے دہشت گردی کے خلاف پاکستان کی کوششوں اور حاصل کی گئی کامیابیوں پر پاکستان کو خراج تحسین پیش کیا انہوں نے کہاکہ ان کا ملک دہشت گردی کے خلاف کوششوں میں پاکستان سے بھرپور تعاون کرے گا انہوں نے مزید کہاکہ دونوں ممالک کے درمیان دفاع سمیت دیگر اہم شعبوں میں تعاون کے مواقع موجود ہیں انہوں نے وزیر دفاع کو انڈونیشیا کے دورے کی دعوت بھی دی ۔